Matthew 3

Chin (Mara Bible RV (BSI))

← Chapter 2 Jump to: Chapter 4 →

1Cha nohzy liata, Bâtituhpa Zawhâna cha Zudia râhchawhpa liata bie chho awpa ta a vy ta,

2“Ro teh u, vârâh khinarâh cha â hnia haw,” tahpa ta bie chho ta.

3Hrohsopa Isai ta, “Râhchawhpa liata awhpa ao ta, Abeipa lâthlôh a chhuahdy u la, A lâpizy patlâsa teh u,” tahpa ta a vaw reichhieliepa kha, ano he a châ.

4Zawhâna cha râraoseihpa hmi chysia ta a tobi ta, savo chaisaihna ta a chai a saih ta, a pati cha khawsu nata kheihti a châ.

5Zerusale nata Zudia râh liata chyhsa zydua nata Zawdâh chavah chheipâh liata chyhsa zydua puapa ta ano lâ a vy ei ta,

6ama moleinazy palâhâhpa ta Zawdâh chavah liata ano ta bâti pachâsa ei ta.

7Phârisaih nata Saduasi hluhpi ta bâti châ awpa ta ano lâ amâ vypa a hmô nahta, ama hnohta, “Nâmo, vâzi pathlazy saih u! Hiehâhna vaw tlô awpa a râsai awpa ta ahy ma zikyu châ râ ei?

8Rona moh phaoh tlâhpa ta pathei teh u.

9‘Abarahâ pathla eima châ,’ a tah khuh vy. Khazohpa ta he alôzy tawhna heta Abarahâ pathlazy a padua thei tahpa ei cha chho ei.

10Tahmâ chhao tlai he, tho tharizy liata ahrei sopa a châ haw. Tho to thei pha a pathei leipa maih thlu ta mei liata thypa a châ aw.

11“Kei ta rona châta ti ta cha bâti ei na ta, ei hnôhlâ ta a vy awpa deikua cha, keima hlâta rônah viapa châ ta, kei la a pheiky chaba tlâh chhao châ va na. Ano ta Thlahpa Pathaihpa nata mei ta a cha bâti aw ei.

12A ku liata a barah y ta, a sawhri sâh zie aw ta, a sâh pâh liata a ryh aw. Asihpa deikua cha, mei pachhai thei leipa liata a rao aw,” tah ta.

13Cha nona chata Zisu cha, Zawdâh chavah liata bâti châ awpa ta, Kâlili tawhta Zawhâna lâ a vy ta.

14Châhrasala Zawhâna ta, “Nâ ta bâti eina pachâsa awpa chi tlao ei ngiah. Kheihtazieta kei lâ a vypa ma na châ?” tah ta, thlyu a chhuah ta.

15Zisu ta a chhy ta, “Â ryh tah thlâh ha teh. Siana zydua pakipa cha eima châta a ngiahpa a châ,” tah ta. Chatanachata paryhsa ha ta.

16Zisu cha bâti a châ khaipa nahta, ti tawhta thlai kaw pua ta, avâ a vaw pahy ta, Khazohpa Thlahpa cha vachhuh hawhta za chô ta, a chô liata â chohpa hmô ta.

17Avâ tawhta ao ta, “He he ei Sawchapawpa kyh ei pachâ ngaitapa, a chô liata ei ly ngaitapa a châ,” tah ta.

← Chapter 2 Jump to: Chapter 4 →