2 Kings 12

Chin (Mara Bible RV (BSI))

← Chapter 11 Jump to: Chapter 13 →

1Zehu abeina kô sarina liata, Zehôasâ a bei pathao ta, Zerusale liata kô sypalih â bei. A nô moh cha Besebâ zuah Zibia a châ.

2Zehôasâ cha theihthaipa Zehôdâ ta a pachu chhôh zydua cha, a hro chhôh zydua ta Abeipa mohmô ta hmo dopa tao ta.

3Su sâhpazy deikua cha paraopa châ leipa ta, Izarei phopi ta su sâhpazy liata atheihnazy hlâ ei ta, ropahâhpazy ama rao thlâh ha chy.

4Zehôasâ ta theihthaipazy hnohta “ Abeipa o liata a ngiakheipa hmo pathaihpa chatlaina sôh zydua, chyhsa to thyupa sôh a ngiapa zydua nata chyhsa ta lôhthai ta Abeipa o lâ a vaw cheipa sôh zydua cha,

5theihthaipazy ta ama hnohta a vaw piepa chyu tawhta la ei sala, Achhyna o raona ama hmôpa maih taopathi mawh ei sy,” tah ta.

6Châhrasala Bei Zehôasâ kô kih nata kô thôh â beina taih chhao ta, theihthaipazy ta Achhyna o cha taopathi leipa ei ta.

7Chavâta Bei Zehôasâ ta theihthaipa Zehôdâ nata theihthai hropazy aw ta, ama hnohta, “Khazia Achhyna o nama taopathi to vei? Chavâta tahmâ tawhta cha nâmo hnohta châ pietuhpazy tawhta sôh la khao leipa u la, Achhyna o raopa tao nawpa sôh liata tlao pahmaoh muh vy,” tah ta.

8Chavâta theihthaipazy ta chyhsazy tawhta tâkâ dao khao lei awpa nata Achhyna o raopazy chhao âmo ta taopathi lei awpa cha paryhsa ei ta.

9Theihthaipa Zehôdâ ta thobyh miakha la ta, a phiehru liata a khaoh vieh ta, Abeipa o lâ angiana chachâh lâ maisâh thaby liata patyu ta. Ochhi vaituhpa theihthaipazy ta Abeipa o liata tâkâ a vaw pangiapa zydua, cha liata khô lymâ ei ta.

10Thobyh liata tâkâ a hluh kaw bâ tahpa ama pahno nahta, abei chârohtuhpa nata theihthai beichaipa khy ei ta, sykhao ta chaty ei ta, Abeipa o liata tâkâ a ypa zie cha reih tyh ei ta.

11Ama tâkâ reipa cha Abeipa o rai hriatuhpazy mohôhtuhpazy ku liata hlâ ei ta, âmo ta Abeipa o a sapa zôthaipazy nata o satuhpazy hlao châta ama hmâh tyh.

12Abeipa o raopa taopathi nawpa ta alô khietuhpa nata alô khaituhpazy hlao châta chhao hmâh ei ta, tho chalei nawpa nata alô chaona châta nata Abeipa o taopathi nawpa ta byuhpa maih châta ama hmâh lymâ.

13Abeipa o chhôh lâ ama vaw cheipa tâkâ cha, Abeipa o liata tâkâ biebuhzy, meiôh lao chakienazy, rahôzy, chiahmiezy, ngôh hmobaohzy nata tâkâ hmobaohzy taona châta deikua hmâh veih ei.

14Abeipa o taopathina rai hriatuhpazy raihria nawpa châta piepa a châ.

15Hriatuhpazy hlao pie awpa ta tâkâ ama pavaosapazy ku liata tâkâ ypa chhao, â do ngaitapa ta ama tao lymâpa vâta, mohpasia hlei veih ei.

16Thaileichâna hlâna tâkâzy nata moleina hlâna tâkâzy deikua cha, theihthaipazy tovyuh a châpa vâta, Abeipa o lâ vaw cheih veih ei.

17Cha daihti liata Aramia bei Hâze cha khy ta, Kâthâ khih a dyuh ta, la ta. Hâze cha Zerusale lâ khy lymâ a chhuah ta.

18Zudâh bei Zehôasâ ta a pathlatuhpa Zudâh bei Zehôsaphâ, Zehôrâ nata Ahazia zy ta ama vaw hlâ hapa hmo ziehpa zydua nata ano daihti liata hmo ziehpa a pachôpazy nata Abeipa o liata nata abei o liata ryubyhzy liata ngôh a ypa zydua la ta, Aramia bei Hâze hnohta paphao ta. Chatanachata Hâze ta Zerusale cha kuasai ha ta.

19Zôasâ thâtih hropazy nata a hmotaopa zydua cha Zudâh beizy thâtih rona châbu liata ropa a châ.

20Bei Zôasâ chakaotuhpazy ta thyu ei ta, abei cha arulâta tei ei ta, Silâ lâ zuna lâpi liata thokhy ta dôhpa o liata thie ha ei ta.

21A chakaotuhpa Simiathi sawchapawpa Zôzakâ nata Sôme sawchapawpa Zehôzabâ ta ama thie haw. A pathlatuhpazy hnohta Dâvi khihpi liata pabu ei ta, a sawchapawpa Amazia ta ano su liata â bei.

← Chapter 11 Jump to: Chapter 13 →