2 Corinthians 12

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 11 Jump to: Chapter 13 →

1ଯଦି ହେଁ ଗ୍‌ର୍‌ବ୍ କ୍‌ର୍‌ତାର୍ ବ୍‍ଲ୍ ବିଷୟ୍ ନାଇ ତ୍‌ନ୍‌ଅଇଲେକ୍ ହେଁ ମକେ ଗ୍‌ର୍‌ବ୍ କ୍‌ରୁକେ ହ୍‌ଳେଦ୍, କାଇତାକ୍ ମାପ୍‌ରୁ ମକେ ଜୁଇ ଦ୍‌ର୍‌ଶନେ ଦ୍‍କାଇ ଅଇଲାଆଚେ, ଆର୍ ଆଦେଶ୍ ଦିଲାଆଚେ ସେସ୍‌ବୁ ମୁଇ ଏବେ ଲେକିନ୍ଦ୍।

2ଚ୍ଉଦ ବର୍ଷ ଆଗ୍‍ତୁ ମକେ ଇଶ୍ଵର୍ ରେତା ସ୍‌ର୍‌ଗେ ନ୍‌ଇରିଲାଇ, ମୁଇ ଗ୍‌ଗାଳେ ଜାଇରିଲେ କି ଆତ୍ମାରେ ଜାଇରିଲେ ସେରି ମୁଇ ନ୍‌ଜାଣି, ସେରି ଇଶ୍ଵର୍ ହ୍‌କା ଜାଣେଦ୍।

3ମୁଇ ଜାଣୁଲେ ଯେ, ମକେ ପାରାଦିସ୍ ନ୍‌ଇରିଲାଇ, କାଇତାକ୍ ମୁଇ ଗ୍‌ଗାଳେ ଜାଇରିଲେ କି ଆତ୍ମାରେ ଜାଇରିଲେ ସେରି ମୁଇ ନ୍‌ଜାଣି, ସେରି ଇଶ୍ଵର୍ ହ୍‌କା ଜାଣେଦ୍।

4ସେ ସ୍‌ର୍‌ଗେ ମୁଇ ଅନ୍‌କ୍‌ରି ବିଷୟ୍ ଶୁଣ୍‍ଲେ ଯେ, ସେ ସ୍‌ବ୍‌କେ କ୍‌ତା କଇକ୍‌ରି ବୁଜାମ୍ ନାହାରି, କାଇତାକ୍ ମାନାଇମ୍‌ନ୍‌କାର୍ ଟଣ୍ତ୍ ସେ ସ୍‌ବୁକେ କ୍‌ମ୍ ଅଇନ୍‌କେରେ।

5ମୁଇ ଇ ଏକ୍‍ଲାର୍ ଗିନେ ଗ୍‌ର୍‌ବ୍ କ୍‍ରିନ୍, ମ୍‌ତର୍ ମୁଇ ମର୍ ଦୁର୍‌ବଳ୍ ବିଷୟ୍ ହ୍‌କା ଗ୍‌ର୍‌ବ୍ କ୍‌ରୁଲେ ଆରେକ୍‌ କୁଇ ବିନ୍ ବିଷୟେ ଗ୍‌ର୍‌ବ୍ ନ୍‌କେରି।

6ମୁଇ ଯଦି ଗ୍‌ର୍‌ବ୍ କ୍‍ରିନ୍, ତ୍‌ବେ ସେରି ବେକାରେ ନଇ, କାଇତାକ୍ ମୁଇ ସ୍‌ତ୍ କ୍‌ତାସେ କଇନ୍ଦ୍, ମ୍‌ତର୍ ମୁଇ ଗ୍‌ର୍‌ବ୍ ନ୍‌କେରି କାଇତାକ୍ ମୁଇ ମ୍‌ନ୍‌କ୍‌ରୁଲେ ଯେ, ଲକ୍‍ମ୍‍ନ୍ ମକେ ଜ୍‌ନ୍‌କ୍‌ରି କାମ୍ କ୍‌ର୍‌ତାର୍ ଆର୍ କ୍‌ତା କ୍‌ଉତାର୍ ଶୁଣାଇଲାଇ ଆତ୍‍ତି, ସେତିହ୍‍ଣି ମକେ ଅଦିକ୍ ବ୍‍ଡ୍‌ବ୍‍ଲି ମ୍‌ନେ କ୍‌ରତ୍ ନାଇ।

