Joshua 21

Bugis

← Chapter 20 Jump to: Chapter 22 →

1Riséuwaé esso sining kapala kaluwargaé ri laleng suku Léwi laowi ri Silo ri wanuwa Kanaan, sibawa mangolo ri Imang Eléazar, Yosua ana' Nun, sibawa sining kapala kaluwargaé risininna suku bangsa Israélié. Makkedai mennang, “Naolai Musa, Puwangnge pura mapparéntangngi kuwammengngi lao ri idi, sining tau Léwié, riwérékki kota-kota untu' onrotta monro sibawa tana-tana padang ri seddéna kota-kotaéro untu' olokolo'ta.”

3Naccowérini tau Israélié paréntana Puwangnge. Polé ri tana appunnangeng aléna mennang, nawérénni tau Léwié kota-kota mattentué sibawa tana-tana padanna.

4Iya bunge-bunge'é tarimai kota-kotana iyanaritu kaluwarga-kaluwarga polé ri appanna Kéhat ri laleng suku Léwi. Kaluwarga-kaluwarga wija-wijanna Imang Harun riwéréngngi seppulo tellu kota polé ri daérana suku Yéhuda, Siméon sibawa Bényamin.

5Kaluwarga-kaluwarga laingngé polé ri appanna Kéhat riwéréngngi seppulo kota polé ri daérana suku Efraim, suku Dan sibawa suku Manasyé ri seddé yajanna Salo Yordan.

6Appanna Gérson lolongengngi seppulo tellu kota polé ri daérana suku Isakhar, Asyer, Naftali sibawa suku Manasyé iya ri seddé alaunaé Salo Yordan.

7Kaluwarga-kaluwarga polé ri appanna Mérari lolongengngi seppulo duwa kota polé ri daérana Rubén, Gad sibawa Zébulon.

8Makkuwaniro bangsa Israélié tawa-tawai kota-kotaéro sibawa tana-tana padanna naolai loteréi lao ri tau Léwié, pada-pada iya napparéntangngé Puwangnge lao ri Musa.

← Chapter 20 Jump to: Chapter 22 →