1 Chronicles 15

Bugis

← Chapter 14 Jump to: Chapter 16 →

1Patettonni Daud bola-bola untu' aléna ri Kota Daud, sibawa passadiya onrong untu' Petti Assijancinna Allataala nainappa pasang kéma untu' Pettiéro.

2Makkedai Daud, “Banna tau Léwié wedding makkai Petti Assijancinna Puwangnge, saba' mennang ritu napilé Puwangnge untu' mpuléi iyaro Pettié sibawa mattumani ri Aléna untu' mannennungeng.”

3Nanaobbini Daud sininna tau Israélié lao ri Yérusalém untu' palétté'i Petti Assijancinna Puwangnge lao ri onrong iya puraé napassadiya.

4Nainappa nasuro Daud wija-wijanna Harun sibawa tau Léwié maddeppungeng.

5Napolé ri appang Kéhat, suku Léwi, malluruni Uriél iya pimpingngéngngi 120 anggota appanna.

6Polé ri appang Mérari malluruni Asaya iya pimpingngéngngi 220 tau.

7Polé ri appang Gérson mallurini Yoél iya pimpingngéngngi 130 tau.

8Polé ri appang Elsafan malluruni Sémaya iya pimpingngéngngi 200 tau.

9Polé ri appang Hébron malluruni Eliél iya pimpingngéngngi 80 tau.

10Sibawa polé ri appang Uziél malluruni Aminadab iya pimpingngéngngi 112 tau.

11Nainappa naobbi Daud Imang Zadok sibawa Imang Abyatar enrengngé iya enneng tau Léwiéro, iyanaritu: Uriél, Asaya, Yoél, Sémaya, Eliél sibawa Aminadab.

12Adanna Daud lao ri mennang, “Ikonaritu pamimping appang ri laleng suku Léwi. Rimakkuwannanaro, sitinajako sibawa sining tau suku Léwi laingngé mappépaccing alé kuwammengngi mulléi palétté'i Petti Assijancinna Puwangnge, Allataalana Israélié, ri onrong iya puraé upassadiya.

13Wettunna iyaro Pettié untu' bunge'-bunge'na ripalétté, dé'ko gaga kuwaro untu' tiwii. Rimakkuwannanaro Puwangnge, Allataalata, hukkukki saba' tasompai dé' nasituru élo-Na.”

14Jaji sining imangngé sibawa tau Léwié mappépaccing aléni kuwammengngi weddingngi napalétté Petti Assijancinna Puwangnge, Allataalana Israélié.

15Na wettunna iyaro Pettié ripalétté, nauléni mennang sibawa aju pabbulé, situru atoreng iya nabbéréyangngé Puwangnge naolai Musa.

16Nasuro towi Daud iyaro sining pamimping tau Léwié kuwammengngi nasuroi siyagangngaré tau polé ri sukunna mennang untu' makkélong sibawa macculéyangngi élokkélong mariyo-riyoé ri kacapié sibawa simbal-é.

17Polé ri yelle'na kaluwarga-kaluwarga pakkélongngé, napiléni mennang sining tau mangoloéwé untu' macculéyangngi simbal gessaé: Héman ana' Yoél silaong sumpulolona iya riyasengngé Asaf ana' Bérékhya, sibawa Etan ana' Kusaya polé ri appang Mérari. Untu' maccowériwi mennang enrengngé macculéyang kacapi iya matanré oninna napiléi sining tau Léwi mangoloéwé: Zakharia, Yaaziél, Semiramot, Yéhiél, Uni, Eliab, Maaséya sibawa Bénaya. Untu' macculéyang kacapi iya mariyawaé oninna napiléi sining tau Léwi mangoloéwé: Matica, Elifélé, Miknéya, Azazya sibawa duwa pengawalna Bolana Puwangnge, iyanaritu Obéd-Edom sibawa Yéiél.

22Kénanya ripilé untu' kapalaiwi pacculé-culé musi' polé ri suku Léwiéro, saba' ahli musi'i.

23Bérékhya sibawa Elkana silaong Obéd-Edom sibawa Yéhia ripilé mancaji pengawalna Petti Assijancinna Puwangnge. Sining imang mangoloéwé: Sébanya, Yosafat, Nétaneel, Amasai, Zakharia, Bénaya sibawa Eliézer ripilé untu' paoniwi tarompé'é ri yolona Pettiéro.

25Nanalaona Arung Daud silaong sining pamimpinna Israélié sibawa sining parawiraé ri bolana Obéd-Edom untu' malai Petti Assijancingngéro sibawa ramé-ramé battowa.

26Pitu saping lai sibawa pitu bimbala riyakkasuwiyangeng lao ri Allataala nasaba purai Natulung tau Léwié iya makkaéngngi Petti Assijancingngéro.

27Iyaro wettué Daud mappaké jumba polé ri kaing lénang alusu'é, makkuwatoro sining pacculé musi'é na Kénanya pimpingngi mennang enrengngé sining tau Léwi iya makkaéngngi Petti Assijancingngéro. Paké towi Daud waju Efod.

28Sininna umma Israélié laowi tinrosiwi Petti Assijancingngé lettu ri Yérusalém sibawa gora-gora marennu, oni tarompé, napiri, simbal sibawa kacapi.

29Wettunna iyaro Pettié mattengngang ritiwi muttama ri laleng kota, Mikhal ana' makkunrainna Saul célléng polé ri tellongengngé sibawa mitai Arung Daud séré enrengngé mariyo-riyo. Namajana pappéneddinna Mikhal mitai Daud.

← Chapter 14 Jump to: Chapter 16 →