Romans 1

Chin (Mara Bible RV (BSI))

Jump to: Chapter 2 →

1Pawla, Zisu Krista chakaotuhpa, lyuhchâpa châ awpa ta awpa nata Khazohpa thâtihpha châta pananopa ta, he châpaphaopa he a roh.

2Cha thâtihpha cha, Khazohpa ta a hrohsopazy hmâpa ta hlâno tawhta Biehrai pathaihpa liata bie â vaw taih hapa a châ.

3Cha thâtihpha cha a Sawchapawpa, eima Beipa Zisu Krista thâtih châ ta, sapa kyh liata cha Dâvi pathla ta a pihpa a châ.

4A Thlahpa pathaihna kyh liata deikua cha, athihpa hry tawhta a thyuheihna ta, eima Beipa Zisu Krista cha hmotaotheina a hneipa Khazohpa Sawchapawpa a châzie a palâsa.

5Ano vâta nata ano moh ta phopi to pangiapâsa ta, a bie pazyhsa awpa ta, ngiachhiena nata lyuhchâpa châna eima hmô.

6Cha chata nâmo, Rawma khih liata a ypa, Zisu Krista eih châ awpa ta awpa zydua chhao a cha pahly ei.

7Rawma khihpi liata Khazohpa kyhpachâpazy nata a mopathaihpazy châ awpa ta a awpa zydua ei châ naoh ei. Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy.

8A hmiatua chai ta, namâ ngiapâna kyh Khizaw zydua liata a pathâhpa vâta, nama zydua châta Zisu Krista moh ta ei Khazohpa lâ alyna bie ei reih.

9Nama moh reipa ta bâh leipa ta thlah ei cha chhâpa tyh ei. Cha kyh liata, a Sawchapawpa thâtihpha raihria liata ei thlahpa ta ei chakaopa Khazohpa cha nâ pahnokheituhpa a châ.

10Khazohpa ta â ryh tah sala, tahmâ lia chhâ heta cha, cha vaw tly thei awpa ei ta khâ ei hiah tyh.

11Nama pachyu thei nawpa ta Thlahpa hmopiepa cha pahneisa awpa ei ta, nâmo châ hmô awpa ei khoh ngaita.

12Chatanachata namâ ngiapâna nata ei ngiapâna hmâpa ta, eimâ ngiapâna tha eimâ patlô raihrie thei aw.

13Unawh saih u, nâmo nata Zenitai hropazy hry liata theilâpa hmô awpa ta, cha vaw tly awpa ei a chhuah tyh na ta, châhrasala pakhâna a y chhyh hapa kyh nama pahno lei awpa khoh va na.

14Krikâh mo nata mohropazy, asopa nata ahrupazy liata a bâhpa ei hnei.

15Chavâta nâmo, Rawma khih liata a ypazy hnoh chhao ta, thâtihpha cha chho awpa a ngiatiah va na.

16Thâtihpha cha zakhei tlôh lei khâh na ta. Ahy rai a ngiapâpa maih châta pachha châ nawpa ta Khazohpa hmotaotheina châ tlôh ta, a hmiatua ta Zu chyhsa châta châ ta, Krikâh mo châta chhao a châ.

17“Mosiapa cha ngiapâna ta a hroh aw,” tahpa ropa hawhta, thâtihpha liana chata Khazohpa siana a vaw luah ta, cha siana cha âthaona tawhta achhâna taihta ngiapâna vâta a ypa a châ.

18Khazohpa a pachâ leipa nata chyhsa sia leipa zydua chô liata Khazohpa pathiiana avâ tawhta a zâ luah. Âmo cha ama sialeina vâta biehmeiseihpa a pakhâtuhpazy ama châ.

19Khazohpa thâtih pahno awpa cha âmo liata a sia thlâh haw. Cha cha Khazohpa tlai ta a pahnosa ha ei.

20Mo ta hmô thei leipa a châna, a chhâzaw hmotaotheina nata a Khazoh châna zy cha, khizaw tao tua no tawhta hmôpa ta y ta, hmotaopazy liata a siapa ta â lâ. Chavâta rei nawpa hnei veih ei.

21Khazohpa cha pahno taraw ei ta, châhrasala Khazohpa hawhta palyupalih leipa ei ta, alyna bie hlâ hra veih ei. Hmo hraoleipa tlao pachâ via ei ta, ama pathipalôh hruna cha a vaw zoh haw.

22Chyhsa sopa hawhta a reih ei ta, ahrupa lâta ama pua haw.

23Chatanachata thi thei leipa Khazohpa rônahna cha, thi theipa chyhsazy, pavawzy, phei palihpa sazy nata alyhpasa nothlahpazy hawhta ama pachâsa haw.

24Chavâta ama pôhpa nozachhih ngaitapa ta a tao raihrie awpa ta, ama pathipalôh aohraohna hawhta hmo puapa tao awpa ta Khazohpa ta â heihsai ha ei.

25Khazohpa biehmeiseihpa cha haipa ta pachâsapa ta, Taotuhpa a chhy leipa ei ta, a hmotaopazy a chhypa ta ama chakao. Taotuhpa cha chhâzaw ta reithaipa ta y mawh sy! Amen.

26Cha vâna chata Khazohpa ta nozachhih ngaitapa ta sihryh awpa ta âmo cha â heihsai ha ei. Ama chanôzy ta chanô chapaw châna hmâzie tyhpa siesaipa ta, hmâzie lei awpa ta hmâh ei ta.

27Chapawzy chhao ta, chanô liata hmâ tyhpa cha siesaipa ta, chapaw nata chapaw a patla ei ta, chapawzy ta nozana châh pahno leipa ta ama chapaw heihzy ykhei ei ta, ama pôhpa lia tlai ta ama moleina ty cha ama hmô.

28Khazohpa pahnopa cha hmo phahnai leipa hawhta ama pachâpa vâta, palôh doleipa phaoh ta, tao lei awpazy tao awpa ta Khazohpa ta âmo cha â heihsai ha ei.

29Chatanachata sialeina chi to, apatlana, chhoruna, karâyna nata kiaphaona zy ta bie ei ta, hiatliana, lianycheina, ahryuna, dôveina, nôchhiena nata kyhchhie reina zy ta ama bie.

30Chyhsa a reipachhiepa, Khazohpa a haopa, a patahsapa, a palaipa, a pahôpahâhpa, moleina khaohvâh a pahnopa, nôpaw rei a ngiah leipa,

31ahrupa, ngiapâ leipa, palôh a hnei leipa nata zawngiahna a hnei leipazy ama châ.

32Cha hawhpa hmo a taopazy cha, a thi tlâh ama châ tahpa Khazohpa bieraopa pahno thlâh hana chôta, âmo taopa dei châ leipa ta, mohropazy taopa chhao amâ lykhei tyh.

Jump to: Chapter 2 →