Jeremiah 36

Bemba

← Chapter 35 Jump to: Chapter 37 →

1Mu mwaka walengele ine apo Yehoyakimu mwana Yosia atampile ukulateeka icalo ca Yuda, ili shiwi lyaishile kuli Yeremia ukufuma kuli Yawe aliti,

2“Fwayapo icitabo icipombwa cimo, ulembemo fyonse ifyo ine nakweba iwe palwa bena Israeli na bena Yuda na palwa bantu ba mishobo yonse. Ulembemo ifyo ine nakweba, ukutulafye apo natampile ukulanda nobe ilyo Yosia ali imfumu ukushinta na lelo.

3Abena Yuda nga baumfwa ifinkunka fyonse ifyo ine napanga ukubaponesha, nakalimo lyena kuti baleka imisango yabo iyibi, ninshi na ine kuti nababelelako uluse ku fyabupulumushi fyabo na ku fyabubifi fyabo.”

4Kanshi Yeremia nao epakwita Baruki mwana Neriya, amweba nokuti alembe fyonse ifyo Yawe aebele Yeremia. Awe nao Baruki epakulalemba amashiwi yonse mu citabo.

5Elyo Yeremia aeba Baruki ati, “Ine balindesha ukuya mu ŋanda yakwa Yawe.

6Kanshi niwe ndefwaya ukuti ukayemo pa bushiku bwakufunga ukulya, ukaye mukulaikatisha pakubelenga aya mashiwi ayali mu citabo, epakuti bakomfwe fyonsefye ifyo Yawe anjeba ine, umo mwine nkwebele ukuyalemba. Ukaye sala pa ncende pamo apakuti abantu bonse abakaba mu ŋanda yakwa Yawe bakalekumfwa, pamo pene na bena Yuda bonse abakatula mu misumba yabo.

7Kusuka nakalimo abantu bapapata Yawe, baleka ne misango yabo iyibi, pantu Yawe alipangila aba bantu ukubacitapo cimo mu bukali kabili mu cipyu.”

8Kanshi nao Baruki mwana Neriya epakuya mu ŋanda yakwa Lesa, abelengela na bantu amashiwi yakwa Yawe ayali mu citabo icipombwa, ukulinganafye nomo kasesema Yeremia amwebele.

9Ni mu mwaka walengele isano, mu mweshi walenga pabula, apo Yehoyakimu mwana Yosia atampile ukuteeka icalo ca Yuda, abantu bonse abali mu Yerusalemu na bonsefye abafumine mu misumba ya mu Yuda balifungile ukulya ku cinso cakwa Yawe pa nshita iyasontelwe.

10Elyo nao Baruki alababelengela amashiwi yonse ayali mu citabo icipombwa ayo Yeremia asosa, na bantu bonse balakutika kuli Baruki. Pakubelenga Baruki ali mu ŋanda yakwa Lesa, mu muputule wakwa Gemaria mwana Shafani kalemba wa mfumu. Umuputule wakwe wabelele mu lubansa, lwa pamulu pa mpongolo ipya iyakwingililapo mu ŋanda yakwa Yawe.

11Mikaya mwana Gemaria, uwali mwana wakwa Shafani, ilyo aumfwa uko Baruki apwisha ukubelenga amashiwi yonse ayakwa Yawe ayali mu citabo,

12atentemukila na kwisano mu muputule wakwa kalemba wa mfumu, umwalongene bacilolo bonse. Mwali Elishama kalemba wa mfumu, na Delaya mwana Shemaiya, na Elinatani mwana Akibo, na Gemaria mwana Shafani, na Sedekia mwana Hanania, na bacilolo bambi bonse.

13Elyo Mikaya alabashimikilako amashiwi yonsefye ayo aciba omfwile kuli Baruki, ilyo ali alebelengela abantu nabo ninshi baleumfwa.

14Elyo bacilolo bonse babuula Yehudi mwana Netania, uwali mwana Shelemia, uwali mwana wakwa Kushi, bamutuma kuli Baruki kukuya mweba ukuti ese ne icitabo ico ali alebelengelamo abantu. Awe nao Baruki mwana Neriya abatwalila ne citabo ico ali naco.

15Elyo bacilolo nabo bamweba abati, “Ikala apa, utubelengeleko na ifwe ifili mu citabo.” Elyo nao Baruki atendeka ukubelenga.

