1 Chronicles 26

Edo ((E Baibol Ẹdo) Version 1996)

← Chapter 25 Jump to: Chapter 27 →

1Iran ni re Ọgbalegbe Ọgua Osa vbe avbe Livai, vbene a ya wa iwinna ne iran ọ re ena khin: Iran ni ke uniẹn Kora rre kegha re Mesielemaia ne ovbi e Kore ne ẹgbẹe Asaf.

2Rẹn kegha mwẹ emọ ihinrọn, iran ọre ena khin zẹ vbene iran ya re ọdiọn: e Zẹkaraia, e Jediaẹl, e Zebadaia, e Jatmiẹl,

3Ẹlam, e Jehohanam, kevbe Eliehoenai.

4Ne usun ọ re ọ vbe ye ighẹ Obẹd Idọm ne Osanobua ye emọ ikpia erẹnrẹn fiangbe. Iran ọ re ena khin vbene iran ya re ọdiọn: Siemaia, e Jehozabad, e Joa, e Saka, e Netanẹl,

5Amiẹl, Isaka kevbe Puletaia.

6Ovbi Obẹd Idọm ne ọdiọn ighẹ Semaia kegha mwẹ emọ ikpia ehan, ena ọ re Otni, e Refaẹl, Obẹd, Elzabad, Elihu kevbe Semakaia. Emwa kpataki iran gha khin vbe ẹgbẹe iran rhunmwuda ne iran na rẹn aru, te Osa wa mobọ ya emwi we eva ni kiekie.

8Ẹgbẹe Obẹd Idọm ọkpa kegha mwẹ arhin eva yan iyeha (62) vbe uwu emwa ni rẹn emwi dinmwi, vbe iwinna na.

9Ẹgbẹe Mesielemaia kegha mwẹ eva irrọvbugie vbe uwu emwa ni rẹn emwi dinmwi na.

10Usun emwa ni ke ẹgbẹe Merari rre ọ re ọ ye ighẹ Hosa, rẹn kegha mwẹ emọ ikpia isẹn ni re Simri (erhae keghi ya ẹe ru ọkaolotu, a gha rhe miẹn wẹ ẹ i re irẹn ọrọre ọdiọn.)

11E Hilkaia, e Tebalaia kevbe Zẹkaraia. Ivbi ẹgbẹe e Hosa hia ni gha re ọgbalegbe Ọgua Osa kegha re iwera.

12A keghi ghae avbe ọgbalegbe Ọgua Osa ye otuotu zẹ vbe ẹgbẹe edọmwadẹ ọghọe a kevbe wa iwinna ne iran vbe uwu Ọgua Osa zẹ vbene a vbe wa ne avbe Livai nekpa.

13Dọmwadẹ ẹgbẹe, vbene ọ rhirhi yan kanmwa sẹ, uta ọ re iran yan ya zẹ onurho ne iran gha gbearoghe vbọ.

14Uta ọghe Sielemia keghi mu onurho odẹ ahọ, vbene ọghe Zẹkaraia ne ovbi ẹre (ọmwa ne ọ bu ude esi vbe ẹghẹ hia) na mu onurho odẹ okuọ.

15Onurho odẹ ekẹn kegha re ọghe Obẹd Idọm, a na wẹ ne ivbi ẹre gha gbe aro ghe avbe aza.

16A keghi mu onurho orrie ne Siupim kevbe Hosa deba Onurho Sialẹkẹt ne ọ rre odẹ ne ọ ke odọ. A kegha ẹghẹ ne a khẹ odẹ la vberriọ wẹ a ghi gha ya emwa rọ emwa vbe ẹghẹ.

17Vbe odẹ ahọ vbọ, arhin ehan ọ re ọ gha khẹ odẹ ẹdẹgbegbe, enẹ vbe odẹ okuọ kevbe enẹ vbe odẹ ekẹn. A keghi viọ ọgbalegbe enẹ ye aza ẹdẹgbegbe. Eva vbe aza ọkpọkpa.

18Ọgbalegbe enẹ kegha rre ọkpẹn ugha odẹ ahọ vbe odẹ ne a la ye, eva kegha rre nene ugha tobọ ẹre.