7ମୁଇ ଇସ୍‌ବୁ ଦ୍‌ର୍‌ଶନେ ଦ୍‍‍କିରିଲେ ଲାଗି ଆର୍ ହାଇରିଲା ଆଦେଶାର୍ ଲାଗି ଜ୍‌ନ୍‌କ୍‌ରି ଗ୍‌ର୍‌ବ୍ ଅମ୍‌ନାହାରି, ସେତାର୍‍ଗିନେ ମର୍ ଗ୍‌ଗାଳ୍ ଗଟେକ୍ କ୍‌ଷ୍ଟ ଦେତା କାଟା ଦିଲାଆଚେ, କାଇତାକ୍ ମୁଇ ଜ୍‌ନ୍‌କ୍‌ରି ଗ୍‌ର୍‌ବ୍ ନ୍‌କେରି, ସେତାର୍‍ଗିନେ ଶଇତାନାର୍ ଗଟେକ୍ ଦୂତ୍‌କେ ମକେ ମାରୁକେ ହ୍‌ଟାଇ ଆଚ୍‌ତି।

8ଇତିହ୍‌ଣି ବ୍‌ଲ୍‌ ଅମ୍‌କେ ମୁଇ ମାପ୍‌ରୁର୍ ଲ୍‌ଗେ ତିନିତର୍ ପାର୍‌ତେନା କ୍‌ଲେଆଚି।

9ମ୍‌ତର୍ ସେ ମକେ କଇଲା ଆଚେ, “ମର୍ ଆଶିର୍‌ବାଦ୍‌ ତର୍‍ଗିନେ ବେଶିଆଚେ, କାଇତାକ୍ ଜ୍‌ଡେବ୍‌ଳ୍ ତୁଇ ଦୁର୍‌ବଳ୍ ଅମ୍‍ଲିସ୍ ସ୍‌ଡେବ୍‌ଳ୍ ମର୍ ଶ୍‌କ୍‌ତି ତକେ ବ୍‌ଡ୍‌ବପୁ କ୍‍ରେଦ୍।” ଖ୍ରୀଷ୍ଟର୍ ଶ୍‌କ୍‌ତି ମର୍‍ଲ୍‌ଗେ ଆଚେଲାଗି ମୁଇ ମର୍ ଦୁର୍‌ବଳାର୍ ଗିନେ ବେଶି ଗ୍‌ର୍‌ବ୍ କ୍‌ରିନ୍ଦ୍ ଆର୍ ସ୍‌ର୍‌ଦା ଅଇନ୍।

10କାଇତାକ୍ ଖ୍ରୀଷ୍ଟର୍ ଗିନେ ଅମିମ୍‌ନ୍ ନାନା ପର୍‌କାର୍ ଦୁର୍‌ବଳ୍ ଅମ୍‍ଲୁ, ଲାଜ୍ ଅମ୍‍ଲୁ, ଡ୍‌ଣ୍ତ୍ ବଗୁଲୁ, ଲିନ୍ଦା ତାଳ୍‌ନା ସ୍‌ମ୍ବାଡୁଲୁ, ଦୁକ୍‍କ୍‍ଷ୍ଟ ବଗୁଲୁ, ଆର୍ ଇସ୍‌ବୁତ୍‌ଇହ୍‌ଣି ସ୍‌ର୍‌ଦା କ୍‍ରି ରେମ୍‌ଲୁ, କାଇତାକ୍ ଜ୍‌ଡେବ୍‌ଳ୍ ମୁଇ ଦୁର୍‌ବଳ୍ ସ୍‌ଡେବ୍‌ଳ୍ ମୁଇ ଶ୍‌କ୍‌ତି ହାମ୍‌ଲେ।

11ମୁଇ ମୁର୍‌କ ଲକ୍ ହର୍ ଚାଲାବୁଲା କ୍‌ଲେଆଚି, କାଇତାକ୍ ଅନ୍‌କ୍‌ରି କ୍‌ରୁକେ ତୁମିମ୍‍ନ୍ ହ୍‌କା ମକେ ବ୍‌ଡ୍‌ମତ କ୍‍ରିଆଚାସ୍। ମର୍ ପ୍ରଶଂସା କ୍‌ର୍‌ତାର୍ ତୁମାର୍ ଉଚିତ୍ ରିଲି, ମ୍‌ତର୍ ତୁମାର୍ ଜୁଇସ୍‌ବୁ ବିନ୍ ହ୍‌ଟାଇଲା ଚେଲାମ୍‍ନ୍‍କେ ତୁମିମ୍‍ନ୍ ବ୍‍ଡ୍‌ବ୍‍ଲି ବାବୁଲାସ୍ ସେମ୍‌ନ୍‌କାର୍ ତ୍‌ଇହ୍‌ଣି ମୁଇ କୁଇ ଗୁଣେ ସାନ୍‌ନାଇ।

12ତୁମାର୍ ବିତ୍‌ରେ ମୁଇ ସ୍‌ମ୍ବାଳିକ୍‌ରି ନାନା ପର୍‌କାର୍ ଚାନିଆକାମ୍‌ମ୍‌ନ୍ ଆର୍ ଚିନାମ୍‍ନ୍ କ୍‍ରି ନିଜ୍‍କେ ଗଟେକ୍ ସ୍‌ତ୍‌ ହ୍‌ଟାଇଲା ଚେଲାବ୍‍ଲି ଦ୍‍କାଇ ଦିଲେଆଚି।

13ମ୍‌ତର୍ ଗଟେକ୍ ହ୍‌କା ଡାବୁ କାସୁର୍ ବିଷୟେ ମୁଇ ତୁମାର୍ ଲ୍‌ଗେ ବଜ୍‌ହର୍ ଅଇନ୍‌କେରି, ମ୍‌ତର୍ ବିନ୍‌ସ୍‌ବୁ ମ୍‌ଣ୍ତଳିମ୍‌ନ୍‌କେ ମୁଇ ବଜ୍‌ହର୍ ଅଇଲେଆଚି, ସେତାର୍‍ଗିନେ ମର୍ ଇବୁଲାର୍ ଗିନେ ମକେ କେମା ଦିଆ।

14ତିନିତର୍ ଅଇଲି ମୁଇ ତୁମାର୍ ଲ୍‌ଗେ ଆସୁକେ ମ୍‌ନ୍‌କ୍‌ରୁଲେ, ମ୍‌ତର୍ ମୁଇ ତୁମାର୍ ଲ୍‌ଗେହ୍‌ଣି କାଇରି ହେଁ ଦାବି ନ୍‌କେରି, କାଇତାକ୍ ମୁଇ ତୁମୁକ୍ ସେ ଲଡାବ୍‌ଲି ବାବୁଲେ ମ୍‌ତର୍‌ ଡାବୁ କାସୁକେ ନଇ। କାଇତାକ୍ ଉବାସି ଆଇସିର୍ ଗିନେ ହିଲାଜିଲାମ୍‌ନ୍ ଦ୍‍ନ୍ ସ୍‌ମ୍‍ପତି ନ୍‍ସେଙ୍ଗାଉତି, ମ୍‌ତର୍‌ ଉବାସି ଆଇସିମ୍‌ନ୍‌ ହିଲାଜିଲାର୍‌ ଗିନେ ଦ୍‍ନ୍ ସ୍‌ମ୍‍ପତି ସ୍‍ଙ୍ଗାଉତା ଉଚିତ୍।

