James 5

Chin (Mara Bible RV (BSI))

← Chapter 4 Jump to:

1Nâmo, hneirôhpa saih u, a vy u la, nama chô liata rietheina vaw tlô haipazy vâta cha u la, thata sâh teh u.

2Nama hneirônazy hmy ha ta, nama chysiazy chhoma-u ta a chaih khai haw.

3Nama ngôh nata tâkâzy a saiie khai ha ta, a saiiepa cha nama thaileizie pahnosana châ aw ta, nama sapa mei hawhta a kâ aw. Noh hnôhchaipazy liata ryu a pachôpa nama châ.

4Nathlie tua u, nama lyu rai a hriapazy hlao â doleipa ta nama patâhpazy khata nâmo leihpa ta awh ei ta, hriatuhpazy chana pyu cha, Pheisaihzy Abeipa nakhaoh liata â ngia haw.

5Khizaw liana heta sapa palysapa ta phasapa ta hroh ei chi ta, thina noh zy lia taihta nama palôh namâ palysa.

6Chyhsa siapazy thailei pachâsa ei chi ta, châ dyuh leipazy nama thie haw.

7Chavâta unawh saih u, Abeipa a vy hlâlei palôh pasipa ta y teh u. Pachâ tua u, lyuhneituhpa cha vâsua hmiatuapa nata vâsua hnôh viapa a hmô hlâlei alei thei sôhpa a hâ hualua tyh.

8Nâmo chhao palôh pasipa ta y u la, Abeipa avyna a hnia ha tlôh ta, chavâta palôh a ipa ta y teh u.

9Unawh saih u, seipa ta nama y lei nawpa ta, nâmo nata nâmo a paphôh thlu khuh vy. Moh tua u, Ryureituhpa cha ochhi thaby liata â duah thlâh haw.

10Unawh saih u, Abeipa moh ta bie a reihpa hrohsopazy kha, pasataona nata palôh pasina kyh liata a mopâ awpa ta hmâh teh u.

11Pachâ teh u, pasataotuhpazy cha nohlaopa tah pi ta, Zawbâ palôh pasizie kha thei ei chi ta, Abeipa hmochhuahpa chhao hmô ei chi ta, Abeipa cha ngiachhietuhpa nata zawngiahtuhpa a châpa nama hmô haw.

12Châhrasala unawh saih u, cha zydua hlâta peimawh chaipa cha, chhiesa lei awpa a châ. Avâ reipa ta tlyma, alei reipa ta tlyma, hmo hropa kheihawhpa reipa ta tlyma, chhiesapa ta bie a taih leipa u la, thailei pachâsapa ta nama y lei nawpa ta, a châpa cha “a châ” tah u la, a châ leipa cha, “châ vei” tah lymâ teh u.

13Nama hry liata pasataopa ama y ma? Thlahchhâ mawh sy. Alypa ama y ma? Reithaina hla sa mawh sy.

14Nama hry liata tlâhleipa ama y ma? Awnanopa machâzy aw sala, âmo ta Abeipa moh ta sathaw thupa ta, ano châta thlahchhâ mawh ei sy.

15Ngiapâna ta thlahchhâna ta tlâhleipa cha pachha aw ta, Abeipa ta ano cha a pathyu aw. Moleina hmo a taopa a châ khiahta cha, a ngiahthaipa a châ aw.

16Chavâta patlâhpa ta nama y thei nawpa ta, nama moleinazy reihpha a cheih raihrie u la, thlah a chhâkhei raihrie teh u. Chyhsa siapa thlahchhâna ta hmo rônahpa a tao tyh.

17Elaizâh kha keimo hawhpa nôchâ a phaohpa chyhsapa châ ta, avâ suah lei awpa ta phahnai khoh ngaitapa ta thlahchhâ ta, kô thôh nata thla charu chhôh zydua alei chô liata avâ suah khao vei.

18Chatawhcha thlahchhâ heih ta, avâ ta avâ pasuasa ta, alei ta thei a pathei heih.

19Unawh saih u, nama hry liata biehmeiseihpa tawhta pavia sala, ahy tlyma ta â vaw chhi heih khiahta cha,

20a paviana lâpi tawhta moleipa a chhi pakhuatuhpa cha, thina tawhta a thlahpa a pachhapa châ aw ta, a moleina hluhpi a khupa haw tahpa a pahno mawh sy.

← Chapter 4 Jump to: