Joshua 20

Chin (Mara Bible RV (BSI))

← Chapter 19 Jump to: Chapter 21 →

1Chatawhcha Abeipa ta Zawsua hnohta,

2“Mawsi hmâpa ta nama hnohta ei rei hapa hawhna khata, abohna khihpizy rao awpa ta Izarei sawzy chho teh.

3Chatanachata achhuahna y leipa ta chyhsa a thie pathleipazy tlyma, pahno leipa ta a thie pathleipazy tlyma, abohna khihpizy lâ cha a râ aw ei ta, thisaih phuh latuhpa tawhta namâ bohna su a châ aw.

4Chyhsa a thie pathleipa cha abohna khihpizy hry liata miakha lilaw lâ a râ aw ta, khihpi hawka chhikao liata a kei duah aw ta, khihpi machâzy theina liata a thâtih a reih aw. Machâzy ta ama hnohta khih chhôh lâ a chhi aw ei ta, a y nawpa su pie aw ei ta, ama hnohta a pahrâ aw.

5Thisaih phuh latuhpa ta â vaw chadai khiahta cha, cha hlâta ahaona hnei leipa ta a vaih a thie pathleipa a châpa vâta, chyhsa thietuhpa cha a ku liata ama hlâ awpa châ vei.

6A thâtih pachia awpa ta, zawpi hmiakô liata â duah hlâta nata cha daihti liata theihthaipa beichaipa a thi hlâlei abohna khihpi liata a y aw. Cha khai tawhta chyhsa thietuhpa cha â râsaipa khihpi, ano khih lâ a lie heih aw ta, ano o lia tlai â ngia heih aw,” tah ta.

7Chatanachata Nâthalai tlâh râh Kâlili liata Kedesâ khihpi, Epharai tlâh râh liata Sekhe khihpi nata Zudâh tlâh râh liata Kiriathâbâ khihpizy cha abohna khihpizy châta rao ei ta. Kiriathâbâ cha Hebraw tahpa a châ hra.

8Zawdâh haosâ Zerikô nochhi lâta Rubena chi pahrâna râhchawhpa tlâhby liata a ypa Beze khihpi, Kâdâ chi Kilia râh liata Ramô khihpi nata Manase chi Bâsanâ râh liata Kôlâ khihpizy chhao abohna khihpizy châta ama rao hra.

9Cha khihpizy cha Izarei sawzy nata ama hry liata chihropa a ypazy châta abohna khihpizy ta raopa châ ta, ahy rai chyhsa a thie pathleipa cha, zawpi hmiakô liata â dua hlâta thisaih phuh latuhpa ku liata a thi lei nawpa ta, cha khihpi lâ cha â râ awpa a châ.

← Chapter 19 Jump to: Chapter 21 →