Joshua 1

Chin SCB2 (Syin Chin Bible)

Jump to: Chapter 2 →

1Topa ii naseam Moses thi zawkciang, Moses a hu, Nun ii tapa Joshua sia Topa in paupui hi.

2Ama in, “Ka naseampa Moses thi zo hi. Tu in kithoai in, nang le Israel mite theampo awng, amate tungah ka piaksa ngam ah a tum tu in Jordan ngun kaantan vun.

3Moses tungah ka ci sa bangma in nang le ka mite theampo ii na si natu leitang a buppi in kong pia zo hi.

4Na ngamngi te sia thangsang sennealngam panin saksang Lebanon Mualpite dong kithung to tu hi; nisuana sang Ngunpi lian Euphrates pan Hit te ngam kaantan in, nitumna sang Mediterranean Tuipi dong hi tu hi.

5Joshua awng, na nuntak lai teng nang sia kuama in hong zo zo ngawl tu hi. Moses ka ompui bangma in nang kong ompui tu hi. Nang taw a tawntungin kong omkhawm tu hi; nang kong nusia buatu hi.

6Na thin khosak in a kimuang in, banghang ziam cile a taanghpupite tungah ka kamciamsa hi ngam le lei a laak uh ciang hi mite ii lampui pa na hi tu hi.

7Na thin khosak in a kimuang po in; tuaciang ka naseampa Moses ii hong piak Thukham a buppi in na zui hamtang in. Tuate khat zongh na ngaingon heak in, tua hi le na paina theampo ah zawna na nga tu hi.

8Na biakpiakna sungah Thukham Laibu sia sim vateei tawntung tu ni hi. Sun taw zan taw tuasia kantel in a ki at theampo na zui hamtang vun. Tuasia ciang na nuamsa tu a, zawna na nga tu hi.

9Thin takkhana le kimuanna nei tu in kong thupiak sia ciamtee in! Lau heak in a, na thin kiamsak heak in, banghang ziam cile Kei, Topa na Pathian sia na paina theampo ah nang taw kong omkhawm hi,” ci hi.

10Tua zawkciang Joshua in lampuite ngiaphual sungah

11pai kawkoai in sawl a, mite tungah hi bangin thupiasak hi, “Nguai an pawlkhat taw kinging vun, banghang ziam cile tu zo ni thum sung, Topa na Pathian ii hong piak ngam le lei a la tu in Jordan ngun na kaantan tu uh hi.”

12Reuben le Gad ii namte le Manasseh ii nam khenlang tungah Joshua in,

13“ Topa na Pathian in Jordan ngun nisuana ngam sia na inn na lo tu in hong pia tu hi ci in Topa naseampa Moses ii a ci teng ciamtee vun.

14Na zite na tate le na ngannote sia hi lai munah taang tu a, ahihang ngalhiam toaisa na ngalkapte sia Israel mipuite mai ah a hu tu in ngun kaantan tu hi.

15Topa na Pathian ii amate a piaksa Jordan nitumna sang ngam teng a laak uh mateng tuabangin ngamta tu nu hi. Ama in Israel nam teng a vekpi in ngammuanna a piak zawkciang Topa naseampa Moses ii no hong piak Jordan nisuana ngam, hi lai ah a teang tu in nong cia kik thei tu uh hi,” ci hi.

16Amate in Joshua tungah, “Nong sawl theampo ka vawt tu a, nong puakna mun theampo ah ka pai tu hi.

17Moses ii thu ka nit uh bangma in na thu hong ni tu khu hi, Moses a ompui bangma in Topa na Pathian sia nang taw hong omkhawm tahen!

18Na thuneina hong thusim ngawlte le na thupiakna khat pawpo hong ni ngawlte in thina thuak tu hi. Na thin khosak in a kimuang in,” ci in zo kik uh hi.

Jump to: Chapter 2 →