Isaiah 22

Edo ((E Baibol Ẹdo) Version 1996)

← Chapter 21 Jump to: Chapter 23 →

1Uhunmwu ne a gie vbekpa Iya Umian ọ re ọna khin. Demwi ne ọ sunu na yi? Vbọzẹ ne emwa hia na gbe izabọbọ vbe uhunmwu owa iran yi?

2Ore ẹvbo hia wa hu yo hu rre, ọ vuọn ne owogho kevbe igiangian. Emwa uwa ni wulo vbe okuo na, ẹ i re aro igbinna iran wulo yi.

3Avbe ọkaolotu uwa ma he fi ifẹnmwẹ okpa iran ke lẹẹ kua, a na vbe khulo iran munọ.

4Banbanna nian, wa hẹko sẹ mwẹ rae ne I viẹ eve orriara ne avbe iran ni wulo vbe emwa mwẹ. Wa ghẹ zẹdẹ hia ne uwa fu mwẹ ẹko rre.

5Ẹghẹ ulẹ ọbanban ọna khin, ẹghẹ a khọn ọmwa muotọ kevbe iro hanrẹn vbe Iya Umian, e Nọyaẹnmwa, Oghodua ne Osanobua ne Udazi, ọ re ọ ru ima ọna. Ekẹn ne a gbe lẹga ẹvbo mwa khian ne a rẹnkhẹẹn uan, utumwẹ wa bu rre kegha migbo vbe uhunmwu oke.

6Avbe ivbiyokuo ni ke otọe Ẹlam rre hin ẹsin dee, iran ye uhanbọ kevbe ifẹnmwẹ mu egbe igbinna. Ivbiyokuo ni ke otọ Kẹ rre vbe ye asa iran mu egbe yotọ.

7Iya e Juda ne ọ maa emwiokọ ghi khian ne a viọ ikẹkẹ okuo vuọn, ivbiyokuo ni hin ẹsin keghi mudia vbe odaro onurho e Jerusalẹm.

8Avbe emwi ne Juda te ya khẹ egbe hia de rẹnkhẹẹn uan. Ugbẹn vbe emwi vberriọ ghi sunu, wa keghi viọ emwi igbinna ke uwu ẹgun emwi igbinna ladian.

9Wa miẹn avbe ehe ne ọ na kei ne a dọlọ ekẹn ne a gbe lẹga Jerusalẹm yi. Wa keghi ghe Jerusalẹm lẹga, wa na guọghọ avbe owa eso vbọ, ne uwa miẹn okuta viọ ya dọlọ ekẹn ẹvbo yi. Ne uwa miẹn ehe hẹnhẹn amẹ yi,

11wa keghi, fian ọghọdọ ye adesẹ ore ẹvbo ne amẹ ne ọ lẹ ke odighi nẹdẹ rre miẹn gha lẹ hẹnhẹn yi, sokpan, wa ma zẹye ọghe Osanobua ne ọ mwamwa emwi na hia nẹkpo i mwẹẹ arria gha dee, ọmwa ne ọ vbe gie ẹe gha sunu.

12Ẹghẹ nii, Oghodua ne Udazi keghi datie uwa ne uwa gha viẹ kevbe ne uwa vbe gha khiẹ, ne uwa khiokhio eto ua, ne uwa vbe rhuan ukpọn akhiẹ.

13Sokpan, ne uwa gha na te ru vberriọ, wa keghi gha giẹ, wa na gha gbe iza-bọbọ, wa na gha gbele ẹmila kevbe ohuan re, wa kegha da ayọn wa keghi kha wẹẹ, “Ma sẹtin gha re ne a vbe gha da! Akhuẹ, ma gha wulo.”

14E Nọyaẹnmwa ne Oghodua ne Udazi keghi tobọ ẹre gun mwẹ guan, ọ wẹẹ, “Ti ra ya emwi dan na bọ iran, iran te ya wulo. Mẹ ne Udazi ne Nọyaẹnmwa ne Oghodua, ọ re ọ tae.”

15E Nọyaẹnmwa ne Oghodua keghi tama mwẹ wẹ ne I gha rrie ọghe Siebna, ne ọ re ọdia ne ọ gbearoghe igiowa ọba, ne I ya tama rẹn wẹẹ,

16“Demwi ne u tie egbe ruẹ re yi? De asẹ ne u mwẹ yi ne u ya fian idin ne egbe uẹ vbe ọkpẹn oke okuta?

17U sẹtin gha re ọmwa kpataki, sokpan, Nọyaẹnmwa gha gua a rhie, ọ ghi fi ọ fua.

18Ọ gha gua a rhie vbe ibọru, ọ ghi fi ọ fi ẹvbo ọvbehe ne ọ kpọlọ sẹẹ. Evba nii i ọ re u ra na wu ye ọkpẹn avbe ikẹkẹ okuo ne u te ya ghagha. Efa ọ re u khin ne owa arowa a.

19E Nọyaẹnmwa gha rhie ruẹ hin ukpo ne u ye rre, ọ ghi vbe si ọ kẹ otọ hin ukpo ne ọ yo ne u te ye rre.”

20E Nọyaẹnmwa keghi tama Siebna wẹẹ, “Ọ ghẹ ghi sunu nẹ vberriọ, I ghi gie ne a tie ọguọmwadia mwẹ ighẹ Eliaikim ne ovbi e Hilkaia,

21I ghi viọ ẹwu kevbe ugbẹkun irriegie ruẹ ne ẹẹn, I ghi vbe mu asẹ hia ne uwẹ te ka gha mwẹ ne ẹẹn. Rẹn ghi do yevbe erha ne emwa hia ni rre Jerusalẹm kevbe Juda.

22I gha mu asẹ ne ọ gba fo ye ọre obọ vbe ototọ ọba ne ovbi uniẹn e Devid. A gha mu isanhẹn asẹ ne ẹẹn. Ọ gha khui, a i miẹn ne ọ kie ẹre, ọ gha kie, a i miẹn ne ọ khui ẹre.

23I gha kan ẹre uhe ye aga vbe ihe ẹre gbangbangban zẹ vbe ukeke, ọ ghi gha re ne a ya hio ne ẹgbẹe ọ re hia.

24“Sokpan, etiọnrẹn kevbe emwa ni gue ẹe, gha do khian ihẹ ne ẹẹn.

25Ọ ghẹ ghi do gha ye vberriọ, ukeke ne a te kaẹn gbain gha vbọ, ọ ghi de fua, ọghe emwi ne a viọ rrọ yọ hia ghi wa vbe la evba fo.” E Nọyaẹnmwa tae nẹ.

← Chapter 21 Jump to: Chapter 23 →