Matthew 13

Chin (Mara Bible RV (BSI))

← Chapter 12 Jump to: Chapter 14 →

1Cha noh lilaw ta Zisu cha o tawhta pua ta, tipo kiah liata a tyuh ta.

2Chyhsa hluhpi a hnohta a vypakhy ei ta, balyh liata kiah ta, a tyuh ta, zawpi zydua cha raphyu liata a duah ei ta.

3Pakhona biezy hmâpa ta âmo cha bie hluhpi chho ta, ama hnohta, “Chi hietuhpa cha chi hie awpa ta pua ta.

4Chi cha hie ta, chi thokha cha lâthlôh kiah liata tla ei ta, pavawzy a vy ei ta, dyh khai ha ei ta.

5Chi thokha cha lôphiariapa alei apapa liata tla ei ta, alei a chha leipa vâta thlai kaw pyuh ei ta,

6noh a vaw chhi nahta, nohsa ta aih ei ta, thari a hnei leipa vâta ama uah haw.

7Chi thokhazy cha ahloh thih liata tla ei ta, ahloh buhzy kaw rôh ta, chi riepazy cha ama disao haw.

8Chi hropazy cha, alei phapa liata tla ei ta, thokha a lie za kha ta, thokha a lie sycharu ta, thokha a lie sythôh ta thei ama pathei.

9Nakhaoh a hneipa ta thei mawh sy,” tah ta.

10A pachupazy a vy ei ta a hnohta, “Khazia pakhona biezy hmâpa ta ama hnohta bie na reih?” tah ei ta.

11Zisu ta âmo cha a chhy ta, ama hnohta, “Nâmo cha vârâh khinarâh bieparuzy pahno awpa ta piepa châ ei chi ta, âmo deikua cha piepa châ veih ei.

12A hneipa hnohta pie baichhapa châ aw ta, a hluhpi a hnei aw. A hnei leipa deikua cha, a hnei chhôhpa chhao, ano tawhta lapa a châ aw.

13He vâna heta ama hnohta pakhona biezy hmâpa ta ei reipa a châ. Hmô ei ta, hmô tlôh leipa ei ta, thei ei ta thei tlôh leipa ei ta, pahno thai hra veih ei.

14Hrohsopa Isai ta, “‘Thei cha thei aw ei chi ta, Châhrasala nama novâh aw vei; Hmô cha hmô aw ei chi ta, Châhrasala pahno thai aw veih ei chi.

15Cha phopi palôh cha a kuhchha ha ta, Ama nah ta bie thei thai khao leipa ta, Ama mo ama paso haw. Chata châ vei sala cha, Ama mo ta hmôpa ta, Ama nah ta thei aw ei ta, Ama palôh ta pahnopa ta, Kei lâ a vaw heih aw ei ta, Ei patlâh ha awpa ei tlai,’ tahpa ta hrohsona bie a reipa kha ama chô liata a vaw tlô hapa a châ.

16“Nâmo deikua cha nama nohlao kaw dia! Nama mozy ta hmô ta, nama nahzy ta a thei.

17Hmeiseihta ta ei cha chho ei, hrohsopa hluhpi nata mosiapa hluhpi ta nama hmôpa he hmô byuh kaw ei ta, châhrasala hmô veih ei. Nama theipazy he thei byuh kaw ei ta, châhrasala thei veih ei.

18“Chi hietuhpa pakhona bie yzie he nathlie teh u:

19Ahy rai khinarâh bie thei ha tlôh ta, a pahno thai vei khiahta cha, moleipa a vy ta, a palôh liata chi hiepa cha a lapa ha tyh. Cha cha lâpi liata chi hiepa cha a châ.

20He he lôphiariapa liata chi hiepa a châ. Bie a theipa nahta, a lypa ta thlai a pyh ta,

21châhrasala ano liata thari a thla leipa vâta, bohpi leipa dei y thei ta, bie vâta rietheipasana tlyma, taolana tlyma a vaw y nahta, thlai a pao ha tyh.

22He he ahloh thih liata chi hiepa cha a châ. Bie cha thei ta, châhrasala khizaw hmo pachâna nata hneirôna tlaichhaina ta bie cha disao ta, pathei leipa ta a y tyh.

23Lei phapa liata chi hiepa deikua cha, bie cha thei ta a pahno thaipa a châ. Thei pathei ta, thokha a lie za kha, thokha a lie sycharu nata thokha a lie sythôh ta a pathei tyh,” tah ta.

24Ama hnohta pakhona bie hropa reih heih ta, “Vârâh khinarâh cha chyhsa ta a lyu liata chi phapa a hiepa nata pakhopa a châ.

25A chyhsazy amâ mô chhôh ta, a chariahpa a vy ta, sâh hry liata sâh pakheipa hie ta, sie syulyu ha ta.

26Chizy cha vaw laiseih ta, a suh a vaw tao nahta, sâh pakheipazy chhao cha a vaw lâ hra ei ta.

27Lyu hneituhpa chakaotuhpazy a vy ei ta, a hnohta, ‘Pâpuh, na lyu liata chi phapa ma na hie vei? Kheihtazie ta sâh pakheipazy he a vaw pua thlâh haw?’ tah ei ta.

28Ano ta ama hnohta, ‘Chariahpa ta a vaw taopa a châ chuh,’ tah ta. Chakaotuhpazy ta a hnohta, ‘Cha khiahta la, vawh sih la, kei phia ha awpa na khoh ma?’ tah ei ta.

29Ano ta, ‘Châ vei, sâh pakheipazy nama phiana liata sâhzy nama phia pâ pathlei aw na.