15ଆରେକ୍‌ ମୁଇ ତୁମୁକ୍‍ମ୍‌ନ୍‍କେ ସାଇଜ କ୍‌ରୁକେ ମୁଇ ମର୍ ସ୍‌ବୁ ଜୀବନ୍ ଦେମ୍‌କେ ରାଜି ଆଚି, କାଇତାକ୍ ମୁଇ ମର୍ ନିଜ୍‍କେ ହେଁ ସ୍‌ର୍‌ଦାଇ ସ୍‌ହ୍‌ରି ଦେମ୍‌କେ ତିଆର୍ ଅଇଲେଆଚି। ମୁଇ ତୁମୁକ୍ ବେଶି ଲାଡ୍ କ୍‌ରୁଲେ ମ୍‌ତର୍ ତୁମିମ୍‍ନ୍ କାଇରି ମକେ ଅଳକ୍ ଲାଡ୍ କ୍‍ରାସ୍?

16ମୁଇ ତୁମାର୍ ଉହ୍‌ରେ ବଜ୍‌ହର୍ ଅଇନ୍‌କେରି ଇକ୍‍ତା ତୁମିମ୍‍ନ୍ ନିଜେ କ୍‌ଉଆସ୍, ମ୍‌ତର୍ ଅଲ୍‌ଗା ଲକ୍ ବାବୁଲାଇ କି ମୁଇ ବେସି ଚ୍‌ଲାକିରି ମିଚ୍ କ୍‌ତାକଇ ତୁମୁକ୍‌ମ୍‌ନ୍ ଟକ୍‌ଲେଆଚି ବ୍‌ଲି। ଇରିସ୍‌ବୁ ମିଚ୍।

17ମୁଇ ତୁମାର୍ ଉହ୍‌ରେ ଜ୍‌ତେକ୍ ଲକ୍‌ମ୍‍ନ୍‌କେ ହ୍‌ଟାଇରିଲେ, ସେମ୍‌ନ୍‌କେ ମୁଇ ତୁମାର୍ ତ୍‌ଇହ୍‌ଣି ଦାନ୍ ମାଗିଆଣା ବ୍‌ଲି କ୍‌ବେ କଇନ୍‌କେରି।

18ତୁମାର୍ ଲ୍‌ଗେ ଜ୍‌ମ୍‌କେ ମୁଇ ତୀତସ୍‌କେ ଗ୍‌ଉଆରି ରିଲେ, ଆର୍ ତାର୍‌ସ୍‍ଙ୍ଗ୍‍ ବିନ୍‌ସ୍‌ବୁ ବାଇମ୍‌ନ୍‌କେ ହେଁ ହ୍‌ଟାଇଲେ। ତୀତସ୍ ତୁମାର୍ ଲ୍‌ଗେହ୍‌ଣି କାଇ ଦାନ୍ ଦାବି କ୍‌ଲାଆଚେ ବ୍‌ଲି କ୍‍ମ୍‍ହାରାସ୍ କି? ସେ ଆର୍ ମୁଇ କାଇରି ସ୍‌ମାନ୍ ଚିନ୍‌ତାଇ ତୁମାର୍ ଲ୍‌ଗେ ପର୍‍ଚାର୍ କ୍‍ରି ନ୍‍ରିଲୁ କି? ଅମିମ୍‌ନ୍ ପବିତର୍ ଆତ୍ମାର୍ ଇଚାହର୍ ସେ କାମ୍ କ୍‌ରିରିଲୁ।

