Song of Solomon 3

Aymara 1997

← Chapter 2 Jump to: Chapter 4 →

1Arumanakax ikiñaxan nayan munasitaxaruw thaqtasta. Jupar thaqhasax janiw jikxatkti.

2Ukat sartasin markpach muytanta, thakhinakana, plazanakan munasitaxar thaqhasa.

3Marka uñjirinakaruw jiskt'asta: “¿Janit jumanakax nayan munasitaxar uñjapkta?” sasa.

4Jupanakampi jikisiwayasin mä juk'ampjarusti munasitaxampix jikisxaktwa. Amparapat wayxarusinsti jan antutjasaw taykaxan utjäwipar irpawayta.

5Jerusalenankir warminaka, nayaw achikt'asipxsma; ch'uminkir tarujanak layku, cabritonak layku, munasitaxarux jan ikit sartayapxamti, ¡Kunapachkamatix munki ukkhakam ikt'asiskpan!

6¿Kunarak wasar tuqit jutki ukasti? Mä jach'a jiwq'ir uñtatawa, panqar q'aphinak taypinjama, incienso q'aphichata taypinjama, ukhamarak suma q'apkir qullanakan q'aphip taypinjam jutanti.

7¡Ukax Salomonarakisä, reyi carropat jutaski! Juparusti Israel markankir jan axsariri suxta tunka soldadonakampi muyuntataw juti;

8taqpachaniw jupanakax espada apnaqañ yatipxi, nuwasiñatakix suma yatsutäpxiwa; axsarkañ ch'amak arumanakatakisti sapa mayniw espadanakap wak'apar apapxi.

9Salomón reyix, Líbano chiqankir suma lawanakat reyi carrop lurasi.

10Sayirinakapax qullqit luratawa; jikhani qimkatañapasti qurit luratawa; qunuñapasti wila isimpi luratarakiwa; manqhïxapasti, Jerusalenankir warminakan munasiñapampi k'achachatarakiwa.

11Jerusalenankir warminaka, ¡Salomón reyir uñjir mistunipxam! Pillumpi ucht'atawa, taykapax jaqichasiñ urupataki lurkatayna, taqi jakäwipan kusiskañ urupataki lurkatayna uka pillumpi ucht'atawa.

← Chapter 2 Jump to: Chapter 4 →