Joshua 5

Chin SCB2 (Syin Chin Bible)

← Chapter 4 Jump to: Chapter 6 →

1Jordan nitumna sangah a om Amor kumpite theampo le Mediterranean Tuipi hui susuk ah a om Canaan kumpite theampo in, Israel te ii kaantan dong Topa in Jordan ngun leiko suaksak hi ci in za uh hi. Amate lau a, Israel te hangin a thin letna uh bo hi.

2Tuaciang Topa in Joshua munah, “Thau suang taw naam pawlkhat vawt in a, Israel te vunteap atsak in,” ci hi.

3Joshua sia Topa sawl bangin ngamta hi, tuaciang ama in Vunteap atna Mual a kici na munah Israel te vunteap atsak hi.

4Israel te ii Egypt a nusiat lai in pa a minpiang vunteap ki at siat zo hi. Ahihang kum sawmli sung sennealngam a kaantan hun sungin a piang pano te kuama vunteap ki at ngawl hi. Egypt ngam a nusiat lai in ngal sim thei tu kumcingsa te theampo zongh tua hun bo kuan ciang Topa ii thu a nit ngawl hu in thi siat zo hi. A taanghpupite tungah a khapsa tua ngam hau, lei phana ngam sia a kiciamna om bangin, amate musak ngawl hi.

7Hi mite ii tapate sia vunteap ki at ngeingawl hi; Joshua ii vunteap a atsak te sia hi khangthak te ahi hi.

8Vunteap a at zawkciang minam bup sia a ki atna ma a dam dong ngiaphual ah taam uh hi.

9Topa in Joshua mun ah, “Tu ni in Egypt ngam ah saltaang in na min daina uh teng ka bosak hi,” ci hi. Tua hu in tua mun sia Gilgal kici hi, tu dong ma in kina lai hi.

10Jericho hui zaangtam, Gilgal ah Israel te ngiaphual a saat laitakin, tua tha a ni sawm le ni li ni nitak sangin Paisan Poai khaam uh hi.

11A khuavak ni sia Canaan ngam ah a kiciing ante a neak phit ni hi: antang kan le anluum tol saw ngawl te ne uh hi.

12Tuasia hunin manna an hong taak nawn ngawl a, Israel te in bangma a nei nawn bua uh hi. Tua hun pan kipan Canaan ngam ah a kiciing ante a ne uh hi.

13Joshua sia Jericho nai ah a om lai in pasal khat namsau toai in ama mai ah a ding sia thakhat thu in mu hi. Joshua sia ama kungah paito a, “Nang sia ko ii ngalkap khat ni ziam maw ka ngal ni ziam?” ci in dongh hi.

14“Khat zongh hi bong, kei sia hi lai ah Topa ii ngalkaphonpi uk pa in om khi hi,” ci in zo hi. Joshua sia ama bia tu in lei ah bok a, “Syapa awng, kei na naseampa khi hi, bang hong vawtsak nuam ni ziam?” ci hi.

15Tuaciang Topa ii ngalkaphonpi uk pa in, “Na peangdap suut in; a thiangtho munah ding ni hi,” ci hi. Joshua in a sawl bangin vawt hi.

← Chapter 4 Jump to: Chapter 6 →