19ଅବେହ୍‌ତେକ୍ ତୁମିମ୍‍ନ୍ ବାବୁଲାସ୍ ଯେ, ଅମିମ୍‌ନ୍ ତୁମୁକ୍‍ମ୍‌ନ୍‍କେ ଅମାର୍ ଦସ୍‌କେ ଲୁକାଇକ୍‌ରି ଆସୁଲୁ ବ୍‌ଲି, ନାଇ ସେନ୍‍କ୍‌ରି ନଇ ଅମିମ୍‌ନ୍ ଇଶ୍ଵରାର୍ ଇଚାତ୍‌ଇ ଖ୍ରୀଷ୍ଟ ଯୀଶୁ କଇଲା ହର୍ ତୁମୁକ୍‍ମ୍‌ନ୍‍କେ କ୍‌ମ୍‌ଲୁ। ମ୍‌ତର୍ ଏ ସାଙ୍ଗମ୍‌ନ୍ ଅମିମ୍‌ନ୍ ଜୁଇସ୍‌ବୁ କ୍‌ମ୍‌ଲୁ ସେସ୍‌ବୁ ତୁମାର୍ ବ୍‌ଲାର୍ ଗିନେ କ୍‌ମ୍‌ଲୁ।

20କାଇତାକ୍ ମକେ ଡିର୍ ଲାଗୁଲି ଯେ, ଜ୍‌ଡେବ୍‌ଳ୍ ମୁଇ ତୁମାର୍ ଲ୍‌ଗେ ଆସିନ୍ଦ୍, ସ୍‌ଡେବ୍‌ଳ୍ ତୁମୁକେ ଜ୍‌ନ୍‌କ୍‌ରି ଦ୍‌କୁକେ ମ୍‌ନ୍‌କ୍‌ରୁଲେ ଯଦି ସେନ୍‍କ୍‌ରି ନ୍‌ଦେକି, କି ତୁମିମ୍‍ନ୍ ମକେ ଜୁଇ ର୍‌କମ୍ ଦ୍‌କୁକେ ମ୍‌ନ୍ ନ୍‍କେରୁଲାସ୍ ସେନ୍‍କ୍‌ରି ମକେ ଦ୍‌କୁ ନାହାରାସ୍। ମକେ ଡିର୍ କି କ୍‌ଡେବ୍‌ଳ୍ ମୁଇ ସେତି ଆସି ଜ୍‌ନ୍‌କ୍‌ରି ତୁମୁକ୍‍ମ୍‌ନ୍‍କେ ନାନା ର୍‌କମାର୍ ଟେକାଟେକି, ଅକାର୍, ରିସା, ନିଜ୍‍କେ ବ୍‌ଡ୍ ଅଉତା ମ୍‌ନ୍, ଲାଜ୍ କ୍‌ରାଉତାର୍, କୁଟ୍ କ୍‌ତା, ଗ୍‌ର୍‌ବ୍, କ୍‌ତା ନ୍‌ମାନ୍ତାର୍ ଇସ୍‌ବୁ ବିଷୟେ ଦ୍‌କୁହାରି।

21ଆର୍‌ଗଟ୍‌ତର୍ ମୁଇ ତୁମାର୍ ଲ୍‌ଗେ ଆଇଲେକ୍ ଇଶ୍ଵର୍ ମକେ ଲାଜ୍ କ୍‌ରାଇଦ୍ ବ୍‌ଲି ମୁଇ ଡିରୁଲେ, ଜୁଇସ୍‌ବୁ ଲକ୍‍ମ୍‍ନ୍ ଆଗ୍‌ତୁହ୍‌ଣି ପାପ୍ କ୍‌ଲାଇ ଆତ୍‍ତି ଆର୍ ଅବେହ୍‌ତେକ୍ ସେମ୍‌ନ୍‌କାର୍ ଦାରିକାମାର୍ ଗିନେ ଲାଜ୍ ନଇଲା କାମାର୍ ଗିନେ ଆର୍ କ୍‍ରାପ୍ କାମାର୍ ଗିନେ କେମା ନ୍‌ମାଗୁଲାଇ। କାଇତାକ୍ ଇସ୍‌ବୁ ଲକ୍‌ମ୍‌ନ୍‌କାର୍‌ ଗିନେ ମକେ ଏତାଇ ଏତାଇ କ୍‍ରି କାନ୍ଦୁକେ ହ୍‌ଳୁଲି।

← Chapter 11 Jump to: Chapter 13 →