Isaiah 53

Edo ((E Baibol Ẹdo) Version 1996)

← Chapter 52 Jump to: Chapter 54 →

1Emwa ni keghi wanniẹn wẹẹ, “De ọmwa ne ọ gha te ya iyẹn ne ima naẹn na yi yi? De ọmwa ne ọ gha te miẹn obọ e Nọyaẹnmwa vbe emwi na.

2Iho ọghe Nọyaẹnmwa nọ wẹ, ne ọguọmwadia ẹre wan zẹ vbe erhan ne ọ zọre vbe otọe ne ọ kae. Ọ ma zogọ, ẹ i vbe mose a ma wẹ a gha miẹn emwi ọkpa ne ọ gha gie ima gha ghe ẹre. Ọsughe ọkpa ivbi rre ọre egbe, emwi ne ọ gha si ima sikẹ ọre i rrọọ.

3Ma zan rẹn a keghi vbe he ẹe yotọ. Ọ ziengbe oya kevbe obalọ, a ma miẹn orhiọnkpa ne ọ vbe tọn aro mu ghe ẹre ma keghi wa yangbe ẹe vbene a gha kha ighẹ ẹ i re emwi rhọkpa.

4“Sokpan rẹn ya egbe miẹn oya ne ọ te khẹ ke mwa obalọ ne ọ te kei ne ọ gha re ọghomwa. Ẹghẹ na hia, ma kegha roro wẹ obọ Osanobua ọre oya ne ọ re ke rre.

5Sokpan rhunmwuda orukhọ mwa ọ re a na fian ẹre ẹwẹn, a keghi gbe ẹe rhunmwuda emwi dan ne ima ru. Oya ne irẹn ree ọ re ọ mu ima egbe rran emwi ne a fi irẹn re ọ re ọ sinmwi mwa.

6Ma hia fẹẹrẹ keghi yevbe ohuan ni wiri dọmwadẹ ọghọe kegha khian ọghọe khian. Sokpan e Nọyaẹnmwa keghi kun oya ni yan rẹn oya ne ọ te khẹ ke ima hia.

7“A ru ẹre emwi oya, ọ keghi mu egbe rriotọ ziin ẹnrẹn, ọ ma ta ukpẹmwẹ ọkpa, ọ yevbe ovbi ohuan ne a ra gbe ọ yevbe ohuan ne a ra gbẹn ọre eto, ọ ma vbe tu asẹn yotọ.

8A mu ẹẹn, a bu ohiẹn uwu gbe ẹe, a na rhie ẹre kpao ne ọ ya wu a ma vbe miẹn ọmwa ne ọ zẹẹ ye emwi ne ọ rruan rẹn. A gbe ẹe rua ba ẹmwẹ orukhọ emwa ima.

9A keghi mu ẹẹn ye idin ba emwa dan, a ree ẹre ba iran ni fe, egbe ne a ya miẹn wẹ ọ ma ru emwi khọ ẹdẹ ra ne ọ ta ohoghe.”

10E Nọyaẹnmwa khare wẹẹ, “Iho mwẹ nọ wẹ ne ọ rrioya. Uwu ne ọ wu, ese ne a zọ ya dẹ ayabọ ọ re nọ. Rhunmwuda ọnii, ọ gha miẹn ivbi uniẹn ọnrẹn ọ gha tọ ẹsẹsẹmwẹse obọ, ẹre ọ re emwamwa mwẹ ra na dunna.

11Ọ gha ghi rrii oya nẹ vbe ẹdẹ agbọn rẹn, ọ gha vbe dọlegbe miẹn ọyẹnmwẹ ọ gha rẹn wẹ rẹn ma rrioya kua kẹkan. ọguọmwadia mwẹ ne ekhọe esi ne ẹko mwẹ rhiẹnrhiẹn ghe. Gha ye egbe miẹn oya emwa nibun, rhunmwuda ẹre, mẹ gha yabọ iran.

12Rhunmwuda ọnii, mẹ gha rhie ẹre ye ukpo uyi ọ ghi gha mwẹ ihe vbe uwu ẹbu iran ni kọnkọn ni mwẹ ẹtin. Ekhọe obọ ẹre ọ re ọ ya rhie ẹdagbọn rẹn yotọ ọ keghi ya egbe miẹn vbe emwi ne ọ rruan emwa dan. Ọ rhie ihe emwa orukhọ nibun. Ọ na na erhunmwu wẹ ne a yabọ iran.”

← Chapter 52 Jump to: Chapter 54 →