Matthew 1

Chin (Mara Bible RV (BSI))

Jump to: Chapter 2 →

1He he Zisu Krista thyutôna châbu a châ. Zisu Krista cha Dâvi pathla châ ta, Dâvi cha Abarahâ pathla a châ.

2Abarahâ cha Aisika paw châ ta, Aisika cha Zakaw paw a châ. Zakaw cha Zudâh nata a unawhzy paw châ ta.

3Zudâh cha Pereza nata Zerâ paw châ ta, ama nô cha Tâmâri a châ. Pereza cha Hezrô paw châ ta, Hezrô cha Aramâ paw a châ.

4Aramâ cha Aminadâ paw châ ta, Aminadâ cha Nâsô paw a châ. Nâsô cha Salmô paw châ ta,

5Salmô cha Bôaza paw a châ. Bôaza nô cha Rahâbi a châ. Bôaza cha Ôbedâ paw châ ta, Ôbedâ nô cha Ruthi a châ. Ôbedâ cha Zese paw châ ta,

6Zese cha Bei Dâvi paw a châ. Dâvi cha Sawlawmaw paw châ ta, Sawlawmaw nô cha Uria lapinô kha a châ.

7Sawlawmaw cha Rehôbaw paw châ ta, Rehôbaw cha Abizah paw a châ. Abizah cha Âsâ paw châ ta,

8Âsâ cha Zehôsaphâ paw a châ. Zehôsaphâ cha Zôrâ paw châ ta, Zôrâ cha Uzia paw a châ.

9Uzia cha Zôthâ paw châ ta, Zôthâ cha Ahâza paw a châ. Ahâza cha Hezekia paw châ ta,

10Hezekia cha Manase paw a châ. Manase cha Amôsâ paw châ ta, Amôsâ cha Zôsia paw a châ.

11Zôsia cha Zekôniah nata a unawhzy paw châ ta, âmo he Babylaw lâ a chhipa ta ama y no rachhôh ta a pihpa ama châ.

12Hezy he Babylaw lâ sei ta a chhipa ama châ tawhta a pihpazy ama châ: Zekôniah cha Salâtia paw châ ta, Salâtia cha Zerubâbe paw a châ.

13Zerubâbe cha Abinadâ paw châ ta, Abinadâ cha Eliakima paw a châ. Eliakima cha Azô paw châ ta,

14Azô cha Zadô paw a châ. Zadô cha Akhi paw châ ta, Akhi cha Elidâ paw a châ.

15Elidâ cha Eliaza paw châ ta, Eliaza cha Mâthanâ paw a châ. Mâthanâ cha Zakaw paw châ ta,

16Zakaw cha Zawsi paw a châ. Zawsi cha Mâri vahpa châ ta, Mâri cha Mesia ama bipa Zisu nô a châ.

17Chatanachata chhâ zydua cha, Abarahâ tawhta Dâvi taihta chhâ hrawh hleipalih châ ta, Dâvi tawhta Babylaw lâ sei ta a chhipa ama châna taihta chhâ hrawh hleipalih châ ta, Babylaw lâ sei ta a chhipa ama châ tawhta Mesia pina taihta chhâ hrawh hleipalih a châ.

18Zisu Krista vaw pinazie cha hetana heta a châ. Zawsi ta Zisu nô Mâri cha a pahawh ta, amâ pahlyh hlâta Thlahpa Pathaihpa ta saw paphaosa ta.

19A vahpa Zawsi cha chyhsa siapa a châpa vâta, Mâri noh pazao awpa khoh leipa ta, arulâta a chhaih a chhuah ta.

20Châhrasala he hmo he a pachâ hai nota, Abeipa vâlyuhchâpa cha a hnohta a mâ lâta a vaw luah ta, “Dâvi sawchapawpa Zawsi y, Mâri na lapinô ta hnei awpa chi khah y. A saw phaopa kha Thlahpa Pathaihpa ta a paphaosapa a châ.

21Sawchapaw sa aw ta, a chyhsazy ama moleinazy tawhta a pachha awpa vâta, a moh Zisu na bi aw,” tah ta.

22Cha hmo zydua cha Abeipa ta hrohsopa pakah hmâpa ta,

23“Pachâ teh u, laihsa kôpa ta saw phaoh aw ta, Sawchapawpa sa aw ta, A moh Imanuel ama bi aw,” tahpa ta a reipa kha â ki thei nawpa ta a vaw tlôpa a châ. Imanuel cha “Khazohpa eima hnohta a y,” tahna a châ.

24Zawsi cha a vaw hra ta, Abeipa vâlyuhchâpa ta bie a piepa hawhta tao ta, Mâri cha lapinô ta hnei ta.

25Châhrasala Mâri ta sawchapaw a sa hlâ via cha a zialâh vei. Zawsi ta a sawchapawpa moh cha Zisu a bi.

Jump to: Chapter 2 →