Deuteronomy 28 — Chin SCB2 (Syin Chin Bible)

1“Tuni a kong piak Topa na Pathian thupiak theampo thumaan takin zui in, a thu na ni uh le ama in leitung minam dangte sangin a lian zaw in note hong siam tu hi.

8“ Topa na Pathian in na nasepna uh thupha hong pia tu a, na ansaalte antang taw hong dimh tu hi. Ama ii hong piak na ngamsung uh ah thupha hong pia tu hi.

9Topa na Pathian ii thu ni in, ama thupiak theampo na seam uh le, ama kamciamsa bangin ama mihing hong suaksak tu hi.

10Tuaciang leitung mihingte theampo in note Topa ii a teal ama mihingte na hi uh hunlam hong mu tu uh a, hong kiita tu uh hi.

11“ Topa in no tungah hong piak tu in na taanghpupite tungah a kamciamsa ngam sungah ta tam mama, nganno tam mama, le an tam mama hong pia tu hi.

12Ama in a na kholna van pan a hun zui in nguatui hong zusak tu a, na na sepna theampo uh thupha hong pia tu hi, tua hile note in minam tam mama te tungah sum na pukthaak tu uh a, ahizong kuama tung pan sum na pu buatu hi.

13Topa na Pathian in minamte sungah lampui hong suaksak tu a, ngual nungzui na hi buatu hi; tuni in kong piak ama thupiak theampo thumaan takin na zui uh le note na nuamsa tawntung tu uh a, na kiamsuk ngei buatu uh hi.

14Bangbang po ahizong hi thupiakte na nial ngei buatu uh a, a dang pathiante bia in a na na seam ngei buahet tu uh hi.

15“Ahizong tuni in kong piak Topa na Pathian ii hong thupiak theampo le thukham theampo thumaan takin zui ngawlin ama thu na ni bua uh le, hi siatna theampo note tungah hong tung tu hi.

16“ Topa in na khuate le na lote haamsiat tu hi.

17Topa in na lo ante le tuate sung pan na vawt uh ante haamsiat tu hi.

18“ Topa in ta tawm bek a nei tu, an a zawng tu, le khui le tuu tawm bek a nei tu in note hong haamsiat tu hi.

19“ Topa in na sep na vawt theampo haamsiat tu hi.

20“A sia vawtin Topa na nial uh le, manlang takin na lalcip uh dong ama in tuasiatna, buaina le na sepna theampo ah ngimnate tungsak tu hi.

21Ama in na laak tu ngam sungah khat zongh na taan nawn ngawl uh dongin natna khat zawkciang khat hong tungsak tu hi.

22Topa in a kilaw thei natnate, citum le cisa natnate no tungah hong tungsak tu hi; ama in na lo ante a lalsak tu in nguatui kangsak a, vuisa vasak tu hi. Hi bang tuasiatnate na thi dong thuak tu nu hi.

23Nguazu ngawl tu a, na leitangte thik bangin sak tu hi.

24Na lalcip siat uh dong Topa in nguatui taangin leivui le senneal vuipite hong puak tu hi.

25“ Topa in na ngalte in hong zosak tu hi. Note in mun khat pan na sim tu uh a, ahizong mun theampo ah na tai tu uh hi, note tungah thupiangte a mu uh ciang leitung mihingte theampo lau mama tu hi.

26Na thi uh ciang vacimte le ngamsate hong pai in hong ne tu uh a, tuate a beng tu kuama om ngawl tu hi.

27Topa in Egypt te tungah a tunsak bangma in note uilut hong veisak tu hi. Ama in na pumpite matum veisak tu hi. Cithak natna vei in thak na sa tu uh a, ahizong dam thei ngawl tu hi.

28Topa in na thin hong kiamcipsak tu a; mittaw lungmangin hong buaisak tu hi.

29Mittaw bangin sun lai in na zawt tu a, na lampi na mu thei buatu uh hi. Na sepna pawpo ah na maa uh a vang buatu hi. Note hong kinengcip in hong kisuttol tawntung tu a, hong hu tu kuama om ngawl tu hi.

30Zi tu in ngaknu khat doksa in na koi tu a — ahizong midang khat in ama teenpui tu hi. Inn khat na sa tu a — ahizong a sungah na teang ngei buatu hi. Sapit na ciing tu a — ahizong a nga na ne ngei buatu hi.

31Na khui sia na mu tangin kingo tu a, ahizong a sa bangma na ne buatu hi. Na laa sia na mu tangin kikai tu a, hong kipia kik nawn ngawl tu hi. Na tuu sia na ngalte tungah kipia tu a, hong hu tu kuama om ngawl tu hi.

32“Na tapate le na tanute na mu tangin ngamdang mite tungah salin kipia tu hi. Na tate hong cia kik tu en in ni simin na mit zung na liang ahihang a luithawthong hi tu hi.

33Haksa takin na ciin sa lo ante ngamdang minam khat in hong laksak tu a, bangma nga ngawlin nencipna le vawtsiatna bek na thuak tawntung tu hi.

34Na thuaknate in na thin hong kiamcipsak tu hi.

35Topa in na peangte a dam thei ngawl, a bot mama meimate dimsak tu hi; na lu pan na peang dong uilut dimsak tu hi.

36“ Topa in nangma le na kumpipa sia nangma le na taanghpupite ii a teen ngeingawlna ngamdang ah hong paipui tu hi; tua munah thing le suang taw a kivawt pathiante ii na, na seam tu uh hi.

37Topa ii hong thethaang natu ngam tuatuam ah note tungah thupiangte hangin mihingte in lamdang sa tu uh hi; amate in note hong nunau in hong ciammui vawt tu uh hi.

