1 Kings 20

Bemba

← Chapter 19 Jump to: Chapter 21 →

1Nomba Beni Hadadi imfumu ya bena Aramu alonganike ifita fyakwe fyonse. Afwaya ne mfumu ishakumwafwa amakumi yatatu na shibili (32) ishali na bakabalwe na maceleta, efyo aile no kuya shinguluka no kusansa Samaria.

2Atuma inkombe mu musumba ku mfumu Ahabu iya bena Israeli ati, “Ifi efyo Beni Hadadi alanda ukuti,

3‘Silifa na golide yobe nomba yandi elyo na bakashi bobe bonse na bana abasuma bandi.’”

4Imfumu ya bena Israeli yayasuka ati, “Nacibe ifyo fine usosele we mfumu. Ine wine, na fyonse ifyo nkwete fyaba fyobe.”

5Inkombe shaya bwela nakabili no kusosa ashiti, “Ifi efyo Beni Hadadi alanda ati, ‘Nacituma amashiwi yakufwaya silifa na golide, abakashi bobe na bana bobe.

6Lelo mailo, inshita nga ino ine, nkatuma bacilolo bandi ukwisa sokota mu ŋanda yobe iye sano na mayanda ya bacilolo bobe. Bali nokwisa pokolola fyonse ifyacindama no kusenda.’”

7Imfumu ya bena Israeli yaita abakalamba bonse aba mu calo no kubeba aiti, “Shimoneni uyu muntu ifyo alefwaya ifyongo. Ilyo acituma amashiwi yakumpoka abakashi na bana bandi, silifa na golide, nshacimukaanina.”

8Abakalamba na bantu bonse bayasuka ati, “Wisumina nangu ukumfwila ifyo alefwaya.”

9Elyo aeba inkombe shakwa Beni Hadadi ati, “Kebeni imfumu kanabesa amuti, ‘Umusha wenu naipeelesha ukucita fyonse ifyo wacibalilapo ukufwaya, nomba ici ica muku wabubili cena nafilwa.’” Inkombe shabwekelamo no kuya eba Beni Hadadi.

10Elyo Beni Hadadi atuma amashiwi na yambi kuli Ahabu ati, “Ala imilungu incitile icili conse nangufye cintu icabubi ubuli bonse, nga cakuti mukashala ulukungu mu Samaria ulwakupeela abantu ndi nabo cila muntu ulupi lumo.”

11Imfumu ya bena Israeli yayasuka aiti, “Kamwebeni ukuti, ‘Umuntu uwafwala inkwela talingene no wafuula.’”

12Beni Hadadi aumfwa amashiwi aya pa nshita ena ne mfumu ali nasho balenwa mu matenti yabo, elyo aeba abashilika bonse ati, “Ipekanyeni ukuya sansa.” Nabo bonse baya ipekanya ukusansa umusumba.

13Nomba pa nshita ine ilya kwaishile kasesema kuli Ahabu imfumu ya bena Israeli no kwisa landa ati, “Ifi efyo Yawe asosa ati, ‘Bushe namumona uyu mulongo uukalamba uwa bashilika? Nalaupeela mu minwe yobe ilelo, kabili uli nokwishiba ukuti nine Yawe.’”

14Ahabu aipusha ati, “Nga abalacita ifi ni bani?” Kasesema ayasuka ati, “Ifi efyo Yawe alanda ati, ‘Balumendo ba balashi bafitungu aba mu calo ebalacita ifi.’” Ahabu kabili aipusha ati, “Nga baleyamba ulubuli ni bani?” Kasesema ayasuka ati, “Nimwe bene.”

15Ahabu epakwita abalumendo ba balashi bafitungu abaume imyanda ibili na makumi yatatu na babili (232). Elyo alonganika na bena Israeli bonse amakana cine lubali (7,000).

16Bafuma ninshi akasuba kali pakati ka mutwe ilyo Beni Hadadi ne mfumu shimbi amakumi yatatu na babili (32) abalemutungilila bacili mu matenti balenwa.

17Abalumendo ba balashi bafitungu ebabalilapo ukufuma. Nomba Beni Hadadi alitumine inengu, elyo shabwela no kumweba ati, “Abantu abaume nabafuma mu Samaria bali mukwisa.”

18Ena asosa ati, “Nga baishila umutende, mubekate abatuntulu. Nangu nga baishila ukulwa inkondo, nalyo line mubekate abatuntulu.”

19Abalumendo ba balashi bafitungu babalilapo ukufuma mu musumba, na bashilika bakonka panuma,

20elyo cila umo alakoma umulwani wakwe. Pa mulandu wa ici abena Aramu babutuka, babakunkunika ku bena Israeli. Lelo Beni Hadadi imfumu ya bena Aramu yapusumuka yanina pali kabalwe pamo na bashilika ba pali bakabalwe.

21Imfumu ya bena Israeli yakonkanyapo ukufuma no kuya cimfya abamaceleta na ba pali bakabalwe, no kwipaya abalwani abengi abena Aramu.

22Panuma yakulwa, kasesema aisa ku mfumu ya bena Israeli no kusosa ati, “Ukoshe icifulo cobe elyo kabili utontonkanye bwino ifyo ufwile ukucita pantu uyu mwaka imfumu ya bena Aramu ili nokwisa kusansa kabili.”

