Jonah 1

Chin (Mara Bible RV (BSI))

Jump to: Chapter 2 →

1Amitai sawchapawpa Zawna hnohta Abeipa bie vaw tlô ta,

2a hnohta, “Thyu la, Ninivâ khihpi, hao khihpi rônahpa lâ hao sie la, bie kei chho mah y, ama paraona ei hmiakô liata a kaw tlô haw,” tah ta.

3Châhrasala Zawna cha Tâsi lâ tlao a râ awpa ta Abeipa hmiakô tawhta thyu ta. Zôpâ khih lâ zu ta, Tâsi lâ a sie awpa balyh hmô ta. Sie mâ pie ta, Abeipa hmiakô tawhta a râ syulyu ha awpa ta, Tâsi lâ a sie awpazy chhaota balyh chhôh lâ cha a ngia ta.

4Châhrasala Abeipa ta thlihpipa ru ngaitapa tilaipi chô liata vaw tuah ta, chatanachata chothyu ru ngaitapa tilaipi liata vaw pathli ta, balyh cha rao daihmâ ta.

5Balyh puhpazy cha chi ngaita ei ta, ama khazoh pado chyu ei ta. Balyh cha âmo châta â hua thei nawpa ta, balyh chhôh liata hmozy cha tilaipi lâ pazaw ei ta. Zawna deikua cha balyh chhôh chaipa liata a ngia ta, a zia ta, mokuh pahâh kawpa ta a mô syulyu ha ta.

6Balyh hyutuhpa cha ano lâ a vy ta, a hnohta, “Nâ a môpa, kheihtazie ta e? Thyu la, na khazoh pado teh! Khazoh chata eima leidia lei nawpa ta, miah a pachâ ngyu aw mâh tâh,” tah ta.

7Balyh puhpazy a chhohia ei ta, “A vy teh u, he hmo pha leipa eima chô liata a tlôpa he ahy vâta ma tahpa eima pahno thei nawpa ta nuby a dao ei suh u,” tah ei ta. Nuby a dao ei ta, Zawna chô liata tlu ta.

8Zawna hnohta, “Ngiachhiepa ta miah chho teh, he hmo pha leipa he ahy vâta ma eima chô liata a vaw tlô tly? Khâpa rai ma na hria? Khataih tawhta a vypa ma na châ? Na râh khâpa râh ma a châ? Khâpa phopi ma na châ?” tah ei ta.

9Zawna ta âmo cha a chhy ta, “Hebrai chyhsa châ na ta, Abeipa, avâ Khazohpa, tilaipi nata alei hipa a taotuhpa a chipa ei châ,” tah ta.

10Balyh puhpazy cha chi ngaita ei ta, a hnohta, “Khâpa hmo ma na tao haw,” tah ei ta. A chhopa vâ ei ta, Abeipa hmiakô tawhta a râpa a châzie pahno ei ta.

11Chatawhcha a hnohta, “Eima châta tilaipi â chalih thei nawpa ta, kheihta ma eima cha tao aw?” tah ei ta. Tilaipi cha a chatlao via ngâ kaw ta.

12Zawna ta ama hnohta, “Na chalo u la, tilaipi lâ na pazaw syulyu ha teh u, chatanachata nama châta tilaipi â vaw chalih ha aw. He chothyu ru ngaitapa he keima vâta nama chô liata a vaw tlôpa a châ tahpa ei pahno,” tah ta.

13Chatahrasala, balyh puhpazy ta ngiahkâ lâ kua awpa ta balyh cha thata hia ei ta, châhrasala tilaipi ta â chatlao thlu via ngâ thlâh hapa vâ ei ta, tao thei leipa ei ta.

14Chavâta Abeipa cha pado ei ta, “Hy Abeipa, eima châ haw na, eima châ haw chaimâh na. He chyhsa hrona la awpa vâta keimo he eima leidia awpa pasaih leipa la, paraona a hnei leipa thisaih maoh eima chô liata rie patlôsa khah y. Hy Abeipa, nâma ta na khohpa hawhta na taopa châ tlôh ta,” tah ei ta.

15Chatawhcha Zawna cha chalo ei ta, tilaipi lâ pazaw ei ta, tilaipi a chatlaopa cha a chalih ha ta.

16Balyh puhpazy ta Abeipa cha chi ngaita ei ta, Abeipa lâ atheihna hlâpa ta, biezy a taih ei ta.

17Chatawhcha Abeipa ta Zawna palâ awpa ta nga laipa rao ta. Zawna cha nga py chhôh liata noh thôh nata zâ thôh y ta.

Jump to: Chapter 2 →