16Kutifye cilya baumfwa aya mashiwi yonse, awe balaloleshanyafye mwenso mwenso, elyo baeba na Baruki abati, “Uyu mulandu ifwe tuli nokuufisha ku mfumu Yehoyakimu.”

17Elyo baipusha Baruki abati, “Iwe twebeko, bushe iwe cali shani pakuti ulembe ifi fyonse? Bushe ni Yeremia ewalekweba ifyakulemba?”

18Nao Baruki abasuka ati, “Ee, ni Yeremia ewalenjeba ukulemba aya mashiwi yonse, na ine epakuyalemba muli ici cine citabo kuli inki.”

19Elyo bacilolo baeba Baruki abati, “Iwe pamo na Yeremia kabelameni. Mwileka muntu nelyo umo eshibe uko muleya belama.”

20Bacilolo bashile babika icitabo icipombwa mu muputule wakwa Elishama kalemba wa mfumu, baya na kwisano, baya shimikila ne mfumu amashiwi yonsefye.

21Elyo imfumu nayo yatuma Yehudi ukuya buula icitabo. Nao aya cibuula mu muputule wakwa Elishama, aisa mukulabelengela ne mfumu na bacilolo abaiminine mupepi nayo.

22Cali ni mu nshita yampepo, umweshi wa pabula, ninshi imfumu ileonta no mulilo mwisano lyaiko ilyo yalekukilamo mu nshita yampepo.

23Nomba Yehudi aletifye cilya apwa ukubelenga pa mapepala yatatu nangu yane, imfumu nayo ninshi yayaputulamo ku kamwele, yayaposa na pa mulilo. Yalacitafye ifyo fine casuka ne citabo consefye capwa ukupya.

24Imfumu na bacilolo baiko bonse nelyo baumfwile umulandu onse, awe tabaiketwe na mwenso, nangu ukulepula ifyakufwala fyabo pakulanga ukuti balapila nakalya.

25Nangu Elinatani na Delaya na Gemaria bapapete imfumu pakuti ioca icitabo, nakalya tayabaposeleko na mano iyoo.

26Elyo imfumu yakonkomesha Yerameli umwana wa mfumu, na Seraya mwana Ashrieli, na Shelemiya mwana Abudeli pakuti ebo bekate kalemba Baruki na kasesema Yeremia. Nomba Yawe nao abafisa.

27Ilyo imfumu yaocele icitabo umwali amashiwi ayo Yeremia aebele Baruki ukulemba, ishiwi lyakwa Yawe lyaishile kuli Yeremia aliti,

28“Fwailapo icitabo cimbi icipombwa, ulembemo na mashiwi yalya yenefye yonse ayali muli cilya citabo ico Yehoyakimu imfumu ya bena Yuda yaocele.”

29Elyo Yawe aeba Yeremia ukweba imfumu Yehoyakimu amashiwi na yambi ayakutila, “Ifi efyasosa Yawe ati, ‘Iwe walioca icitabo, kabili waliipusha Yeremia ico alembele ukuti imfumu ya ku Babiloni ikesa kukonaula cino calo, no kwisa ipaululamo abantu ababamo kumo kwine ne nama ishabamo.

30Kanshi ine ne Yawe Lesa ndekweba iwe we Yehoyakimu imfumu ya bena Yuda ukuti, pali bamwano abaume tapakabe nelyo umo uukakupyana pa cipuna cakwa Davidi. Icitumbi cobe cikaposwa panse pa kasuba, na pa mpepo mu nshita ya bushiku.

31Ine nkakulimuna iwe, nkalimuna na bamwano pamo pene na bacilolo bobe, pa mulandu wa fyabupulumushi ifyo imwe bonse mucita. Imwe pamo pene na bena Yerusalemu na bena Yuda, tamumfwa nakalya, kanshi na ine nomba imwe bonsefye nkamuponesha ifinkunka fyonse ifyo nasosele ukuti nkacita.’”

32Elyo Yeremia afwayapo icitabo cimbi, apeela kalemba wakwe Baruki, nao Baruki alembamo amashiwi yonsefye ayo Yeremia alemweba ukulemba. Alembamo amashiwi yalya yene yonsefye ayali muli cilya citabo ico Yehoyakimu imfumu ya bena Yuda yaocele. Yeremia alundamo na mashiwi yambi ayengi aya musango umo wine.

← Chapter 35 Jump to: Chapter 37 →