1 John 1

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

Jump to: Chapter 2 →

1ଜୀବନ୍ ରିଲା ବାକ୍ୟ ହୁର୍‌ବେ ହ୍‍ଣି ଯେ ରିଲାଇ, ଯାର୍ କ୍‌ତା ଅମିମ୍‌ନ୍ ଶୁଣିଆଚୁ, ଯାକେ ଅମି ନିଜାର୍ ଆକିଏ ଦ୍‌କିଆଚୁ, ଯାକେ ଅମି ଦିଆନ୍ କ୍‍ରି ଦ୍‌କିଆଚୁ ଆର୍ ଅମାର୍ ନିଜାର୍ ଆତେ ଚୁଇ ଆଚୁ।

2ସେ ଜୀବନ୍ ଦେତାଲକ୍ ଅମୁକେ ଦ୍‍କାଇ ଅଇଲା, ଆରେକ୍‌ ଅମିମ୍‌ନ୍ ତାକେଦ୍‍କି ଆଚୁ ସେତାର୍‍ଗିନେ ଅମି ସାକ୍ଷି ଦେମ୍‌ଲୁ। ଜୁଇ ନ୍‌ସେର୍‌ତା ଜୀବନ୍ ଉବାର୍ ସ୍‌ଙ୍ଗ୍ ରିଲା ଆର୍ ଅମାର୍‌ମ୍‌ନ୍‌କାର୍‌ ଲ୍‌ଗେ ଜାଣାଇ ଅଇଲି ତାର୍‌କ୍‍ତା ତୁମୁକେ ଜାଣାମ୍‍ଲୁ।

3ଜୁଇରି ଅମିମ୍‌ନ୍ ଯିଶୁର୍ ବିଷୟ୍ ଦ୍‌କିଆଚୁ ଆର୍ ଶୁଣିଆଚୁ, ସେରି ତୁମୁକ୍‌ମ୍‌ନ୍ ହେଁ ଜାଣାମ୍‍ଲୁ, ଜ୍‌ନ୍‌କ୍‌ରି ତୁମିମ୍‍ନ୍ ହେଁ ଅମାର୍ ସ୍‌ଙ୍ଗ୍ ମିଳାମିସା ଅମ୍‌ହାରାସ୍। ଆରେକ୍‌ ଅମାର୍‌ମ୍‌ନ୍‌କାର୍‌ ମିଳାମିସା ଉବା ଆର୍ ତାର୍ ହଇସି ଯୀଶୁ ଖ୍ରୀଷ୍ଟର୍ ସ୍‌ଙ୍ଗ୍ ଆଚେ।

4ଅମାର୍‌ମ୍‌ନ୍‌କାର୍‌ ସ୍‌ର୍‌ଦା ଜ୍‌ନ୍‌କ୍‌ରି ହୁରାଅଇଦ୍, ସେତାର୍‍ଗିନେ ଅମିମ୍‌ନ୍ ଇରିସ୍‌ବୁ ଲେକୁଲୁ।

5ଅମିମନ୍ ଯିଶୁର୍ ଲ୍‌ଗେ ହ୍‍ଣି ଜୁଇ କ୍‌ବର୍ ଶୁଣିଆଚୁ, ଆର୍ ତୁମୁକ୍‌ମ୍‌ନ୍ ଜାଣାଇ ଆଚୁ, ହାଇରି ଅନ୍‌କାର୍ କି, ଇଶ୍ଵର୍ ଉଜାଳ୍ ହର୍ ବ୍‌ଲ୍‌, ଆରେକ୍‌ ତାର୍ ତ୍‌ଇ ଅନ୍ଦାର୍ ହର୍‌ କ୍‍ରାପ୍ କିଚି ନାଇ।

6ଇଶ୍ଵର୍ ସ୍‌ଙ୍ଗ୍‌ ଅମାର୍‌ମ୍‌ନ୍‌କାର୍‌ ମିଳାମିସା ଆଚେ, ମ୍‍ତର୍ ଇରି କଇ ଯଦି ଅମିମ୍‌ନ୍ ଅନ୍ଦାର୍ ହର୍‌ କ୍‌ରାପ୍‌କାମେ ଚାଲ୍ ଚ୍‌ଲ୍‌ନି କ୍‌ରୁ ସେରି ଅଇଲେକ୍ ଅମିମ୍‌ନ୍ ମିଚୁଆ ଲକ୍, ଆରେକ୍‌ ସତ୍ ଶିକ୍ୟା ନ୍‌ମାନ୍‌ତେ ରେମା।

7ମ୍‍ତର୍ ଇଶ୍ଵର୍ ଜ୍‌ନ୍‌କ୍‌ରି ଉଜାଳ୍ ହର୍ ବ୍‍ଲ୍, ଅମିମ୍‌ନ୍ ଯଦି ତାର୍ ଉଜାଳ୍ ହର୍ ବ୍‌ଲ୍‌କାମ୍ କ୍‌ରୁ, ତ୍‍ବେ ଅମାର୍‌ମ୍‌ନ୍‌କାର୍‌ ନିଜାର୍ ନିଜାର୍ ମିଳାମିସା ଆଚେ, ଆରେକ୍‌, ତାର୍ ହଇସି ଯୀଶୁର୍‌ ବ୍‌ନି ଅମାର୍‌ ସ୍‌ବୁ ପାପେହ୍‌ଣି ଅମୁକ୍‌ମ୍‌ନ୍ ସଫା ସୁତୁରା କ୍‍ରେଦ୍।

8ଯଦି ଅମି କ୍‌ମ୍‌ନ୍ଦ୍ ଅମାର୍‌ମ୍‌ନ୍‌କାର୍‌ ବିତ୍‌ରେ ପାପ୍ ନାଇ, ସେରି ଅଇଲେକ୍ ଅମି ନିଜେ ନିଜେ ଟକି ଅମ୍‌ନ୍ଦ୍‌, ଆରେକ୍‌, ଅମାର୍‌ମ୍‌ନ୍‌କାର୍‌ ତ୍‌ଇ ସ୍‌ତ୍‌ନାଇ।

9ଯଦି ଅମିମ୍‌ନ୍ ନିଜାର୍ ନିଜାର୍ କ୍‍ଲା ପାପ୍‌କେ ମାନ୍‍ଲେକ୍, ତ୍‍ବେ ଇଶ୍ଵର୍ ଅମାର୍‌ମ୍‌ନ୍‌କାର୍‌ ପାପ୍ କେମା କ୍‌ରୁକେ ଆର୍ ସ୍‌ବୁ ଅଦର୍‌ମାର୍ ତ୍‌ଇହ୍‌ଣି ଅମୁକ୍‌ମ୍‌ନ୍‌କେ ସଫା ସୁତୁରା କ୍‌ରୁକେ ଦ୍‌ର୍‌ମ୍ ଆର୍ ନିଆଇ କ୍‌ର୍‌ତା ଲକ୍‌।

10ଅମିମ୍‌ନ୍ ଯଦି ପାପ୍‌ କ୍‍ରି ନ୍‌କେରୁ ବ୍‌ଲି କ୍‌ମ୍‌ନ୍ଦ୍, ତ୍‌ନ୍‌ଅଇଲେକ୍ ଅମିମ୍‌ନ୍ ଇଶ୍ଵର୍‍କେ ମିଚୁଆ ବ୍‌ଲି କ୍‌ମ୍‌ନ୍ଦ୍, ଆରେକ୍‌ ତାର୍ ସ୍‌ତ୍‌ ଶିକ୍ୟା ଅମିମ୍‌ନ୍‌ ମାନି ନ୍‌କେରୁ।

Jump to: Chapter 2 →