Deuteronomy 34

Balinese

1Saking tanahe dangsah ring Moab Dane Musa raris munggah ka Gunung Nebo, ka muncuk Gunung Pisga dangin kota Yerikone. Irika Ida Sang Hyang Widi Wasa matujuhang ring dane sakuub jagate punika, inggih punika wewidangan Gilead ngalerang rauh ka kota Dan.

2Wewidangan suku Naptali, wewidangan suku Epraim miwah Manase, wewidangan Yehuda ngauhang ngantos rauh ring Segara Tengah.

3Tanggu kelod wewidangan suku Yehuda miwah tanahe dangsah sane nglajur saking Soar ngantos rauh ka Yeriko, inggih punika kota sane bek madaging wit korma.

4Ida Sang Hyang Widi Wasa tumuli masabda ring Dane Musa sapuniki: “Ene suba gumi ane janjiang Ulun teken Abraham, Ishak muah Yakub, ane lakar paicayang Ulun teken katurunannyane. Ulun nglugrain kita ngiwasin gumine ento nanging Ulun tusing nglugrain kita kema.”

5Kadi asapunika Dane Musa, parekan Ida Sang Hyang Widi Wasa, seda irika ring tanah Moab, sakadi sane sampun kasabdayang ring dane antuk Ida Sang Hyang Widi Wasa.

6Ida Sang Hyang Widi Wasa mendem dane ring satunggiling jurang ring tanah Moab, mapapas klawan kota Bet-Peor, nanging rauh mangkin nenten wenten anak sane uning genah kuburan danene sane sawiaktinipun.

7Rikala seda, Dane Musa mayusa satus kalih dasa warsa. Dane kantun siteng tur pangaksian danene durung slamur.

8Bangsa Israel mangelingin dane ring tanahe dangsah ring Moab tigang dasa rahina suenipun.

9Dane Yosua okan Dane Nun, sampun kabekin antuk kawicaksanan, santukan Dane Musa sampun nyelik dane buat ngentosin dane. Bangsa Israele satinut ring Dane Yosua, tur nglaksanayang pituduh-pituduh sane sampun kapaicayang antuk Ida Sang Hyang Widi Wasa, malantaran Dane Musa.

10Ring Israel tan wenten malih nabi sane sakadi Dane Musa. Ida Sang Hyang Widi Wasa sampun masabda marep-arepan ring dane.

11Tan wenten nabi sane sampun ngardi katawahan miwah praciri sakadi sane sampun kapituduhang antuk Ida Sang Hyang Widi Wasa ring Dane Musa, mangda kasinahang buat nglawan sang prabu ring Mesir, miwah paraprakanggen idane makamiwah sakuub jagat Mesire.

12Tan wenten nabi lianan, sane sampun mrasidayang ngardi paindikan-paindikan sane ageng tur madurgama sakadi sane sampun kakardi antuk Dane Musa ring ajeng bangsa Israele makasami.