Deuteronomy 13

Balinese

1Yening wenten satunggiling nabi wiadin tukang ngartiang ipian masanggup pacang ngwentenang katawahan wiadin praciri,

2mangdane ipun mrasidayang ngedeng semeton buat mabakti muah nyungsung widi-widi sane nenten naenin baktinin semeton,

3sampunang pisan semeton nglinguang ipun. Ida Sang Hyang Widi Wasa Widin semetone mrabotang ipun buat mintonin semeton, punapike semeton wiakti astiti bakti ring Ida Sang Hyang Widi Wasa saking nulusing ati.

4Iringja Ida Sang Hyang Widi Wasa tur ajerihja ring Ida. Tinutinja Ida tur agemja pituduh-pituduh Idane. Baktininja Ida tur satia tuuja ngiring Ida.

5Nanging pademangja sakancan tukang artiang ipiane miwah nabine sane ngurukang semeton tungkas pamantuka ring Ida Sang Hyang Widi Wasa, sane sampun ngluputang semeton saking tanah Mesir, genah semetone dados panjak. Jadmane sane kadi asapunika sujatinipun jadma durjana, tur ipun ngindayang ngedeng semeton mangda semeton lempas saking urip sane kapituduhang antuk Ida Sang Hyang Widi Wasa. Jadmane punika patut kapademang mangdane semeton prasida luput saking kadursilan puniki.

6Meh-mehan tugelan semetone wiadin okan semetone sane lanang wiadin istri, wiadin rabin semetone sane tresnain semeton, wiadin sawitran semetone sane raket ring semeton, jagi saking silib ngajak semeton mabakti ring widi sane lianan, widi sane nenten naenin baktinin semeton miwah paraleluur semetone.

7Salah tunggal saking pantarannyane jaga ngajakin semeton mabakti ring widi-widin jadmane sane magenah nampek wiadin doh saking semeton.

8Nanging sampunang wehina ipun nguluk-uluk ragan semetone malahan sampunang piragianga baos ipune. Sampunang semeton nyayangang wiadin madalem ipun, miwah sampunang nyayubin ipun.

9Pademangja ipun. Semeton patut dados anak sane pangawit ngencur ipun antuk batu, wusan punika wau banggayang anake sane lianan taler ngencur ipun antuk batu.

10Encurin ipun antuk batu, kantos ipun padem! Ipun mamanah ngedeng semeton lempas saking ayun Ida Sang Hyang Widi Wasa, Widin semetone sane sampun ngluputang semeton saking tanah Mesir, genah semetone dados panjak.

11Kenginan sawatek wong Israele pacang mireng paindikane punika, tur ipun sareng sami jaga ajerih, kantos tan wenten malih anak sane nglaksanayang paindikan sane dura cara sakadi asapunika.

12Yen semeton sampun jenek ring kota-kota sane kapaicayang ring semeton, antuk Ida Sang Hyang Widi Wasa, Widin semetone, menawi semeton jaga mireng gatra,

13mungguing wenten makudang-kudang anak sane jaat saking pantaran bangsan semetone sane sampun murang lampah, nuntun rakyate ring kotan ipune buat mabakti ring widi sane nenten naenin baktinin semeton.

14Yen semeton mireng orti sane sakadi asapunika, gelisang selehin, tur yening sawiakti wenten paindikan sane dura cara punika kalaksanayang,

15rarisang pademang sakancan rakyate ring kotane punika rauh ring sakancan ingon-ingonipune makasami. Sirnayang kotane punika, kantos basmi kerta.

16Ambil tur punduhangja ring alun-alun kotane punika sakancan arta branan jadmane sane ring kotane punika. Sasampune punika raris tunjel kotane punika miwah saluiring sane wenten irika makadados aturan ring ayun Ida Sang Hyang Widi Wasa, Widin semetone. Banggayang ipun dados gegumuk sane uug salami-laminipun, tur nenten dados malih kawangun.

17Sampunang pisan semeton malih ngambil barang-barang sane sampun katunjel punika, nanging patut sirnayang semeton. Malantaran asapunika bendu pidukan Ida Sang Hyang Widi Wasa pacang rered, tumuli Ida nyinahang sih pasuecan Idane ring semeton. Ida pacang kalintang sih sueca ring semeton, tur Ida nadosang semeton bangsa sane ageng, sakadi sane sampun janjiang Ida ring leluur semetone,

18yening semeton ninutin sakancan pituduh-pituduhe sane sampun uningayang tiang ring semeton ring rahinane puniki, tur nglaksanayang paindikan sane arsayang Ida.”

← Chapter 12 Chapter 14 →