Deuteronomy 10

Chin SCB2 (Syin Chin Bible)

← Chapter 9 Jump to: Chapter 11 →

1“Tuasia ciang Topa in kei tungah, ‘A masa a te bangma in suangpheak nii vawt in a, a koi natu thingkuang khat vawt in. Keima kung mual tungah hong kaato ta'n a,

2na tapsak suangpheakte tungah ka at tengma tua suangpheakte tungah ka at tu a, tua zawkciang tuate thingkuang sungah na koi tu hi,’ hong ci hi.

3“Tua ahiciang acacia thing taw thingkuang khat ka vawt a, a masa lai a sia taw a kibang suangpheak nii vawt in mual tungah ka paipui to hi.

4Tuaciang Topa in tua suangpheakte tungah a masa a at kammalte, mualtung na kikhop uh ni in meikuang sung pan note tungah hong son Thupiak Sawmte at hi. Topa in tua suangpheakte kei hong pia a,

5tuaciang kiheakin mualtung pan ka tuaksuk hi. Tua zawkciang Topa thupiak bangin ka vawtsa thingkuang sungah tuate ka koi a — tua hun pan kipan tualai ah om hi,” ci hi. (

6Israel te sia Jaakan mite ii tuikhukte pan pai in Moserah zuan uh hi. Tua munah Aaron thi in kivui a, a tapa Eleazar in a thiampi za laih hi.

7Tua mun pan amate Gudgodah ah pai uh a, tua mun pan tui tam omna mun Jotbathah theng uh hi.

8Mual tungah Topa in Thuciamna Thingkuang a cing tu, thiampi na a seam tu, tuaciang ama min suangin thupha a pia tu in Levi namte nasep pia hi. Hi nasepte tu dongin amate nasep hi lai hi.

9Tua ahikom Levi nam in nam dangte nga bangin lo ngam nga ngawl hi; amate ii nga sia Topa na Pathian ii kamciam bangin Topa ii thiampite a hina hamphatna sia ahi hi.)

10“A masa lai bangma in mual tungah sun sawmli le zan sawmli ka om hi. Topa in khatvei ka thu hong ngai lai a, note hong mot ngawl tu thukim hi.

11Tuasia ciang ama in na taanghpupite tungah piak tu in a kamciamsa ngam le lei na nga thei natu uh note lampui in a pai tu kei hong sawl hi.

12“Tu in Israel mite awng, Topa na Pathian ii note tungah hong nget thute pha tak ngai vun: Topa bia vun a, hong thupiak theampo zui vun. Na thin theampo uh taw ama it in, a na seam tavun a,

13a thukham theampo zui vun. Note phattuam natu in tuni in tuate kong pia hi.

14A saangbel vantungte ngawngawn Topa neisa hi a, leitung le a tung a om na theampo zongh ama ii neisa ahi hi.

15Ahizong Topa in na taanghpupite a itna lian mama ahikom midangte taangin note hong teal a, note sia ama tealsa te na hi lai uh hi.

16Tua ahiciang tu pan kipan Topa thu ni tavun a, na thinpuisak nawn heak vun.

17Topa na Pathian sia pathiante theampo tung le a vaang nei theampo tungah thu neibel hi. Ama lian in thahat a, kiitak tu ahi hi. Ama in nguptuam nei ngawl a, sumnguk saang ngawl hi.

18Ama in tangate le meingongte a pha in vawt a, eite sungah a teang ngamdangmite it in, an le puansilhte pia hi.

19Tua ahikom tua ngamdangmite tungah itna lak vun, banghang ziam cile note khatvei Egypt ngam ah ngamdangmi ma hi ngei nu hi.

20Topa na Pathian ii thu ni in ama bek bia vun. Ama tungah thumaan in ama min bek suangin na kamciamna te vawt vun.

21Ama pok vun — ama na Pathian uh hi a, noma atu a vawt a lian le a lamdang nate na mit mama uh taw mu nu hi.

22Na taanghpupite Egypt ngam ah a pai lai in mihing sawmsali bek pha hi. Ahizong tu in Topa na Pathian in note van ah aksi bangza in tam mama hong phasak zo hi.

← Chapter 9 Jump to: Chapter 11 →