2 Corinthians 10

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 9 Jump to: Chapter 11 →

1ମୁଇ ତୁମାର୍‌ମ୍‌ନ୍‌କାର୍ ସାମ୍‌ନାଇ ତୁମାର୍‌ମ୍‌ନ୍‌କାର୍ ବିତ୍‌ରେ ନ୍‌ମ୍‌ର, ମ୍‌ତର୍ ତୁମାର୍ ସାମ୍‌ନାଇ ନ୍‌ରିଲେ ତୁମାର୍‌ମ୍‌ନ୍‌କାର୍ ଲାଗି ସାହାସି ଯେ ମୁଇ ପାଉଲ୍, ମୁଇ ନିଜେ ଖ୍ରୀଷ୍ଟର୍ ନ୍‌ମ୍‌ର ଆର୍ ସାଦାସିଦା ବାବ୍‌ନା ଏତାଇ କ୍‍ରି ତୁମୁକ୍‍ମ୍‌ନ୍‍କେ ଗ୍‌ଉଆରି କ୍‌ରିନ୍ଦ୍।

2ହେଁ, ମୁଇ ପାର୍‍ତେନା କ୍‌ରୁଲେ ଯେ, ଅମିମ୍‌ନ୍ ଇ ଜ୍‍ଗତାର୍ ଲକ୍‌ ଅନୁସାରେ ବ୍ଯବହାର୍ କ୍‌ରୁଲୁ ବ୍‌ଲି ଜୁଇ ଲକ୍‌ମ୍‌ନ୍‌ ବାବ୍‌ତି, ଅନ୍‌କ୍‌ରି କାର୍ କାର୍ ବିରୁଦେ ସାସ୍ ଦ୍‌କାମ୍‌କେ ମୁଇ ଜୁଇ ନିସ୍‌ପତି କ୍‌ରିଆଚି, ନିଜେର୍‌ଇ ଜ୍‌ନ୍‌କ୍‌ରି ମକେ ସେ ପର୍‌କାର୍ ସାସ୍ ଦ୍‌କାମ୍‌କେ ଅଇନ୍‌କେରେ।

3କାଇତାକ୍ ଅମିମ୍‌ନ୍ ଇ ଜ୍‍ଗତେ ବାଚୁଲୁ ଇରି ସ୍‌ତ୍, ମ୍‌ତର୍ ଅମିମ୍‌ନ୍ ଇ ଜ୍‍ଗତାର୍ ଲକ୍ ହ୍‌ର୍ ଅମାର୍ ଶ୍‍ତ୍‍ରୁକେ ଯୁଜ୍ କ୍‍ରି ନ୍‌କେରୁ।

4ସେତାକ୍ ଅମାର୍‌ମ୍‌ନ୍‌କାର୍‌ ଯୁଜାର୍ ଜ୍‌ତର୍‌ହାତି ଜ୍‍ଗତାର୍ ଲକ୍‌ମ୍‌ନ୍‌କାର୍‌ ନଇ, ମ୍‌ତର୍ ଶତ୍‌ରୁର୍ ଡାଟ୍ ଜାଗାକେ ନାସ୍ କ୍‌ରୁକେ ଇଶ୍ଵରାର୍ ସାମ୍‌ନାଇ ସେରି ସ୍‌ବୁ ବେସିଶ୍‌କ୍‌ତି ଅଇଦ୍।

5ଅମିମ୍‌ନ୍ ଜୁକ୍‌ତି ଜୁକ୍‍ତା ସ୍‌ବୁ ଆର୍ ଇଶ୍ଵରାର୍ ଗିଆନ୍ ବିରୁଦେ ଉଟ୍‌ତା ସ୍‌ବୁ ବ୍‌ଡ୍‌ ବିଷୟ୍ ନାସ୍ କ୍‌ରୁନ୍ଦ୍, ଆରେକ୍‌ ସ୍‌ବୁ ବାବ୍‌ନାକେ ଖ୍ରୀଷ୍ଟର୍ ବାଦ୍ଯ ଅମ୍‌କେ ବନ୍ଦି କ୍‌ରିନ୍ଦ୍।

6ଆରେକ୍‌, ଜ୍‌ଡେବ୍‌ଳ୍ ତୁମିମ୍‍ନ୍ ହୁରା ବାବ୍‌ରେ ବାଦ୍ଯ ଅଉଆସ୍, ସ୍‌ଡେବ୍‌ଳ୍ ସ୍‌ବୁ ଅବାଦ୍ଯ ମ୍‌ନ୍‌କେ ଡ୍‌ଣ୍ଡ୍‌ଦେମ୍‌କେ ଅମିମ୍‌ନ୍ ତିଆର୍ ଆଚୁ।

