Joshua 5

Chin (Mara Bible RV (BSI))

← Chapter 4 Jump to: Chapter 6 →

1Izarei sawzy Zawdâh ama chaka khai hlâlei Abeipa ta Izarei sawzy hmiakô liata Zawdâh tizy a pakua tahpa thâtih cha, Zawdâh haosâ notla lâta a ypa Amawri bei zydua nata tilaipi kiah liata a ypa Kâna bei zydua ta ama thei nahta, Izarei sawzy vâta ama pathipalôh zao khaipa ta, ama thlah a hua khai ha ta.

2Cha daihti liata, Abeipa ta Zawsua hnohta, “Meilô chaizôh tao la, Izarei sawzy kha ama chopaw a einona ta taipa heih teh,” tah ta.

3Zawsua ta meilô chaizôhzy tao ta, Izarei sawzy cha Kibia Hârâlôthâ liata ama chopaw taipa ta.

4He he Zawsua ta ama chopaw a taina chhâpa a châ: Izi râh tawhta a kaw puapa chariah adyuhpa chapaw zydua kha, Izi râh tawhta ama pua tawhta râhchawhpa lâpi liata thi khai ha ei ta.

5Izi râh tawhta a kaw puapa zydua cha chopaw tai chiehpa sai châ ei ta, Izi râh tawhta ama kaw pua tawhta râhchawhpa lâpi liata a pihpazy zydua deikua cha, chopawtai leipazy ama châ.

6Izarei sawzy ta Abeipa ao ama nathlie khoh leipa vâta, ama pathlatuhpazy hnohta pie awpa ta Abeipa ta bie â taihpa sâhpiti nata kheihti lona râh pahmôsa lei awpa ta Abeipa ta ama hnohta bie â taih haw. Chatanachata Izi râh tawhta a kaw puapa, chariah a dyuhpa Izarei phopi chapaw zydua ama leidia khai hlâlei, Izarei sawzy cha râhchawhpa liata kô sypalih chhôh ama viavi.

7Chavâta Abeipa ta âmo vyuhpa ta a paduapa ama pathlazy cha Zawsua ta ama chopaw a taipa ei. Lâpi liata ama chopaw taipa a châ leipa vâta chopawtaileipa ta ama vaw y thlâh hapa a châ.

8A phopi dua ta chopaw taipa ama châ khai tawhta, ama tlâh hlâlei cha ama riehmo chyu liata y chy ei ta.

9Abeipa ta Zawsua hnohta, “Tanoh he Izi mo ama cha mohnaona nâmo tawhta ei pahlei haw,” tah ta. Chavâta cha su cha tahmâ taihta Kilkal tahpa a châ.

10Izarei sawzy cha Kilkal liata riehmo paryh ei ta, cha thla, noh hrawh hleipalihna noh zâlâ ta Zerikô bypizy liata zawpakhô ama chay.

11Zawpakhô mylâ ta, cha râh liata a papuapa viahchhâ thinô pahlao leipa nata chhâmeih raopazy nie ei ta.

12Râh liata a papuapa ama nie noh a mylâ tawhta cha, mânâ tla khao leipa ta, Izarei sawzy châta mânâ y khao vei. Cha kô tawhta cha Kâna râh chhaohlei thei ama nie pathao haw.

13Zawsua cha Zerikô khihpi kiapâh liata a y nota, mohmia pasaih ta, a hmiakô liata chyhsa pakha, zaozi a paih tawhta phia chiehpa a chabapa ta a vaw duah thlâh ha ta. Zawsua ta kei pangai ta, a hnohta, “Keimo chhâh a châpa ma na châ, eima khakhaipazy chhâh a châpa chi maw?” tah ta.

14Chyhsa chata, “Châ vei, Abeipa pheisaihzy hyutuhpa ei châ. Tahmâ ei vy haw,” tah ta. Chatawhcha Zawsua cha alei liata â khu lâta pao ta, Abeipa pheisaihzy hyutuhpa cha a chhy ta, a hnohta, “Ei zibeipa ta a chakaotuhpa hnohta khâpa ma rei awpa a hnei tly?” tah ta.

15Abeipa pheisaihzy hyutuhpa ta Zawsua hnohta, “Na pheiky kha pahluh teh. Nâ duana su kha su pathaihpa a châ,” tah ta. Cha hawhna chata Zawsua ta a pheiky cha pahluh ta.

← Chapter 4 Jump to: Chapter 6 →