Jeremiah 32 — Bemba

1Yawe alandile kuli Yeremia ili shiwi mu mwaka walengele ikumi apo Sedekia atampile ukuba imfumu ya calo ca Yuda, kabili e mwaka wine walengele ikumi na cine konse konse (18) apo Nebukadinesa atampile ukuteeka ku Babiloni.

2Pali iyo ine nshita ninshi ifita fya mfumu ya ku Babiloni nafisansa umusumba wa Yerusalemu, na kasesema Yeremia ninshi balimwisalila kwisano mu lubansa lwa bakalinda ulwali kwisano lya mfumu ya mu Yuda.

3Imfumu Sedekia emo yamufungilile ilyo yamusangile no mulandu uwakusesema no kubila mbila ukuti Yawe nasosa ati, “Ine nalaswa mpeele uno musumba mu minwe ya mfumu ya ku Babiloni, no kupoka ikesa upoka.

4Nokuti Sedekia imfumu ya cino calo ca Yuda takamone pakupusukila ku bena Kaludea. Akaposwa ku mfumu ya ku Babiloni, bakashimpana nayo amenso, no kulanda nayo pa kanwa.

5Nokuti Sedekia bakamusenda ku Babiloni, no kwikala eko akekala ukushintafye napo ine ne Yawe Lesa nkamukandila. Nangufye alwishe shani abena Kaludea, ala nakalya aleicushafye. Efyasosa Yawe.”

6Yeremia nao alilandile ati, “Ishiwi lyakwa Yawe lyaishile kuli ine

7‘Hanameli mwana Shalumu nokolume alaswa ese uko uli, kukwisa kwipusha pakuti niwe ushite ibala lyakwe ilyo akwata ku Anatoti, pantu niwe wakwata ne nsambu yakulishita.’”

8Ne cacine ukulinganafye nomo Yawe anjebele, awe na umufyala wandi aisa umo ndi mu lubansa lwa bakalinda, anjeba ati, “We, shita ibala lyandi lilya nakwata ku Anatoti mu citungu ca bena Benjamini, pantu iwe uli munyinanefye pakati, kabili niwe wakwata ne nsambu yakulishita ne yakulisunga. Ale shitafye.” Na ine epakwiluka ukuti kanshi eulya mulandu Yawe aciba ankonkomesha.

9Kanshi na ine epakushita ibala kuli Hanameli umufyala wandi, namulipila ne ndalama isho ampingwile, indalama amashekeli ya silifa ikumi limo na cine lubali (17).

10Nalemba na pali kalata ishina lyandi pakushininkisha umulandu, namupeta, naumapo ne nshimbi, naita na bakambone abakusangwako, awe napima ne ndalama pa cipimo.

11Elyo nabuula bakalata bonse babili abalipo ifyabukwebo bwesu, emukuti umo uwauminwepo inshimbi umwali icumfwano, elyo na kalata mubiye uwalipo amafunde palwa kushitishanya lelo ena tapetelwe iyoo,

12awe napeela bakalata bonse babili kuli Baruki mwana Neriya, Baruki wine e mwishikulu Maaseia. Namupeelela pa menso ya mufyala wandi Hanameli, na pa menso ya bakambone abalembelepo nabo amashina yabo pali bakalata ba fya bukwebo bwesu, na pa menso ya bena Yuda bonse abaikele panshi mu lubansa.

13Elyo pa menso yabo bonse naeba Baruki nati,

14“Ifi efyasosa Yawe umwine wa fita, Lesa wakwa Israeli ati, ‘Nakupeela icebo icakubuula uyu kalata ominwepo inshimbi uwa bukwebo bwesu no kubuula kalata mubiye ushapetwa uulembelwepo fimo fine, no kuya babika mu kamutondo ke bumba pakuti bakasungwe pa nshita iyitali.’

15Pantu Yawe umwine wa fita, Lesa wakwa Israeli nasosa ukuti, ‘Amayanda, ne filime, na mabala ya myangashi, fikalashitwa nakabili muli cino calo.’”

16Ilyo ine napwile ukupeela Baruki mwana Neriya bakalata ba fya bukwebo bwesu, nalilumbenye Yawe nati,

17“We Imfumu Yawe, niwe wabumba imyulu ne calo ku maka yobe na ku bulamba bobe ubushaikulila, iwe tapaba cakukwansha iyoo.

18Ulabelela abantu amakana na makana uluse, lelo kwena ulalimuna abantu pa mulandu wa kubifya kwa bashibo. Iwe uli Lesa Mukulu, kabili uli Lesa Wamaka, ne shina lyobe niwe Yawe umwine wa fita.

19Ifyo iwe upanga ukucita, ala fyakupapa, nefyo iwe ucita, ala fyamaka. Iwe ulamonafye fyonse ifyo abantu bacita, kabili ulabalinganya bonse umo umo pa miikalile yabo na pa micitile yabo.

20Niwe wacitile ifipeshamano ne finjelengwe mu calo ca Egupto. Na nombaline ucili uleficita ukushinta na pali buno bushiku bwine ku bena Israeli, na ku bantu ba mishobo imbi yonse, icakuti nomba no kwishibikwa nawishibikwa mpangafye yonse.

21Pakufumya abantu bobe abena Israeli mu Egupto, wacitile ifishibilo ne fipeshamano, ku bulamba bobe na ku kuboko kobe ukwafunguluka, no kutiinya ukukalamba nganshi.

22Niwe wabapeele ne calo cino icikankala kabili icifumfumukamo umukaka no buci, nga mulya mwine walaile bashibo.