7ତୁମିମ୍‍ନ୍ ଉହ୍‌ରାର୍ ବିଷୟସ୍‌ବୁ ଦ୍‌କୁଲାସ୍। ଯଦି କେ ନିଜ୍‍କେ ଖ୍ରୀଷ୍ଟର୍ ବ୍‌ଲି ବିଶ୍‍ବାସ୍ କ୍‍ରେଦ୍, ତ୍‌ବେ ସେ ଜ୍‌ନ୍‌କ୍‌ରି ଖ୍ରୀଷ୍ଟର୍, ଅମିମ୍‌ନ୍‌ ହେଁ ଯେ ସେନ୍‌କାର୍ ଖ୍ରୀଷ୍ଟର୍, ଇରି ସେ ଆପେ ବାବ।

8କାଇତାକ୍ ଅମାର୍‌ମ୍‌ନ୍‌କାର୍‌ ଅଦିକାର୍ ବିଷୟେ ମୁଇ ଅଳକ୍ ଅଦିକ୍ ଗ୍‌ର୍‌ବ୍ କ୍‌ଲେକ୍ ହେଁ ଲାଜ୍ ହାଇ ନ୍‌କେରି, ତୁମୁକ୍‍ମ୍‌ନ୍‍କେ ନାସ୍ କ୍‌ରୁକେ ମାପ୍‌ରୁ ଅମୁକ୍‌ମ୍‌ନ୍‌କେ ଇ ଅଦିକାର୍ ନ୍‌ଦେଇ ତୁମାର୍‌ମ୍‌ନ୍‌କାର୍ ତିଆର୍ ଲାଗି ଦ୍‌ଇଆତ୍‌ତି।

9ମର୍ ଚିଟି ଦ୍ୱାରା ମୁଇ ତୁମୁକ୍‍ମ୍‌ନ୍‍କେ ଡିର୍ ଦ୍‌କାମ୍‌ଲେ ବ୍‌ଲି ବାବାନାଇ।

10କାଇତାକ୍ କ୍‍ତେକ୍ ଲକ୍ କ୍‌ଉତି, ତାର୍ ଚିଟି ସ୍‌ବୁ ବେସି ଦ୍‌ର୍‌କାର୍ ଆର୍ ଶ୍‌କ୍‌ତିଶାଳି, ମ୍‌ତର୍ ଅମାର୍ ସାମ୍‌ନାଇ ତାର୍ ଗ୍‌ଗାଳ୍ ଦୁର୍‌ବଳ୍ ଆର୍ ତାର୍ ବାକ୍ୟକେ ନ୍‍ଶୁଣ୍‌ତି।

11ଅମିମ୍‌ନ୍ ନ୍‌ରିଲା ସ୍‌ମୟେ ଚିଟି ଦ୍ୱାରା ବାକ୍ଯ ଜ୍‌ନ୍‌କ୍‌ରି, ସେତିରିଲା ସ୍‌ମୟର୍‌ କାମ୍ ହେଁ ସେନ୍‌କାର୍, ଇରି ଅନ୍‌କ୍‌ରି ଲକ୍ ବୁଜ୍‌ତି।

12କାଇତାକ୍ ଜୁଇଲକ୍ ଆତ୍ମାଇ ସ୍‌ର୍‌ଦା କ୍‌ର୍‌ତି, ସେମ୍‌ନ୍‌କାର୍ ବିତ୍‌ରେ କାର୍ କାର୍ ସ୍‌ଙ୍ଗେ ନିଜାର୍ ତୁଳନା କ୍‌ରୁକେ ଅମିମ୍‌ନ୍ ସାସ୍ କ୍‍ରି ନ୍‌କେରୁ। ମ୍‌ତର୍ ସେମ୍‌ନ୍ ନିଜେ ନିଜେ ନିଜାର୍ ଦ୍ୱାରା ନିଜାର୍ ଜ୍‌ତେକ୍ ଦ୍‌ର୍‌କାର୍ ଆର୍ ନିଜେ ନିଜାର୍ ସ୍‌ଙ୍ଗ୍‌ ତୁଲ୍‌ନା କ୍‍ରି ମୁର୍‌କ ଜାଣାଉତି।

