Isaiah 16

Edo ((E Baibol Ẹdo) Version 1996)

← Chapter 15 Jump to: Chapter 17 →

1Emwa e Moab keghi mu oteghe ohuan ke Sẹla rre, ne ọ rre ato ya haa oko gie iran nikhaemwisẹ vbe Jerusalẹm.

2Iran keghi mudia vbe ọkpẹn Ẹzẹ Anọn iran na gha gbe ọghẹghẹ ghe aro ghe iyeke zẹvbe ahianmwẹ ne a khulo hin oko iran rre.

3Iran tama emwa e Juda wẹẹ, “Tama ima emwi ne ima gha ru. Degue ima zẹvbe erhan ne ọ gbe irhu vbe ogiavan, ne u gie ima lẹre ye irhu ruẹ. Emwa ni lẹẹ hin owa rre ma khin, viọ ima lẹre ye ehe ne ọmwarhọkpa i ra na miẹn ima.

4Gie ima di otọ uwa ya. Wa degue ima ne obọ iran ni ho ne iran fuẹn ima an ghẹ gba ima.” (A zẹ ọmwa kpokpo kevbe ọfuan gha sẹ ufomwẹ, iran ni vbe mu ẹvbo rhia gha kpao).

5Ọkpa vbe ivbi e Devid gha rriọba, ọ gha ya ẹkoata kevbe aho khaemwisẹ yan emwa nii. Obọ gha kẹ ọre vbe emwi nọgbae ne a ru, ọ gha vbe miẹn wẹ vbene emwi kei yi ọ re a ru ẹẹ.

6Ivbi e Juda khare wẹẹ, “Ma họn vbene ivbi e Moab hio hẹ, ma rẹnrẹn ighe iran tọn egbe mu, iran ghi gha ya obọ rra ẹwẹe, sokpan, orhuọ ne iran rhuọ, ifianyanegbe nọ.”

7Ivbi e Moab gha viẹ rhunmwuda ọlọghọmwa ne iran mwẹ. Iran hia gha viẹ vbe iran a ye ẹre rre ighe evbare esiesi ne iran te re vbe Kẹ Hẹrẹs. Ọna gha wa ya egbe wọ iran fo.

8Avbe ugbo ni rre ọkpẹn Hesbọn kevbe avbe ogba azara ọghe Sibma khian ne a guọghọ ua, avbe ogba azara nii, ne ayọn rẹn te gbe uhunmwu ẹvbo hia. Vbe ẹghẹ ọkpa, avbe azara ẹre keghi ya vẹ sẹ ore Jaza, ọ keghi vbe vẹ vbe odẹ ahọ ya sẹ ato, kevbe odẹ orrie ya sẹ Okun Nọwu.

9Banbanna nian, I viẹ ugbo azara e Sibma, I vbe viẹ Jazẹ. Ameve rhọ vbe aro mwẹ ne Hesbọn kevbe Elealẹ rhunmwuda, emwiorhọ i rrọọ ne ọ gha ya ẹko avbe emwa nii gha rhiẹnrhiẹn.

10Orhiọnkpa ne ẹko maa ighi rrọ nian vbe otọe ne ọ maa emwiokọ nii. A i ghi miẹn ọmwa ne ọ wee ra ne ọ gha so ihuan vbe ogba azara. A i ghi miẹn ọmwa ne ọ minọ alimo ya ru ayọn, uwemwẹ oghọghọ sẹẹ ufomwẹ.

11I ya akhiẹ viẹ eve orriara ne Moab, kevbe eve oya ne Kẹ Hẹrẹs.

12Ivbi e Moab gha miẹn ẹsọn a gha wu a rrie, ne iran ya hin uhunmwu oke, ne iran na ya gha yo aro ẹbọ kevbe ẹgbo ẹbọ ni rrọ, ya gha na erhunmwu sokpan, ọ maa rhọkpa i ra ke ọe ladian ne iran.

13Ọnii ọrọre uhunmwu ne Nọyaẹnmwa ka vbe giee rre vbekpa e Moab. Banbanna nian, e Nọyaẹnmwa khare wẹẹ,

14“Vbe ukpo eha ne ọ dee zẹẹ, ẹfe ọrhẹnrhẹn ne Moab mwẹ gha khian ne a ho bẹkun. Ibozẹghẹ ọ re ọ ra kẹe rre vbe ẹvbo ọrhẹnrhẹn ne ọ mwẹ, te iran ni ra vbe ye mitan mitan.”

← Chapter 15 Jump to: Chapter 17 →