23Nomba ilyo baishile muli cino calo no kucipoka, bena balikene ukulakuumfwa, balakaana no kulakonka amafunde yobe. Pafyo wabakonkomeshe ukulacita, tabacitilepo nelyo cimo. E mulandu wine walenga nokuti ubaponeshe ifi finkunka fyonse.

24“Tepapa nomba abena Kaludea nabatulamika ifimina fya maloba ukushinguluka umusumba pakuti baupoke, no kusansa nabausansa. Inkondo ne cipowe ne cikuko efyalalenga ukuti umusumba upokwe ku bena Kaludea abeshile mukuusansa. Nauimwena we Mfumu ukuti fyonsefye ifyo wasosa, awe nomba fyafikila.

25We Mfumu Yawe, niwe unkonkomeshe ukushita ibala pa menso ya bakambone, nangu kwena abena Kaludea balaswa bapoke uno musumba.”

26Elyo ishiwi lyakwa Yawe lyaishile kuli Yeremia aliti,

27“Mona, ine nine Yawe, Lesa wa bantu bonse. Tapaba nangu cimo ico ine ningafilwa ukucita.

28Kanshi ine ne Yawe efyo nsosa. Nalabuula uno musumba, mpeele Nebukadinesa imfumu ya ku Babiloni, ku bena Kaludea, ebalaupoka.

29Abena Kaludea abalelwisha uno musumba, balaisa oca. Balaisa ocela kumo kwine na mayanda ayo abantu bandi bankalifishamo umutima pakulafutumwina Baali ububani pa mitenge yayako, no kulatuulilapo imilungu imbi imbi imituulo ya fyakunwa.

30Umutundu wa bena Israeli na bena Yuda tabacitapo ifintu fimbi kanofye ukucita ifibi pa cinso candi ukufuma ku bwaice bwabo. Abena Israeli ine balankalifya umutima pa mulandu wa tulubi uto bapanga ne minwe yabo. Efyasosa Yawe

31Uno musumba walinkalifya umutima no kundetela icipyu ukutulafye apo wakuulilwa. Ine nomba mpangilefye ukuonaula,

32pa mulandu wa fibi fyonse ificitwa na bena Israeli na bena Yuda ifyankalifya umutima. Abaficita ni bashamfumu babo na bacilolo babo, na bashimapepo babo na bakasesema babo, na bantu ba muli cino calo ca Yuda, na bena Yerusalemu bene.

33Aba bantu ine balimfutatila, bakaana no kundolesha. Nangu ine nabikapofye ukulabafunda, awe bena bakaanininafye ndai ukulaŋumfwa no kuleka imisango yabo iyibi.

34Na mu ŋanda yakumpepelamo iye shina lyandi iyo bankuulila, namo mwine balibikamo utulubi utwabunani, no kuikowesha balikowesha.

35Mu mupokapoka wa Beni Hinomu balikuulilamo Baali ifibumbili fye lambo, apakocela abana babo abaume na banakashi pakulabatuula ilambo ku mulungu Moleki. Ine nshabapeela cebo cakucita ifi iyoo, kabili tacatala acisa na mu mano yandi, icakuti ntontonkanye ukuti aba bantu kuti bacitapo icintu cabipisha ifi, no kulenga abena Yuda balebifya.”

36Yawe, Lesa wakwa Israeli, alisosele ati, “Yeremia, iwe naweba abantu ukuti inkondo ne cipowe ne cikuko efyalalenga ukuti imfumu ya ku Babiloni ipoke uno musumba, lelo kwena umfwa kuno ifyo ine nalalanda.

37Ine nkalonganya abantu, nkabafumya mu fyalo fyonse umo nabaposele cipyu cipyu kabili cikali cikali. Nkababwesesha kuno kwine, no kuleka bakaleikalila ku matwi tondolo.

38Lyena bakalaba abantu abandifye, na ine nkalaba Lesa uwabo.

39Nkalenga bakalefwayafye no mutima umo icintu cimo ceka mu miikalile yabo, emukuti icakulankwatila akatiina lyonsefye, neci cintu cikalabawamina abene, cikalawamina na bana babo abakalabakonkapo.

40Ine nkapangana nabo icipangano ca pe icakutila, ine nshakatale ndeka ukulabacitila ifisuma. Nkalenga nokuti bakalenkwatila akatiina mu mitima yabo, epakuti nabo bekatala abansangukila nakabili.

41Ine nkalasansamuka pakubabombela ifisuma, nkabika umutima wandi onse no mweo wandi onse pakubateeka muli cino calo, pakuti emo bakaleikalilila pe.”

42Ici ecasosa Yawe ukutila, “Ngefi fine ndetele aba bantu ishamo ilishaikulila, efyo nkabaletela ne fintu fyonse ifisuma ifyo ine mbalaile.

43Iwe Yeremia nusosa ukuti cino calo cikaba nga matololo umushaikala bantu nangufye inama, nokuti abena Kaludea ebalacipoka, ee, lelo kwena amabala yakalashitwa nakabili muno muntu.

44Abantu bakalayashita, na pali bakalata bakushitilapo abantu bakalalembapo amashina yabo pakushininkisha umulandu, bakalata bakalapetwa no kulaumwapo ne nshimbi, na bakambone nabo bakalalembapo amashina yabo. Noyu musango ukulacitika mu citungu ca bena Benjamini, na mu mishi iyashinguluka Yerusalemu, na mu misumba iya muli cino calo ca Yuda, na mu mishi ya mu calo ca mpili, na mu mishi ya mwishika lya mpili, na mu mishi ya mu matololo ya Negebu mwine, pantu ine nkabwesesha abantu ishuko muli cino calo cabo.” Efyasosa Yawe.