1 Chronicles 11

Edo ((E Baibol Ẹdo) Version 1996)

← Chapter 10 Jump to: Chapter 12 →

1Ivbi Izrẹl hia keghi bu e Devid gha rrie Hibrọn, iran tama rẹn wẹẹ, “Esagiẹn ọkpa ma gba khin.

2Vbe ẹghẹ ne ọ gberra, uhin vbe Sọl he ye re ọba ima, wẹ ọ re ọ gha viọ ivbi Izrẹl ye okuo, e Nọyaẹnmwa Osanobua ruẹ keghi yan tama ruẹn wẹ u gha su emwa na, u ghi gha re ogie iran.”

3Rhunmwuda ọnii, avbe ekaolotu ivbi Izrẹl hia keghi bu e Devid gha die Hibrọn, ọ na yo ulamwẹ ne iran, iran tue ori ye ọre uhunmwu iran keghi ma ẹre ọba Izrẹl zẹ vbene Nọyaẹnmwa la unu e Samuẹl tae zẹẹ.

4E Devid ne ọba kevbe ivbi Izrẹl hia keghi mu okuo gie Jerusalẹm, e Jebus ọ re a tie ẹre ẹghẹ nii, ivbi e Jebus ne ivbi ọmotọ he ye rre evba.

5Ivbi e Jebus keghi tama e Devid wẹẹ, “Ẹ i ra sẹtin la adesẹ ore ẹvbo,” sokpan, e Devid keghi khọn mu e Zaiọn ne a gbe odin gaa, ọ re a na do gha tie ẹre “Ẹvbo e Devid.”

6E Devid keghi kha wẹẹ, “Ọmwa ne ọ rhirhi ka gbe ovbi e Jebus ọ re ọ ra gha re ọkaokuo nọkhua ọghe ivbiyokuo!” E Joab ne a tie iye ẹe Zeruaia keghi ke odaro igbinna nii, ọ re ọ na do gha re ọkaokuo nọkhua.

7Rhunmwuda ne Devid na ya yin ẹvbo ne a gbe odin gaa nii,

8a na do gha tie ẹre, “Ẹvbo e Devid.” Ọ keghi dọlegbe bọ ẹvbo nii, ọ na suẹn ọnrẹn vbe ehe ne a na ya ekẹn ran uye vbe obọ agọ ọghe oke nii, e Joab keghi ya khọn ehe ni ghi dekẹe vbe ẹvbo nii fo.

9E Devid kegha wegbe yọ ẹdẹgbegbe, rhunmwuda, e Nọyaẹnmwa Noghodua deba ẹre.

10Eni avbe ivbiyokuo e Devid ni hin usi ọ re ena khin, iran na ọ re ọ yaba ivbi Izrẹl nekpa, ru iyobọ ne ẹẹn ne ọ rriọba zẹ vbene Nọyaẹnmwa kha re, iran kevbe ya arriọba ẹre igie muotọ.

11Ne okaro vbọ ọrọre Jasiọbim ne uniẹn Hakmọn, ne ọ gha re ọkaolotu “Iran ne Eha.” Ọ keghi ya umozo gu arhin iyisẹn yan uri gbinna vbe okuo ọkpa, ọ na gbele iran hia a.

12Ne ọ ghi zẹ lele “Iran ne Eha,” ni hin usi kegha re Eliaza ne ovbi e Dodo ne ovbi uniẹn Ahọ.

13Rẹn mudia ke Devid gu ivbi e Filistin gbinna vbe okuo e Pas Demim. Ugbo ọka rẹn gha ye vbe ivbi Izrẹl vẹ kua vbe okuo.

14Ẹre irẹn vbe emwa rẹn na mudia vbe adesẹ ugbo nii, iran na gu ivbi e Filistin gbinna. E Nọyaẹnmwa keghi rhie a khọnmiotọ ne ẹẹn.

15Ọ ghi sẹ ẹdẹ ọkpa, eha vbe uwu avbe iyokuo ọgban nii hin usi sẹ kegha rrie okuta nọkhua ne Devid na gha rre ọkpẹn uvun okuta Adulam, vbe avbe ivbiyokuo e Filistin bu agọ ye Iya e Refeim.

16Vbe ẹghẹ ne a kha na, e Devid kegha rre uhunmwu oke ne a gbe odin gaa. Ivbi e Filistin eso keghi mu e Bẹtlẹhẹm.

17Ẹmwẹ owa keghi gha da e Devid, ọ keghi kha wẹẹ, “Vbọ rrọọ nian akpawẹ, I gha miẹn ọmwa ne ogha sa amẹ uhae ne ọ rre onurho e Bẹtlẹhẹm gun mwẹ wọn.”

18Ivbiyokuo ni hin usi eha keghi ya uhunmwu ha agọ ivbi e Filistin gberra, iran keghi sa amẹ vbe uhae nii, iran na mu bu e Devid gha dee. Sokpan, ọ ma wọn ẹn, ọ keghi hihiẹ ọe ku otọ zẹ vbe emwi izọ ese ghe Nọyaẹnmwa,

19ọ wẹẹ, “Ohan i gun mwẹ wọn ọna, te ọ ra yevbe ne a wọn esagiẹn emwa na ni rhie uhunmwu da ẹbe.” Rhunmwuda ọnii, ọ ma wọẹn. Iwinna udinmwẹ ne ivbiyokuo eha ni hin usi winnaẹn ọ re ọnii khin.

20Abisiai ne ọtẹn e Joab ọ re ọ gha re ọkaolotu iran ne “Ọgban Ni hin usi.” Ọ keghi ye asoro ẹre gu arhin iyisẹn eha (300) gbinna, ọ na gbele iran hia a, ọ na do hin usi sẹẹ vbe uwu ẹbu “Iran ne Ọgban,” ọ na do gha re olotu iran.

21Rẹn ọ re ọ hin usi sẹẹ vbe uwu “Iran ne Ọgban,” sokpan ọ ma hin usi vba “Iran ne Eha.”

22E Banaia ne ovbi e Jehoiada ne ovbi ẹvbo ne a tie ẹre Kabzil kevbe gha re ovbiyokuo ne ọ hin usi. Emwi udinmwẹ ni bun ọ re ọ ru, uwu ne ọ na gbele ivbiyokuo e Moab eva ni hin usi. Ẹghẹ ọkpa, ọ na la uwu uvun vbe ẹghẹ ne esia ya dee, ọ na ya gbe oduma.

23Ọ kevbe gbe ovbi Igipt ọkpa ne gẹdẹgbẹẹ ne ọ sẹ omwa emita ihinrọn vbe ukhiọnmwẹ vbe utanmwẹ, ọ na vbe mu asoro nọkhua mwẹ ne ọ ya gbinna. E Benaia keghi ya orhokhua yan rẹn, ọ na sanmwẹ ọre asoro hin obọ ovbi Igipt ni rre, ọ na ya gbe ẹe rua.

24Ena ọ re emwi udinmwẹ ne Benaia ru khin ọmwa ne ọ vbe re ọkpa vbe uwu “Iran ne Ọgban.”

25Rẹn kakabọ hin usi sẹẹ vbe uwu ẹbu “Iran ne Ọgban” sokpan ọ ma hin usi vba “Iran ne Eha.” E Devid keghi ya ẹe ru ọkaolotu iran ne ọ ya khẹ egbe.

← Chapter 10 Jump to: Chapter 12 →