James 4

Chin (Mara Bible RV (BSI))

← Chapter 3 Jump to: Chapter 5 →

1Nama hry liata adyuhna nata ahryunazy he khâpa tawhta a pua tyhpa ma a châ? Nama aohraohnazy vâta nama pôhpa pachiahpazy liata adyuhna a tao tyhpa châ vei ma?

2Khopa hnei ei chi ta, hnei thei tlôh leipa ei chi ta, chavâta liany nama cheih tyh. Uahva ei chi ta, hnei thei tlôh leipa ei chi ta, chavâta a dyuh ei chi ta, namâ hryuh tyh. Nama hia leipa vâta nama hmô leipa a châ.

3Hiah ei chi ta, nama hiapa su leipa ta, nama aohraohna châta hmâ awpa ta nama hiapa vâta, hmô veih ei chi.

4Nâmo, apheipa saih u, khizaw viasa châpa he Khazohpa nata akhakhaina a châ tahpa pahno veih ei chi ma? Chavâta ahy rai khizaw viasa châ a khohpa maih, Khazohpa khakhaipa ta â tao tyh.

5Biehrai ta, “Keimo liata pahrâ awpa ta a taopa thlahpa cha tlaichhai ta a hiatlia ngaita,” a tahpa he achhuahna y leipa ta a reipa a châ na ta nama pangiasa ma?

6Châhrasala ngiachhiena hluh via ta tlao a vaohei tyh. Chavâta Biehrai ta, “Khazohpa ta apalaipazy a dyuh ta, areisipazy deikua a ngiachhie tyh,” a tahpa a châ.

7Chavâta Khazohpa liata a ngiarih teh u. Ahripa a dyuh u la, a châ râsai aw ei.

8Khazohpa a hnia u la, ano chhao a châ hnia aw ei. Nâmo, moleipa saih u, nama kuzy a si u la, palôh a zawvawpa saih u, nama palôhzy pathai teh u.

9Pachârôhpa ta y u la, mâchhiesa u la, cha teh u. Nama pahneina cha mâchhiesana lâta a lie sala, namâ lyna chhao hnabeidyna lâta a lie mawh sy.

10Abeipa hmiakô liata a panawh u la, Abeipa ta a cha palyupalih aw ei.

11Unawh saih u, nâmo nata nâmo a reipachhie khuh vy. Ahy rai unawhpa a reipachhiepa tlyma, unawhpa a seipa tlyma cha, ryhpa a reipachhiepa nata a seipa a châ. Ryhpa na sei khiahta cha, ryhpa a zyhtuhpa châ leipa chi ta, ryhpa a pachiatuhpa tlao na châ.

12Ryhpa pietuhpa nata a pachiatuhpa pakha deita a y. Ano cha a pachha theipa nata a pahlei theipa a châ. Na vaih a seituhpa chi cha ahy ma na châ tly?

13Tahmâ pachâ tua u, nâmo, “Tanoh tlyma, mylâ tlyma, cha khihpi lâ sie aw pi ta, cha liata kô kha y aw pi ta, sôh palie aw pi ta, athôhna eima hmô aw,” a tahtuhpazy saih u,

14mylâ khâpa hmo ma a y aw tahpa pahno tlôh ei chi va. Nama hrona cha khâpa ma a châ? Tihu buakha a vaw lâ ta, a lei heihpa hawh dei mah nama châ tâh.

15Cha hawhta reih leipa u la, “Abeipa ta â ryh a tah khiahta cha, hroh aw pi ta, he hmo he tao aw pi ta, cha hmo cha eima tao aw,” tlao nama tah awpa a châ.

16Châhrasala a pasâhsapa ta, a palai ei chi ta, cha hawhpa apalaina zydua cha moleina a châ.

17Chavâta ahy rai hmo pha tao awpa pahno thlâh ha ta, a tao tlôh leipa cha, ano châta moleina a châ.

← Chapter 3 Jump to: Chapter 5 →