Romans 3

Chin (Mara Bible RV (BSI))

← Chapter 2 Jump to: Chapter 4 →

1Cha khiahta la, Zu chyhsa châpa cha phahnaina khâpa a hnei? Chopawtaipa chhao cha khâpa athôhna a hnei?

2Kyh to liata a phahnai. A phahnaina chaipa cha, Khazohpa biezy pavaosapa ama châpa he a châ.

3Thokha ngâchhih leipa ei sala, kheihta a châ aw? Âmo ngâchhih leina chata Khazohpa ngâchhihna hraoleipa ta a tao aw ma?

4Châ bao va! Chyhsa zydua a haihpa châ hra ei sala, Khazohpa cha adopa a châ, Biehrai liata, “Na bie ta thai châ la, Pachiapa ta na y tita, Pahniena to mah y,” tahpa ta ropa hawhna khata.

5Châhrasala keimo sialeina ta Khazohpa siana a palâsa khiahta cha, khâpa eima reih khao aw? Eima chô liata a hiehâhna a patlôsana kyh liata, Khazohpa cha sialeipa a châ ma? Cha cha chyhsapa lâ tawhta ei reipa a châ.

6Châ bao va! Chata a châ khiahta cha, Khazohpa ta kheihta khizaw a pachia thei aw?

7Kei ta haipa bie ei reipa vâta, Khazohpa biehmeiseihpa cha ano parônahsana taihta â lâ khiahta cha, khazia moleipa hawhta thailei pachâsapa ta ei y?

8Chyhsa thokha ta, “‘Hmo phapa a vaw pua thei nawpa ta, hmo moleipa tao ei suh u,’ ama tah na,” tahpa ta â doleipa ta miah ama baipa hawhna khata eima tao thlâh ha aw ma? Cha hawhpa chyhsazy cha thailei a châ awpa rai ama châ.

9Cha khiahta la, keimo Zuzy pi he Krikâh mo hlâta eima pha via hlei ma? Châ bao va! Zuzy chhao, Krikâh mo chhao, moleina sei liata a ypa eima châ khaizie eima rei hapa kha.

10Biehrai liata, “Ahy hmah a siapa y veih ei, Pakha hmah y veih ei;

11Ahy hmah a pahno thaipa y veih ei, Ahy hmah Khazohpa a tluapa y veih ei.

12Ama zydua ta pavia khai ha ei ta, Phahnai leipa ama châ khai haw; Hmo pha a taopa y veih ei, Pakha hmah y veih ei.

13Ama rao cha thlâ a pahypa châ ta, Ama paleih dôna bie reina châta hmâh ei ta, Ama hmao liata parih châmaih a y.

14Ama pakah cha chhiesana nata ruchhôna ta a bie.

15Thisaih palo awpa ta ama phei chatlie kaw ta,

16Ama lâpizy liata raona nata rietheina a y;

17Thlalôhna lâpi pahno veih ei.

18Ama mo liata Khazohpa china rai y vei,” tahpa ta ropa a châ.

19Ryhpa ta a reipa maih cha, ryhpa ry liata a ypazy hnohta reipa a châ tahpa eima pahno. Chatanachata pakah to hmao mopa ta y aw ei ta, khizaw zydua he Khazohpa ryureina ry liata a y thei aw.

20Ryhpa vâta moleina pahnona vaw y ta, chavâta chyhsapa ahy hmahta hmotaopa vâta Khazohpa mohmô ta thaichâ thei aw veih ei.

21Châhrasala ryhpa nata hrohsopazy reipa hawhta, ryhpa leipa ta Khazohpa siana cha tahmâ paluahsapa ta a y haw.

22Cha Khazohpa siana cha, Zisu Krista amâ ngiapâpa vâta ngiapâtuhpa zydua hnohta paluahsapa ta a y. Ananona rai y vei.

23Chyhsa zydua ta molei khai ha ei ta, Khazohpa rônahna to thei khao veih ei.

24Cha moleipazy cha, Zisu Krista chatlaina vâta, a ngiachhiena ta a saipa ta thai pachâsapa ama châ.

25Zisu Krista cha molei reihpha cheina châta a thisaih palo awpa ta Khazohpa ta a raopa châ ta, cha ngiahthaina cha ngiapâna vâta hmô theipa a châ. A nôphana vâta, kha hlâta moleinazy cha, Khazohpa ta pahno lei a pachâ ta, a siana cha a paluahsa haw.

26Zisu Krista cha mosiapa a châ thei nawpa nata ano ngiapâtuhpa châta thaipachâsatuhpa a châ thei nawpa ta, Khazohpa ta tahmâhlâ daihti liana heta Zisu Krista siana cha a vaw palâsapa a châ.

27Cha khiahta la, eimâ palaikhei kawpa kha khataih liata a y haw? Thypa ta a y haw. Khâpa ryhpa ta maw? Hmotaopa ryhpa ta ma? Châ vei, ngiapâna ryhpa ta tlao a châ.

28Ryhpa hmotaopazy vâta châ leipa ta, chyhsapa cha ngiapâna vâta thai a châpa ta eima rao.

29Khazohpa cha Zuzy Khazohpa dei ma a châ? Zenitaizy Khazohpa chhao châ hra vei ma? A châ tlaih, Zenitaizy Khazohpa a châ hra.

30Khazohpa cha pakha a châpa vâta, chopawtaipa cha ngiapâna vâta thaichâ aw ta, chopawtaileipa chhao, ngiapâna vâta thai a châ hra aw.

31Cha khiahta la, ngiapâna vâta ryhpa cha hraoleipa ta eima pachâsa ma? Châ bao va! Ryhpa cha tlao eima pa-ipa a châ.

← Chapter 2 Jump to: Chapter 4 →