30Sâh hria daihti taih cha y khoh thlâh ha ei sala, sâh hria daihti liata hriatuhpazy hnohta, “Sâh pakheipazy kha pahmaoh tua u la, rao awpa ta a pia ta chahry u la, sâh deikua cha ei sawvâ liata pahmaoh teh u,” ei tah aw,’” tah ta.

31Zisu ta pakhona bie hropa ama hnohta reih heih ta. “Vârâh khinarâh cha chyhsa ta âhrâ chi hmô kha lyu liata a pariepa hawhta a châ.

32Âhrâ chi cha chi zydua liata chi chyh chaipa châ ta, châhrasala a vaw laiseih tita cha, chicheipa zydua hlâta lai chai ta, thokô a vaw châ tyh. Chatanachata vâ pavawzy a vy ei ta, a chiahzy liata bu ama tu tyh,” tah ta.

33Zisu ta pakhona bie hropa ama hnohta reih heih ta, “Vârâh khinarâh cha chanô ta thinô la ta, viahdie saikhua miathôh liata pabu ta a zydua ta a thyu khai hapa hawhta a châ,” tah ta.

34Cha hmo zydua cha Zisu ta zawpizy hnohta pakhona biezy hmâpa ta reih ta. Pakhona bie hmâ leipa ta ama hnohta bie a reipa y vei.

35Cha hmo cha hrohsopa ta, “Pakhona biezy hmâpa ta ei pakah â aw na ta, Hmo nyupazy ei phuah aw, Khizaw y tua no tawhta nyu hapazy cha,” tahpa ta a reipa kha a vaw tlô thei nawpa ta a châ.

36Zisu ta zawpizy cha siesai ta, o liata a ngia ta, a pachupazy ano lâ a vy ei ta, a hnohta, “Lyu liata sâh pakheipa pakhona bie kha miah chhopasia teh,” tah ei ta.

37Zisu ta a chhy ta, “Chi phapa a hietuhpa cha Chyhsa Sawchapawpa a châ.

38Lyu cha khizaw châ ta, chi phapa cha khinarâh sawzy ama châ. Sâh pakheipazy cha moleipa sawzy châ ei ta,

39âmo a hietuhpa chariahpa cha ahripa a châ. Sâh hria daihti cha daihti chhâna châ ta, hriatuhpazy cha vâlyuhchâpazy ama châ.

40Sâh pakheipazy cha pahmaohpa ta mei liata raopa ama châpa hawhta, daihti chhâna liata a châ hra aw.

41Chyhsa Sawchapawpa ta a vâlyuhchâpazy tuah aw ta, moleina a patlôsatuhpa zydua nata hmo pha leipa a taotuhpa zydua cha, a khinarâh tawhta la papua aw ta,

42moleipazy cha patina meihô liata ama thy aw. Cha liata chana nata hâh chariehna a y aw.

43Chyhsa siapazy deikua cha, ama Paw khinarâh liata noh hawhta ama khaih aw. Nakhaoh a hneipa ta thei mawh sy.

44“Vârâh khinarâh cha lyu liata ryubyh nyupa chyhsa pakha ta hmô ta, nyu heih ta, a ly ngaitapa ta sie ta, a hneina zydua zuah ta, cha lyu cha a chaleipa hawhta a châ.

45“Vârâh khinarâh cha sôdaohpa ta taikuh lôsôhpa a tluapa hawhta a châ heih.

46Taikuh lôsôh ngaitapa miakha a hmô nahta, sie ta a hneipa zydua zuah ta a chaleipa hawhta a châ.

47“Vârâh khinarâh cha tilaipi liata sao paraipa, nga chi to a aopa hawhta a châ.

48Sao cha a bie nahta, nga patutuhpazy ta ngiahkâ lâ a daophi ei ta, a tyuh ei ta, nga phapazy cha hrâbyh liata soh ei ta, a chhiepazy deikua cha ama thy tyh.

49Cha hawhna chata daihti chhâna liata a y hra aw. Vâlyuhchâpazy a zu aw ei ta, moleipazy cha mosiapazy tawhta pahrua aw ei ta,

50moleipazy cha patina meihô liata ama thy aw. Cha liata chana nata hâh chariehna a y aw.

51“Cha hmo zydua cha nama pahno thai khai ma?” tah ta. Âmo ta a hnohta, “Eima pahno,” tah ei ta.

52Zisu ta ama hnohta, “Chavâta vârâh khinarâh châta pachusapa ryhpa pachutuhpa maih cha, o hneituhpa ta a ryubyh tawhta hmo thiehpa nata hmo parohpa a thao papuapa hawhta a châ,” tah ta.

53Cha pakhona biezy a rei khai nahta, Zisu cha cha su tawhta pua ta.

54A khih kei tlô ta, amâ pakhyna o liata âmo cha pachu ta, ama noâh ngaita ta, “He chyhsa heta khataih tawhta ma he sona nata hmotaotheinazy he a hnei tly?

55He chyhsa he zôthaipa sawchapawpa kha châ vei ma? A nô chhao Mâri ama tahpa kha châ vei ma? A unawhzy chhao Zâmie, Zawsi, Saimaw nata Zudâh zy châ veih ei ma?

56A sietanôzy chhao eima hnohta y khai thlâh ha veih ei ma? He chyhsa heta, khataih tawhta ma he hmo zydua he a hmô tly?” tah ei ta.

57Ano cha chhyh thai leipa ei ta. Zisu ta ama hnohta, “Hrohsopa cha a khih nata a chhôhkha liata tah leipa ta la, palyupalihna hlao leipa ta y beih vei,” tah ta.

58Amâ ngiapâ leipa vâta, cha liata hmonoâhpa hluhpi tao vei.

← Chapter 12 Jump to: Chapter 14 →