Numbers 10

Edo ((E Baibol Ẹdo) Version 1996)

← Chapter 9 Jump to: Chapter 11 →

1E Nọyaẹnmwa keghi tama e Mosis wẹẹ,

2“Ru okpe eva ọghe esiliva ne a ya umọmọ dunmwu ne a ya gha tie emwa nii si koko kevbe ne a ya gha vẹ agọ.

3A gha kpe okpe eva nii ne ọ tan vbe otọ, emwa nii hia ghi bu ruẹ gha die onurho Owa Ukpọn Ile.

4Sokpan, a gha kpe okpe ọkpa vbọ, avbe olotu dọmwadẹ ẹwae ni rrọ, ọre ọ gha bu ruẹ gha dee.

5A gha kpe okpe vbe ne ọ ma tan vbotọ, iran ni yakọ vbe agọ vbe asefẹn ahọ ghi si okhian.

6A ghẹ ghi vbe dọlegbe kpe ẹre vbe ne ọ ma tan vbe otọ, iran ni rre asefẹn ekẹn ghi si okhian, ọnii nọ wẹẹ, a gha si vbe agọ, a ghi kpe okpe nọ ma tan vbe otọ.

7Sokpan a gha ra tie emwa ye iko a ghi kpe okpe ne ọ tan vbe otọ.

8Ivbi Errọn, ne avbe ohẹn ọre ọ gha kpe okpe na. “Avbe orre ni dee hia ghi gha lele avbe uhi na.

9Wa gha khọn vbe otọ uwa, ọnii nọ we vbe uwa a gha gu emwa ni mu okuo gie uwa khọn, wa ghi ye avbe okpe na kpe okpe orhu okuo Mẹ ne Nọyaẹnmwa Osanobua rua gha yi uwa obọ, I ghi miẹn uwa fan vbe obọ eghian uwa.

10Erriọ vbe nọ vbe ẹghẹ iku ọyẹnmwẹ, ẹghẹ Emwiukpo Uki Ọgbọn, kevbe emwiukpo ugamwẹ ọvbehe hia, wa gha viọ ese na giẹn uan ọghe uwa rre, kevbe ọghe isara, wa ghi kpe okpe na. Ẹghẹ nii, I gha yi uwa obọ. Mẹ ọ re Nọyaẹnmwa Osanobua rua.”

11Vbe ikpẹdẹ ugie ọghe uki ne ogieva vbe ukpo ne ogieva ne ivbi Izrẹl kpao hin Igipt rre, okuku ne ọ rre uhunmwu Owa Ukpọn Ile keghi si kpao.

12Ọre ivbi Izrẹl na deyan okhian iran, ne iran ya kpao vbe Oke Sainai rre. Okuku ni keghi do yakọ vbe ẹgbo ọghe Paran.

13E Nọyaẹnmwa ghi tama e Mosis, ọre iran na suẹn okhian nii.

14Ẹghẹ ne iran a rhirhi ya si okhian, iran ni rre ototọ asa ọghe oka ne Nasọn, ne ovbi Aminadab na re ọkaolotu, ọ re ọ ke odaro, otu otu ọre iran ya khian,

15e Metanẹl ne ovbi Zua ọ re ọ gha re ọkaolotu ẹwae Isaaka.

16Eliab ne ovbi Hẹlọn ọre ọ gha khaemwisẹ yan ẹwae Zebulọn.

17Iyeke ọnii, a ghi kuọre sotọ ighẹ agọ nii, ẹwae Gẹsiọn kevbe Merari, ni dadae ghi ka si okhian.

18Iyeke ọnii iran ni re ototọ asa ọghe oka ne ẹwae Riubẹn na re ọkaolotu ghi si okhian otuotu, Elizọ ne ovbi Siediọ ghi gha kha yan iran.

19Sielumiẹl ne ovbi Zurisiadai ọ re ọ gha kha yan ẹwae Simiọn.

20Eliasaf ne ovbi e Deuẹl ọre ọ gha kha yan ẹwae Gad.

21Iyeke ọnii, ẹwae Kohat ne ọ mu avbe emwi nihuanrẹn, ghi si okhian, vbe iran ghi te sẹ agọ nọkpa, iran gha vbe werriegbe bọ agọ nẹ.

22Iyeke ọnii, iran ni rre ototọ asa ọghe oka ne ẹwae Ifreim re ọkaolotu ẹre, ọ ghi si okhian vbe otuotu, Ẹlisiama ne ovbi Amihud ghi gha khaemwisẹ yan iran.

23E Gamaliẹl ne ovbi Pẹdazọ ọre ọ gha khaemwisẹ yan Manasẹ.

24Abidan ne ovbi Gidiọn kegha khaemwisẹ yan ẹwae Bẹnjamin.

25Vbe okiekie, iran ni rre ototọ asa ọghe oka ne ẹwae Dan na re emwa ni vbe gha ye vbe iran ni mu odieke mwẹ zẹ vbe abodẹ ọghe oka ni hia, ghi si okhian vbe otuotu, Ahieza ne ovbi Amisiadai ghi gha khaemwisẹ yan iran.

26E Pegiẹl ne ovbi Okran ọ re ọ gha khaemwisẹ yan ẹwae Asia.

27Ahira ne ovbi Enan kegha khaemwisẹ yan ẹwae Naftali.

28Vbenian na ọre iran ya gha khian vbe otuotu vbe ẹghẹ ne ivbi Izrẹl a rhirhi ya si okhian, vbe iran a kpao vbe agọ rre.

29E Mosis keghi tama Hobab ne ovbi Jetro ne orruan rẹn ne ovbi Midian wẹẹ, “Te ima ghi ra kpao gha rrie ehe ne Nọyaẹnmwa khare ighẹ rẹn gha mu ne ima. Ọ yan mẹ wẹ rẹn gha ya Izrẹl khian ne ọ fee, lele ima gha dee, ma gha ghae ne uẹn vbe ẹfe ima.”

30E Hobab keghi wanniẹn wẹẹ, “Ẹn o, I rrie ẹvbo mwẹ,”

31E Mosis keghi kha wẹẹ, “Lahọ ghẹ kpao sẹ ima rae, wẹ rẹn ehe ne ima ra bu agọ yi vbe uwu ẹgbo, u gha sẹtin ma ima odẹ.”

32U gha lele ima gha dee, ma gha ghae ne uẹn vbe afiangbe hia ne Nọyaẹnmwa rhie ne ima.

33Ugbẹn vbe emwa nii ghi sii kpao vbe Sainai ne oke ne ọ huanrẹn, iran keghi khian okhian ikpẹdẹ eha, Ẹkpẹti Ile ọghe Nọyaẹnmwa keghi kodaro ne iran ne ọ gualọ ehe ne iran gha bu agọ yi ne iran.

34Zẹ vbene iran ya si ke agọ kpao nii, erriọ ọre okuku ọghe Nọyaẹnmwa ya rhu gue iran vbe avan.

35Ẹkpẹti Ile nii gha wa si okhian, e Mosis ghi kha wẹẹ, “E Nọyaẹnmwa, kpaegbe ne u zagha avbe eghian ruẹn kua, ne u vbe khulo iran ni mu ohu ruẹ kua!”

36Ọ ghẹ ghi vbe demudia, rẹn ghi kha wẹẹ, “E Nọyaẹnmwa, dọlegbe bu ẹgbẹe arriaisẹn inu ne ọ khin ọghe Izrẹl gha dee.”

← Chapter 9 Jump to: Chapter 11 →