James 2

Chin (Mara Bible RV (BSI))

← Chapter 1 Jump to: Chapter 3 →

1Unawh saih u, eima Beipa Zisu Krista, rônahna Beipa ngiapâtuhpa nama châpa hawhta, khokhei viapa hnei khuh vy.

2Namâ pakhyna o liata ngôh kusadizy a kypa nata chysia phapa a tobipa chyhsa a vaw ngia ta, chysia chhiepa a tobipa dyhchhiepa a vaw ngia hra ta,

3chysia phapa a tobipa cha pachâ peimawh viapa ta, a hnohta, “Atyuna phapa liana he a tyuh mah y,” tah ei chi ta, dyhchhiepa hnohta, “Hao liata a kei duah teh,” tlyma, “Ei phei thaby siphiah liata a tyuh teh,” tlyma nama tah khiahta cha,

4nâmo nata nâmo a pathluapa châ ei chi ta, palôh moleipa a phaohpa pachiatuhpazy châ aw veih ei chi mâ?

5Unawh kho ngaitapa saih u, pachâ tua u! Khizaw pachâ ta dyhchhiepazy cha, ngiapâna liata hneirôh awpa nata ano kyh pachâtuhpazy hnohta bie â taihpa khinarâh ryutotuhpazy châ awpa ta, Khazohpa ta â tlyhpazy châ veih ei ma?

6Nâmo deikua cha, dyhchhiepa nama mohnao. Châ tlybaipa nata pachiana lâ châ daophituhpazy cha hneirôhpazy châ tyh veih ei ma?

7Âmo cha moh zachhihpa nama phaopa a reipachhietuhpazy châ veih ei mâ?

8Biehrai ta, “Nâma kyh nâ pachâpa hawhta na vaih kyh na pachâ awpa a châ,” tahpa abeina ryhpa he nama zyh khiahta cha, nama tao pha na.

9Khokhei viapa nama hnei khiahta deikua cha, moleina hmo a taopa châ ei chi ta, hmoparaotuhpa nama châ tahpa ta ryhpa ta thailei a cha pachâsa ei.

10Ahy rai ryhpa zydua zyh paki hra sala, kyh kha a parao khiahta cha, a zydua liata thaileipa a châ.

11“Aphei kha,” a tahtuhpa cha, “Liany cheih kha,” a tahtuhpa a châ hra. Chavâta nâ phei leipa chhao ta, liany a cheihpa na châ khiahta cha, ryhpa a paraotuhpa na châ.

12Khotalaina ryhpa hmâpa ta ama thâtih pachia awpazy hawhta bie reih u la, hmo tao muh vy.

13Zawngiahna a hnei leipa chyhsa cha, pachiana ta ano cha zawh a ngiah hra aw vei. Zawngiahna cha pachiana hlâta a rônah via.

14Unawh saih u, chyhsa ta, “Ngiapâna ei hnei,” tah sala, hmotaopa a hnei tlôh leipa khiahta cha, khâpa phahnaina a hnei? Cha hawhpa ngiapâna chata ano a pachha thei aw ma?

15Unawhpa tlyma, sietanô tlyma, chysia hnei leipa nata noh chareih nie awpa phahlapa ta y sala,

16nama hry liata ahy tlyma ta a hnohta, “Thlalôhpa ta sie la, a lalôhpa ta y la, rihbiepa ta y mah y,” tah sala, pôhpa châta â ngiahpa a pie tlôh leipa khiahta cha, khâpa a phahnai aw?

17Cha hawhna chata, ngiapâna cha hmotaopa hnei leipa ta ano dei ta a y khiahta cha athipa a châ.

18Chyhsa ahy tlyma ta, “Nâ ta ngiapâna hnei chi ta, kei ta hmotaopa ei hnei,” a tah thei. Hmotaopa a hlao leipa nâ ngiapâna cha na pahmô tua, kei ta ei ngiapâna cha ei hmotaopa ta ei cha pahmô aw.

19Khazohpa cha pakha dei a y tahpa a ngiapâ chi ta, a pha na. Ahripazy chhao ta cha cha a ngiapâ ei ta, amâ chalyu tyh mâh tâh!

20Hy chyhsa hrupa y, hmotaopa a hlao leipa ngiapâna cha khâpa hmah châ vei tahpa pahmô awpa na khoh ma?

21Miah pathlatuhpa Abarahâ ta a sawchapawpa Aisika maisâh chô liata a hlâ nona kha, hmotaopa vâta thai pachâsapa châ vei mâ?

22Â ngiapâna cha a hmotaopa nata hria khoh ta, ngiapâna cha hmotaopa ta a paki tahpa na hmô.

23Chatanachata Biehrai ta, “Abarahâ cha Khazohpa a ngiapâ ta, cha ngiapâna cha a siana ta raopa a châ,” a tahpa bie kha vaw tlô ta, Abarahâ cha Khazohpa viasa ta bipa a châ.

24Ngiapâna vâ dei châ leipa ta, hmotaopa vâta chyhsa ta thai tlao a châ tyh tahpa nama pahno.

25Cha hawhna chata âzuahnô Rahâbi chhao kha, lyuhchâpazy a vaw ly ta, lâpi hropa lâta a pasiesapa liana khata, hmotaopa vâta thai pachâsapa a châ!

26Thlahpa a hlao leipa pôhpa cha athipa a châ. Cha hawhna chata hmotaopa a hlao leipa ngiapâna chhao athipa a châ hra.

← Chapter 1 Jump to: Chapter 3 →