2 Timothy 3

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 2 Jump to: Chapter 4 →

1ମ୍‌ତର୍ ମୁଇ ଅବେ କାଇରି କ୍‌ମ୍‌ଲେ ସେରି ମ୍‌ନେର୍‌କା, ଖ୍ରୀଷ୍ଟ ବାଉଳି ଆସ୍‌ତାର୍ ସ୍‌ରାସ୍‌ରି ଦିନ୍ ବେସି କ୍‌ଷ୍ଟ୍‌ ଆସେଦ୍।

2ଲକ୍‍ମ୍‍ନ୍ ନିଜେ ହ୍‌କା ବ୍‍ଲ୍ ଅମ୍‍କେ ଚିନ୍‍ତା କ୍‌ର୍‌ତି, ଦ୍‍ନ୍ ଲ୍‌ବ୍ ଅଉତି, ଲିନ୍ଦା କ୍‌ର୍‌ତି, ବ୍‌ଡ୍‌ହାଣ୍ ଅଉତି, ସେମ୍‍ନ୍ ଉବାସି ଆଇସିର୍ କ୍‌ତା ନ୍‌ମାନି ସେମ୍‌ନ୍‌କେ ଲାଜ୍ କ୍‌ରାଉତି। ସେମ୍‍ନ୍‍କାର୍ ଜୀବନେ ଅତେକ୍ ସ୍‌ରି ବ୍‌ଲି ନ୍‌କଉତି କି ଦନ୍ୟବାଦ୍‌ ହେଁ ନ୍‍ଦେତି।

3ସେମନ୍ କାକେ ଲାଡ୍ ନ୍‌କେର୍‌ତି, ସେମ୍‍ନ୍‍କାର୍ ଲ୍‌ଗେ ଦ୍‌ର୍‌ମ୍ ଜୀବନ୍ ନ୍‌ରେଇ, ଚଣ୍ଡି କ୍‌ତା କ୍ଉତି, ନିଜ୍‍କେ ଅଦିନେ ର୍‌କୁ ନ୍‌ହାର୍‌ତି, ବ୍‌ନାର୍ ଜ୍‌ତୁହର୍ ବେସି ମୁର୍‌କ, ସ୍‌ବୁ ର୍‌କମାର୍ ବ୍‍ଲ୍ ବିଷୟ୍‌କେ ସେମ୍‍ନ୍ ଗୁର୍‌ନା କ୍‌ର୍‌ତି।

4ସେମ୍‍ନ୍ ଗ୍‌ର୍‌ବ୍ କ୍‍ରି ବିନ୍‌ସ୍‌ବୁ ଲକ୍‌କେ ଟକ୍‌ତି, ସେମ୍‍ନ୍‍କାର୍ ବୁଦି ଗ୍ଯାନ୍ ନ୍‌ରେଇ, ସେମ୍‍ନ୍ ଇଶ୍ଵର୍‍କେ ଲାଡ୍‌କ୍‌ରି ସ୍‌ର୍‌ଦା କିଆଲି କ୍‌ରୁକେ ବେସି ବ୍‍ଲ୍ ହାଉତି।

5ସ୍‌ତ୍ ଦ୍‌ର୍‌ମାର୍ ଶ୍‌କ୍‌ତିକେ ସେମ୍‍ନ୍ ମ୍‌ନ୍ ନ୍‌କେରି ଜଗତାର୍ ମାନିୟ ଦ୍‌ର୍‌ମ୍‌କେ ବ୍‍ଲ୍ ବ୍‌ଲି ବାବୁଲାଇ, ସେମ୍‍ନ୍‍କାର୍ ତ୍‌ଇହ୍‌ଣି ତୁଇ ଅଲ୍‌ଗା ଅଉଆ।