19Erriọ ọ re a ya ghae iwinna abodẹ ne uniẹn e Kora kevbe Merari.

20Iran eso ọvbehe vbe avbe e Livai ne ihua iran kegha gbearoghe aza kevbe avbe ehe ne a viọ emwi ne a ya yo imuohan gie Osanobua yi.

21E Ladan ne ọ vbe gha re ọkpa vbe uwu avbe ivbi e Gẹsiọn, keghi gha re erha odede ọghe ẹgbẹe ughughan ni bun, deba ẹgbẹe ọghe Jẹhiẹl ne ovbi ẹre.

22Ivbi e Ladan ne eva nekpa, ighẹ Zetam kevbe Joẹl, ọ re ọ gha gbearoghe aza kevbe ehe ne a hẹ emwi yi vbe Ọgua Osa.

23A keghi vbe wa iwinna ne ivbi unjẹn ọghe Amram, Izia, Hibrọn kevbe Uziẹl.

24E Siebuẹl ne ovbi uniẹn e Mosis kegha re ọkaolotu nọkhua ne ọ gbearoghe aza igho ọghe Ọgua Osa.

25Eliezẹ keghi la obọ ọtiọnrẹn ne okpia ighẹ Gẹsiọm gha re ọtẹn Sielomit. Elaisia ọ re ọ biẹ Rehabaia ne ọ biẹ Jesia, ne ọ biẹ Joram, ne ọ biẹ Zikri ne ọ biẹ Selomit.

26E Sielomit kevbe ivbi ẹre ọ re ọ gha sin iran ẹro ighẹ avbe emwi ne Devid ne ọba ya mu ohan gie Osanobua kevbe dọmwadẹ ọba ẹgbẹe, avbe ekaolotu avbe ẹwae kevbe avbe ivbiyokuo.

27Iran keghi viọ emwi eso ne iran fu hẹẹ vbe okuo, iran na ya iran fi ohan ne iran gha lo iran vbe Ọgua Osa.

28E Sielomit kevbe ẹgbẹe ọre, ọ re ọ gha gbe aro ghe avbe emwi ne a ya fi ohan ne a gha lo vbe Ọgua Osa, ya deba avbe emwi ne Samuẹl ne akhasẹ hẹ rre, ne a Sọl viọ rre kevbe ne Abna ne ovbi e Nẹẹ, kevbe ne Joab ne ovbi e Zeruaia.

29A keghi zẹ vbe uniẹn ọghe Izia, e Kienanaia kevbe ivbi ẹre, ne iran gha wa emwa iwinna, ne iran gha gbẹnnẹ emwi ye otọ kevbe ne iran gha dọlọ ẹzọ ne ivbi Izrẹl.

30Vbe ivbi uniẹn Hibrọn a keghi zẹ Hasiabaia, kevbe etiọnrẹn iyisẹn ehai-rrọvbugie (1,700) emwa ni wa sekpe, a na wẹ ne iran gha guan ye ẹmwẹ emwi ne a gho kevbe ọghe emwa kẹkan vbe otọe Izrẹl vbe odẹ orrie ọghe Ẹzẹ Jọdan.

31E Jeraia ọre ogha re ọkaolotu ivbi uniẹn e Hibrọn. Ọ ghi rre ukpo iyeva ne Devid rriọba, a keghi do gualọ otọ vbene ivbi uniẹn e Hibrọn ya dee hẹ. A keghi do miẹn ivbi uniẹn na eso ni wa re ivbiyokuo ni hin usi vbe iran rre Jazẹ vbe otọe e Giliad.

32E Devid ne ọba keghi hannọ arhin iyisẹn ehairrọvbọgban (2,700) ne ọkaẹgbẹe ni sẹ ekpe vbe uwu avbe etẹn Jeraia. ọ na hẹ iran yọ ne iran gha gbearoghe ẹmwẹ emwi ugamwẹ kevbe ẹmwẹ ẹvbo kẹkan vbe otọe Izrẹl ne odẹ ahọ Ẹzẹ Jọdan — ena kegha re otọe Riubẹn, Gad kevbe Manasẹ ne Owẹn Owiẹ.

← Chapter 25 Jump to: Chapter 27 →