Hosea 12

Chin (Mara Bible RV (BSI))

← Chapter 11 Jump to: Chapter 13 →

1Epharai cha ziza chahâpa ta, Noh y ta nochhi thlih a chadai ta, Haiphiana nata atudaina ama papôhsa. Asuria nata biehrai tao ei ta, Izi râh lâ sathaw ama paphao tyh.

2Abeipa ta Zudâh thailei pachâsa ta, A hrozie hawhta Zakaw cha hrie aw ta, A hmotaopazy hawhta viari a thô aw.

3Chhi liata a y nota a unawhpa phei patu ta, Vaw pitloh ta Khazohpa â pia heih.

4Vâlyuhchâpa a pia ta a pahnie haw; Chana chôta a khokheina â haw. Bethel liata Khazohpa a tyh ta, Cha liata Khazohpa ta bie miah â chho.

5Zehôvâh, Pheisaihzy Khazohpa cha, A moh Zehôvâh tahpa ta a thei thlâh ha awpa a châ.

6Na Khazohpa lâ kua la, Ngâchhihna nata adona patu la, Na Khazohpa cha khâ ngâ mah y!

7Sôhdaohpa ta khopathliahna doleipa hmâh ta, Chyhsa tlybaipa a paphasa kaw.

8Epharai cha a palai kawpa ta, “Âh, hneirôh ha na ta, Sôh nah thih ei hnei haw; Ei raihria zydua liata moleina hmô khao leipa aw ei ta, Paraona keima liata hmô khao aw veih ei,” a tah.

9Izi râh tawhna khata, Kei he Abeipa na Khazohpa châ na ta; Kyhchhi nohzy hawhna khata, Poh ozy liata ei cha pahrâsa heih aw.

10Hrohsopazy hnohta bie reih na ta, Aluahna hluhpi ei pie ei; Hrohsopazy hmâpa ta Pakhona biezy ei reih tyh.

11Kilia liata moleina a y khiahta cha, Hraoleipa lâta ama pua tlai aw: Kilkal liata viahchao tôhpazy ta atheihna hlâ ei ta, Ama maisâhzy cha, Leipalie tlâh liata Alô pahmaohpa hawh dei a châ.

12Zakaw cha Aramia râh lâ a râ ta, Cha liata Izarei cha lapinô châta a chakao; Lapinô châta mietakuzy a vaih tyh.

13Hrohsopa hmâpa ta, Abeipa ta Izi tawhta Izarei a kaw chhi ta; Hrohsopa hmâpa ta, A hrôbieh lymâ.

14Epharai ta Abeipa cha thata a hie a pahâh haw; Chavâta a thisaih maoh paphaosa aw ta, A reipachhienazy vâta viari a thô aw.

← Chapter 11 Jump to: Chapter 13 →