23Pali ilya ine nshita, bacilolo ba mfumu ya bena Aramu bapanda imfumu amano abati, “Imilungu ya balya bantu milungu ya mu mpili, eco bakwatile amaka ukutucila. Lelo nga twabalwisha mu mawanga, lyena tuli nokukwatapo amaka ukubacila.

24Kanshi iwe ucite ici, fumya imfumu shonse mukucincisha ifita no kupyanikishapo abakalamba ba fita.

25Ukemye ifita fya nkondo nga filya fine fyalobele, ifyakuti kabalwe na kabalwe elyo iceleta peceleta, pakuti tukaye lwisha abena Israeli mu mawanga. Lyena cacine tuli nokubacila amaka.” Awe abasuminisha no kucita ukulingana na fyonse.

26Mu mwaka wakonkelepo Beni Hadadi alonganike abena Aramu, no kunina aya ku Afeki mukulwisha abena Israeli.

27Abena Israeli nabo balongana, bapeelwa ne fyakulya elyo baima ukuya bakumanya. Abena Israeli bacita inkambi shibili ukulungatana nabo, epo baikala kwati tumabumba twa mbushi ninshi abena Aramu beswilefye mpanga yonse.

28Umuntu wakwa Lesa aisa no kwisa eba imfumu ya bena Israeli ati, “ifi efyo Yawe alanda ukuti, ‘Pantu abena Aramu baletontonkanya ukuti Yawe e mulungu wa mpili, lelo te mulungu wa mawanga, nalapeela umulongo wa bashilika bonse aba mu minwe yenu, pakuti na imwe mwishibe ukuti nine Yawe.’”

29Pa nshiku cine lubali baikele nabalungatana, elyo na pa bushiku bwalenga cine lubali bakumana mukulwa. Abena Israeli baipaya abena Aramu amakana umwanda umo (100,000) uwa fita fya pa makasa mu bushiku bumo.

30Abashelepo bapusumuka baya ku musumba wa Afeki, nako ilinga lyaya wila pa bantu amakana amakumi yabili na makana cine lubali (27,000). Elyo Beni Hadadi abutukila mu kati ka musumba abelama mu muputule wa mu kati.

31Bacilolo bakwe bamweba abati, “Mona, natumfwa ukuti imfumu ya ŋanda yakwa Israeli yaluse. Leka tuye ku mfumu ya bena Israeli natufwala insalu shabulanda mu misana yesu, no kupomba imyando ku mitwe yesu. Nalimo kusuka yakwelela.”

32Bafwala insalu shabulanda mu misana yabo no kupomba intambo ku mitwe yabo, baya ku mfumu ya bena Israeli no kuya yeba ati, “Umusha obe Beni Hadadi atile, ‘Napapata mwinjipaya.’” Imfumu yaasuka aiti, “Bushe acili umutuntulu? Ni munyinane.”

33Abantu batontonkanya ukuti ici cena caba lishuko, bayangufyanya no kubuula amashiwi yakwe abati, “Ca cine Beni Hadadi ni munonko.” Imfumu yatila, “Kabiyeni kamuleteni.” Ilyo Beni Hadadi asokoloka, Ahabu amuninika mwiceleta lyakwe emo amusendela.

34Beni Hadadi apeela ubulayo ati, “Ndi nokubwesha imisumba yonse tata apokolwele kuli wiso. Kabili kuti wakuula amayanda yobe aya makwebo mu Damasiko nga filya tata acitile mu Samaria.” Ahabu asosa ati, “Pali uku kusuminishanya, nalakulekako.” Elyo basuminishanya, amulekako aya.

35Ukulingana nefyo Yawe akonkomeshe, umwana umo umwaume uwa bakasesema aebele umunankwe ati, “Nkoma ku lupanga lobe.” Lelo umunankwe akaana.

36Elyo kasesema alanda ati, “Pantu wafilwa ukumfwila Yawe, ilyofye walafuma pano inkalamo yalaya kwipaya.” Kabili cilya umuntu afumapofye aya, inkalamo yamusanga no kumwipaya.

37Kabili kasesema asanga umuntu umbi elyo amweba ati, “Napapata nkoma” elyo umuntu amukoma no kumucena.

38Elyo kasesema aya iminina mu mbali ya musebo alalolela imfumu. Aifungushanya, akaka ne citambala ku mutwe cakopokela pa menso.

39Cilya imfumu yalapita, kasesema abilikisha imfumu ati, “Umubomfi obe aciya ingila mu kati ka bulwi, umushilika umo acileta umulwani uwiketwe, elyo anjeba ati, ‘Sunga uyu muntu, nga aluba, cili nokuba umweo obe pa mweo wakwe, nangu ufwile ukufuta italanta limo ilya silifa.’

40Ilyo umubomfi obe acipamfiwa kuli ifi na kuli filya, uyu muntu aongoloka aluba.” Imfumu ya bena Israeli yasosa aiti, “Ubo bwine e bupingushi bobe, waipingula we mwine.”

41Elyo kasesema bwangu bwangu afimbula icisalu pa menso, ne mfumu ya bena Israeli yamwishiba ukuti ni umo pali bakasesema.

42Aeba imfumu ati, “Ifi efyo Yawe asosa, ‘Naukakula no kuleka umuntu uo nalefwaya ukuti afwe. Eico calaba ukuti umweo obe pa mweo wakwe, abantu bobe pa bantu bakwe.’”

43Imfumu ya bena Israeli yafumapo, yaya kwisano ku Samaria iyafitwa ku mutima kabili iyafulwa.

← Chapter 19 Jump to: Chapter 21 →