Numbers 19

Edo ((E Baibol Ẹdo) Version 1996)

← Chapter 18 Jump to: Chapter 20 →

1E Nọyaẹnmwa keghi tama e Mosis kevbe Errọn

2ne iran ru emwamwa na ne ivbi Izrẹl wẹẹ, ne iran mu ẹmila ne ọ baa ne a ma he ya winna ke ne ẹ i mwẹ okan.

3Ne uwa mu ne Eliaza ne ohẹn. A ghi mu ẹn lahin ore agọ rre ne a sirra ẹre gbee.

4Eliaza ghi rhie vbe esagiẹn ọnrẹn, ọ ghi ya ikpinhianbọ sanmwẹ ọẹn igba ihinrọn ghe odẹ Owa Ukpọn Ile,

5A ghi vbe sirra ohẹn giẹn ikun aranmwẹ ni hia, ohian, kevbe efun, esagiẹn kevbe ibiẹ ọre.

6Rẹn ghi rhie erhan sida, kevbe abọ hisọp kevbe ukpọn ne ọ baa, ọ ghi filẹe ku uwu erhẹn nii.

7Vbe iyeke ọnii, ọ ghi ya họ ukpọn rẹn, ọ ghi mu amẹ hihiẹ ku egbe, iyeke ọnii, ọ sẹtin la uwu agọ; sokpan, awua ye rrọ ẹre egbe rhinrin ya sẹ ẹghẹ ota.

8Ọmwa ne ọ ya giẹn ẹmila nii, ọ ghi vbe họ ukpọn rẹn, ọ ghi vbe hihiẹ amẹ yan egbe ẹre, sokpan rẹn ye vbe mwẹ awua ọ te ya sẹ ota.

9Ẹghẹ nii, ọmwa ne awua i gue ghi ya koko emuẹn ẹmila nii, ọ ghi ya viọ ẹre ye ehe nẹ i mwẹ awua vbe a gha lahin agọ rre nẹ, a ghi sẹ ọe rae ye evba ne ivbi Izrẹl ya ẹe gha gua amẹ ne a ya khuẹ awua kua. Te a ru emwi na ne a ya kpe orukhọ kua.

10Ọmwa ne ọ si emuẹn ni koko, ọ ghi họ ukpọn rẹn, sokpan awua ye guẹe ọ te ya sẹ ota. Emwamwa na, ọ ghe ẹdẹdẹmwẹdẹ nọ ne ivbi Izrẹl kevbe avbe erhunmwuyẹn ni rre uwu ẹbu iran.

11Ọmwa ne ọ yobọ kan ọmwa ne ọ wu nẹ, ghi gha re ne awua gue la ikpeedẹ ihinrọn.

12Ọ ghi ya ye amẹ akpehuan khuẹ egbe ẹre huan vbe ikpẹdẹ ne ogieha ke ikpẹdẹ ne ogihinrọn, rẹn keghi do gha re ne ọ huanrẹn, sokpan a deghẹ ọ ma khuẹ egbe ẹre huan vbe ikpẹdẹ ne ogihinrọn, ọ ghi gha re nọ ma huan.

13Ọmwaikọmwa ne ọ yobọ kan orinmwi, ọ na ma khuẹ egbe ẹre huan, khian ne ọma huan rhunmwuda a ma he mu amẹ akpehuan ku ọre. Ọ ru Owa Ukpọn Ile Nọyaẹnmwa awua, a i ghi vbe kae ba emwa Osanobua.

14Ọmwa gha wu vbe uwu owa ukpọn, ọmwaikọmwa ne ọ rre uwu owa ukpọn nii vbe ẹghẹ ne ọ na wu ra ọmwaikọmwa ne ọ larọ, khian ne awua gue la ikpẹdẹ ihinrọn.

15Avbe esago ra akhe ne ẹ i mwẹ ugue ni rre uwu ẹre vbe khian ne awua ye.

16Odẹ vbenian, ọmwaikọmwa ne ọ ya obọ kan ọmwa ne a gbua ra ne ọ wu uwu ẹhi vbe adesẹ ore, ra ọmwa ne ọ ya obọ kan ugboloko ọmwa, ra idin, ghi khian ne awua gue la ikpẹdẹ ihinrọn.

17Egbe ama huan vbenian, a ghi zẹ emuẹn vbe ẹmila na giẹ uan ne a ya gha kpe awua kua ye akhe, a ghi sa amẹ nọfurre ba ẹre.

18Vbe ọ ghe ne okaro, ọmwa ne awua i gue ghi rhie abọ ebe afọ, ọ ghi fiẹe ye uwu amẹ nii, ọ ghi miẹn rẹn lele owa ukpọn nii, kevbe emwi hia ni rre uwu ẹre kevbe emwa ni rre evba. Vbe ọ ghe ne ogieva, ọmwa ne awua i gue ghi miẹn amẹ nii ku ọmwa ne ọ ya obọ kan ugboloko ọmwa, ra ikun orinmwi ra idin.

19Ọmwa nẹ i mwẹ awua ghi miẹn amẹ nii ku ọmwa ne awua gue nii vbe ikpẹdẹ ne ogieha kevbe ikpẹdẹ ne ogihinrọn. Vbe ikpẹdẹ ne ogihinrọn, ọ ghi kpẹe huan ighẹ ọmwa ni ne a miẹn wẹ ọ ghi họ ukpọn rẹn nẹ, ọ mu amẹ rhurhẹ yan egbe, ọ keghi do khian ne ẹ i ghi mwẹ awua vbe ọ ghi sẹ ẹghẹ ne ovẹn ya dero.

20Ọmwaikọmwa ne awua gue, ne ọ ma khuẹ egbe ẹre huan, awua wa ye guẹe, rhunmwuda a ma he mu amẹ akpehuan ku ọre. Ọ ru Owa Ukpọn Ile Nọyaẹnmwa awua, a i ghi vbe kae ba ivbi Osanobua.

21Uhi na ghi gha rre atẹ vbe obọ uwa ẹdẹdẹmwẹdẹ. Ọmwa ne ọ miẹn rẹn kua ighẹ amẹ akpehuan, rẹn ghi vbe họ ukpọn irẹn, ọmwa ne ọ rhirhi ye obọ kan amẹ ni, awua gu ẹe rhinrin ya sẹ ota.

22Emwikemwi ne ọmwa ne awua gue ye obọ kan, vbe khian ne awua ye, ọmwaikọmwa ne ọ vbe ya obọ kan rẹn khian ne awua gue ya sẹ ota.

← Chapter 18 Jump to: Chapter 20 →