38“Thaici tam mama na ciing tu hi, ahizong tawm bek na la tu uh hi, banghang ziam cile na lo ante sia khaumawte in ne tu hi.

39Sapitkung ciingin na pua tu a, ahizong na sapitnga lo ngawlin, sapittui na ne buatu uh hi, banghang ziam cile lungte in sapitkungte ne tu uh hi.

40Na ngamsung theampo ah olive kungte na ciing tu uh hi, ahizong olive thau peuma na nei buatu uh hi, banghang ziam cile a ngate pul siat tu hi.

41Tapate le tanute na nei tu uh hi, ahizong no aa hi ngawl tu hi, banghang ziam cile amate in ngalmat thuak tu uh hi.

42Na thingkungte le na ankungte theampo lung in netum tu hi.

43“Na ngam sungah a teang ngamdangmite in vaang nei vaial tu a, note na hi uh le dadamin na vaang bo tu hi.

44Amate in no hong pukthaak tu sum nei tu a, ahihang note in na pukthaak tu sum bangma na nei buatu uh hi. A khakbel ciang amate in no hong uk tu hi.

45“ Topa na Pathian thu ni ngawlin hong piak thukham theampo na zui ngawl hu in, hi tuasiatna teng no tungah hong tung tu a, na lal siat uh dong tuasiatnate hong om tu hi.

46Tuate nangma le na suan na paalte tungah a tawntungin Pathian ii thukhenna tetti hi tu hi.

47Topa in a nanam in thupha hong pia hi, ahizong lungdam, lungnuam in ama na na seam bua uh hi.

48Tua ahikom, Topa ii note kungah hong paisak tu ngalte ii na, na seam tu uh hi. Na theampo kitaangsamh in — ngilkial dangtaak le pumnguakin na om tu uh hi. Na lal siat uh dong Topa in nasia takin hong nengniam tu hi.

49Topa in no hong langpan tu in a kampau na heak ngawl uh minam khat leimong panin hong puak tu hi. Muvanlai khat bangin amate in no hong man tu hi.

50Amate ngongtat tu a, khangmoi, khanghaam, a kuama po hesuak ngawl tu hi.

51Amate in na ngannote le na lo ante hong neaksak tu a, na pukthi tu uh hi. Amate in note atu in antang, sapittui, olive thau, khui ahibuale tuu hong nusiat ngawl tu a; na thi tu uh hi.

52Amate in Topa na Pathian ii no hong piak tu ngamsung khua theampo sim tu a, na muan na suan luphung saangte cimhtham tu hi.

53“Na ngalte in na khuapite hong uumci ciang anneak tu cimaw in Topa na Pathian ii hong piak na tate sa ngawngawn na ne tu uh hi.

54Nampi suan miphabel pa ngawngawn zongh ngalte ii hong uumci laitak cimaw mama tu a, neak tu dang om ngawl ahikom a tate pawlkhat ii sa ne tu hi. Ama in a tate sa sia a suapuipa, a it a zi, a taanglai a tate khat zongh hawm ngawl tu hi.

56A hau lei hu in a peang in a vak ngeingawl nampi suan numei phabel ngawngawn zongh in tuabang ma in ngamta tu hi. Ngalte in a khua a uumci ciang anneak tu cimaw mama ahikom, a suak tung le a suaksa a nausente sa zongh ama in ne ku tu hi. Ama in a it a pasal le a tanote khat zongh hawm ngawl tu hi.

58“Hi thubu sungah a ki at Pathian ii hong hilciannate theampo thumaan takin ni ngawlin a lamdang a kiitakhuai Topa na Pathian ii min na zatak vawt bua uh le,

59ama in na suan na paalte tungah a dam thei ngawl natnate le a kikhaam zo ngeingawl a lauhuai a kilaw thei natnate tungsak tu hi.

60Egypt ah noma thuaksa a lauhuai natnate theampo ama in khatvei hong tungsak kik tu a, na dam kik ngei buatu uh hi.

61Hi Pathian thukhamte le kihilnate tepteena thubu sungah a kison ngawl natna namcin le a kilaw thei natnate zongh ama in tungsak tu a, na mong tu uh hi.

62Van ah aksi za in tam napi, Topa na Pathian thu na nit ngawl hu in, tawm bek nungta tu nu hi.

63Note hong lapsaang na le hong punsak na thu ah Topa a lungkim bangma in, note hong mot natu le hong lalsak natu thu zongh ah ama lungkim veve tu hi. Na laak tu uh ngam pan note hong kilongkeak tu hi.

64“ Topa in note sia leimong khat pan mong khat dong, minamte theampo sungah hong thethaang tu a, tualai ah noma le na taanghpupite ii biak ngeingawl pathiante, thing le suang taw a kivawt pathiante na, na seam tu uh hi.

65Koima ah thinnopna na mu buatu a, noma ngam ci tu in mun khat zongh na nei buatu uh hi; Topa in no sia thinngimna, lam et nei ngawlna le thinkiamna taw hong khuplup tu hi.

66Na nuntakna uh lauhuai tawntung tu hi. Sun le zan in na patau tawntung tu uh a, thi tu lau in na nungta tawntung tu uh hi.

67Na mu theampo in na thin uh lausak tu hi. Zing simin nitak na thangai tu uh a, nitak simin zingsang na thangai tu uh hi.

68Ama in tua munah na pai kik ngei nawn buatu uh hi, hong cisa hikale Topa in teambawte taw Egypt ah hong puak kik tu hi. Tua munah sila in na ngalte tungah noma le noma na kizuak tu uh a, ahizong kuama in no hong lei nuam buatu hi,” ci hi.