6ଅନ୍‌କ୍‌ରି ଲକ୍‍ମ୍‍ନ୍ କ୍‍ତେକ୍ ଗ୍‍ରେ ଜାଇକ୍‍ରି ଦୁର୍‌ବଳ୍ ବିଶ୍‌ବାସ୍‌ ରିଲା ମାଇଜି ଟକିମ୍‌ନ୍‌କେ ହାନ୍ଦାଇ ହ୍‌କାଉତି, ଜୁଇସ୍‌ବୁ ମାଇଜି ଟକିମ୍‌ନ୍ ଜ୍‍ଗତାର୍ ନାନା ର୍‌କମାର୍ ଲାଳ୍‌ସା ତ୍‌ଇ ଆର୍ ଇଚା ହୁରାକ୍‌ରୁକେ ନିଜାର୍ ପାପେ ବୁଡି ଜାଇରେତି ସେମ୍‌ନ୍‌କେ ନିଜାର୍ ଅଦିନେ କ୍‌ର୍‌ତି।

7ଜୁଇସ୍‌ବୁ ଲକ୍‍ମ୍‍ନ୍ ସ୍‌ତ୍ ଜାଣୁକେ ମ୍‌ନ୍‌କ୍‌ର୍‌ତି, ମ୍‍ତର୍ ସ୍‌ତ୍‌କେ ନାହାଉତି ଅନ୍‌କ୍‌ରି ମାଇଜି ଟକିମ୍‌ନ୍‌କେ ସେମ୍‍ନ୍ ଟକ୍‌ତି।

8ଯୁନ୍ନିସ୍ ଆର୍ ଯମ୍ବ୍ରୀସ୍ ଜ୍‌ନ୍‌କ୍‌ରି ମୋଶାର୍ ବିରୁଦେ ଜାଇରିଲାଇ, ସେନ୍‍କ୍‌ରି ସ୍‌ରାସ୍‌ରି ଦିନ୍ ଇ ଦୁଷ୍ଟ ଲକ୍‍ମ୍‍ନ୍ ସ୍‌ତ୍ କାମାର୍ ବିରଦ୍ କ୍‌ର୍‌ତି, ସେମ୍‍ନ୍ ବ୍‌ଇଆ ଅଇଲାଇ ଆତ୍‍ତି ଆର୍ ସେମ୍‍ନ୍‍କାର୍ ବିଶ୍‌ବାସ୍‌ ନ୍‍ଷ୍ଟ୍‌ ଅଇଲିଆଚେ।

9ମ୍‍ତର୍ ସେମ୍‍ନ୍ ବେସି ଆଗେ ଜ୍‌ମ୍ ନ୍‌ହାର୍‌ତି, ସେମ୍‍ନ୍ ବେସି ବକୁଆ ବ୍‌ଲି ସ୍‌ବୁ ଲକ୍‍ମ୍‍ନ୍ ଜାଣ୍‌ତି, ଯୁନ୍ନିସ୍ ଆର୍ ଯମ୍ବ୍ରୀସ୍ ଜୀବନେ ଜୁଇରି ଗଟିରିଲି, ସେମ୍‍ନ୍‍କାର୍ ଜୀବନେ ହେଁ ସେନ୍‍କ୍‌ରି ଗଟେଦ୍।

10ମ୍‍ତର୍ ତୁଇ ମର୍ ଶିକ୍ୟା, ଚାଲାବୁଲା ଆର୍ ଜୀବନାର୍ ଇଚାହର୍ ଜ୍‍ମ୍‍ଲିସ୍, ମର୍ ବିଶ୍‌ବାସ୍‌, ସ୍‌ମ୍ବାଳ୍‌ତାର୍, ଲାଡ୍, ନମ୍‌ର, ଦୁକ୍‍କ୍‍ଷ୍ଟ୍‌ ତ୍‌ଇ ସ୍‌ବୁ ଦ୍‍କି ଆଚ୍‌ସି।

11ତୁଇ ଜାଣି ଆଚ୍‌ସି ଯେ ମୁଇ କ୍‍ନ୍‍କାର୍ ଆନ୍ତିୟଖିଆ ତ୍‌ଇ, ଇକନୀୟ ତ୍‌ଇ ଆର୍ ଲୁସ୍‌ରା ସ୍‌ହରେ ବେସି ଲିନ୍ଦା ତାଳ୍‌ନା ହାଇଲେ ଆଚି। ମ୍‍ତର୍ ମାପ୍‌ରୁ ମକେ ସେତିହ୍‍ଣି ଉଦାର୍‌ କ୍‌ଲାଆଚେ।