13ମ୍‌ତର୍ ଅମିମ୍‌ନ୍ ସିମା ଲାଙ୍ଗି କ୍‍ରି ଗ୍‌ର୍‌ବ୍ କ୍‍ରି ନ୍‌କେରୁ। ମ୍‌ତର୍ ତୁମିମ୍‍ନ୍ ହେଁ ଅମାର୍‌ମ୍‌ନ୍‌କାର୍‌ ସିମାଇ ଅଲ୍‌ଗା ଅଉତା ହାଇଁ ଇଶ୍ଵର୍ ଅମାର୍‌ମ୍‌ନ୍‌କାର୍‌ ହାଇଁ ଦ୍‌ର୍‌କାର୍ ହିସାବେ ଜୁଇ ସିମା ତିଆର୍ କ୍‍ରିଆଚେ, ସେତିର୍ ଦ୍‌ର୍‌କାର୍ ଅନୁସାରେ ଗ୍‌ର୍‌ବ୍ କ୍‍ରାସ୍।

14କାଇତାକ୍ ତୁମିମ୍‍ନ୍ ଅମାର୍‌ମ୍‌ନ୍‌କାର୍‌ ସିମାର୍ ଅଲ୍‌ଗା ନ୍‌ରିଲା ହର୍ ଅମିମ୍‌ନ୍ ଯେ ସିମା ଲାଙ୍ଗି ଆଚୁ, ସେରି ନଇ, ସେତାକ୍ ଖ୍ରୀଷ୍ଟର୍ ସୁବ୍‌କ୍‌ବର୍ ପର୍‌ଚାର୍ କ୍‌ରୁ କ୍‌ରୁ ଅମିମ୍‌ନ୍ ତୁମାର୍‌ମ୍‌ନ୍‌କାର୍ ହ୍‌ତେକ୍ ହେଁ ହ୍‌ର୍‌ତୁ ଜାଇରିଲୁ।

15ଅମିମ୍‌ନ୍ ଜ୍‌ତେକ୍ ଦ୍‌ର୍‌କାର୍ ସ୍‌ତେକ୍ ତ୍‌ଇହ୍‌ଣି ଲାଙ୍ଗି କ୍‍ରି ବିନ୍‌ଲକାର୍ କାମାର୍ ବିଷୟେ ଗ୍‌ର୍‌ବ୍ କ୍‍ରି ନ୍‌କେରୁ, ମ୍‌ତର୍ ତୁମାର୍‌ମ୍‌ନ୍‌କାର୍ ବିଶ୍‌ବାସ୍‌ ବାଡ୍‌ତା ସ୍‌ଙ୍ଗେ ସ୍‌ଙ୍ଗେ ଅମାର୍‌ମ୍‌ନ୍‌କାର୍‌ ଦ୍‌ର୍‌କାର୍ ଅନୁସାରେ ଅମାର୍‌ମ୍‌ନ୍‌କାର୍‌ କାମ୍ ତୁମାର୍‌ମ୍‌ନ୍‌କାର୍ ଦ୍ୱାରା ଜ୍‌ନ୍‌କ୍‌ରି ବେସିରେ ବେସିତର୍ ଚାରିହାକ୍ ଅଇଦ୍।

16ଆରେକ୍‌, ଅମିମ୍‌ନ୍ ବିନ୍‌ଲକାର୍ ସିମା ବିତ୍‌ରେ ତାର୍ କ୍‌ଲାକାମ୍ ବିଷୟେ ଗ୍‌ର୍‌ବ୍ ନ୍‌କେରି ତୁମାର୍‌ମ୍‌ନ୍‌କାର୍ ହ୍‌ଚାର୍ ଗାମ୍‍କେ ଜ୍‌ନ୍‌କ୍‌ରି ସୁବ୍‌କ୍‌ବର୍ ପର୍‌ଚାର୍ କ୍‌ରୁ ହାରୁମା, ଇରି ଆସା କ୍‌ରିଆଚୁ।

17ମ୍‌ତର୍ ଯେ ଗ୍‌ର୍‌ବ୍ କ୍‍ରେଦ୍, ସେ ମାପ୍‌ରୁର୍ ତ୍‌ଇ ଗ୍‌ର୍‌ବ୍ କ୍‌ର।

18କାଇତାକ୍ ଯେ ନିଜାର୍ ସ୍‌ର୍‌ଦା କ୍‍ରେଦ୍, ସେ ପରିକ୍ଯାଇ ଜିଣ୍‌ଲା ଲକ୍‌ନାଇ, ମ୍‌ତର୍ ମାପ୍‌ରୁ ଜାର୍ ସ୍‌ର୍‌ଦା କ୍‌ର୍‌ତି, ସେ ପରିକ୍ୟା ଜିଣ୍‌ଲା ଲକ୍।

← Chapter 9 Jump to: Chapter 11 →