12ଜ୍‌ତେକ୍ ଲକ୍‍ମ୍‍ନ୍ ଖ୍ରୀଷ୍ଟ ଯୀଶୁର୍ ସ୍‍ଙ୍ଗ୍‍ ମିସି ଇଶ୍ଵର୍‍କେ ଡିରିକ୍‍ରି ଜୀବନ୍ ବିତାମ୍‌କେ ମ୍‌ନ୍‌କ୍‌ର୍‌ତି, ସେମ୍‍ନ୍ ବେସି ଲିନ୍ଦା ତାଳ୍‌ନା ହାଉତି।

13ମ୍‍ତର୍ ଦୁଷ୍ଟ ଲକ୍‍ମ୍‍ନ୍ ଆର୍ ଟକ୍‍ତା ଲକ୍‍ମ୍‍ନ୍ ବିନ୍‌ସ୍‌ବୁ ଲକ୍‌ମ୍‍ନ୍‌କେ ଟକ୍‌ତି, ଆର୍ ହ୍‌ଚେ ସେମ୍‍ନ୍ ନିଜେ ଟକି ଅଇକ୍‌ରି ନ୍‍ଷ୍ଟ୍‌ ଅଉତି।

14ଜୁଇସ୍‌ବୁ ସ୍‌ତ୍ ଶିକ୍ୟା ହାଇକ୍‌ରି ବିଶ୍‍ବାସେ ଅଟୁଆ ଅଇଆଚାସ୍ ସେସ୍‌ବୁ ତ୍‌ଇ ତୁମିମ୍‍ନ୍ ତିର୍‌ଅଇ ରିଆ, ତୁମାର୍ ମାଷ୍ଟେର୍ କେ ସେରି ତୁମି ଜାଣିଆଚାସ୍।

15ଖ୍ରୀଷ୍ଟ ଯୀଶୁର୍ ଲ୍‌ଗେ ବିଶ୍‌ବାସ୍‌ କ୍‍ରି ଉଦାର୍‌ ହାଉତାର୍ ଗିଆନ୍ ଜୁଇ ପବିତର୍‌ ଦ୍‌ର୍‌ମ୍ ଶାସ୍‌ତର୍ ଲ୍‌ଗେ ଆଚେ, ତୁଇ ହିଲାବ୍‌ଳ୍ ହ୍‍ଣି ସେସ୍‌ବୁ ହଳିକ୍‌ରି ଆସୁଲିସ୍।

16ସ୍‌ବୁ ଦ୍‌ର୍‌ମ୍ ଶାସ୍‌ତର୍ ଇଶ୍ଵରାର୍ ଆଦେଶ୍ ହର୍ ଲେକା ଅଇଲିଆଚେ ଆର୍ ସେସ୍‌ବୁ ସ୍‌ତ୍ ଶିକ୍ୟା ଦେତାର୍ ଗିନେ ବେସି ଲଡାଆଚେ, ସେରି ବୁଲ୍‌କଲେକ୍‌ ଚେତାଇ ଦ୍‌ଇଦ୍, ସେରି ବୁଲ୍‌କେ ଟିକ୍ କ୍‍ରେଦ୍। ଆର୍ ଟିକ୍‌ବାବେ ବାଚୁକେ ଆଦେଶ୍ ଦ୍‌ଇଦ୍।

17ଇ ଦ୍‌ର୍‌ମ୍ ଶାସ୍‌ତରାର୍ ସାଇଜେ ତୁଇ ଇଶ୍ଵରାର୍ ଦ୍‍ଙ୍ଗ୍‍ଳା ସ୍‌ବୁ ର୍‌କମାର୍ ବ୍‌ଲ୍‌କାମ୍ କ୍‌ରୁକେ ଲଳାରିଲା ଶ୍‌କ୍‌ତି ଆର୍ ଶିକ୍ୟା ହାଇ ର୍‌ଇଦ୍।

← Chapter 2 Jump to: Chapter 4 →