Joshua 3

Chin SCB2 (Syin Chin Bible)

← Chapter 2 Jump to: Chapter 4 →

1A zing ciang zingsang in Joshua le Israel te tho pal a, Acacia ah a ngiaphual sia nusia in Jordan ah pai in, a kaantan tu ngakin tua munah ngiaphual saat uh hi.

2Ni thum zawkciangin lampuite ngiaphual sung tengah pai in,

3mipite tungah, “ Topa na Pathian ii Thuciamna Thingkuang sia thiampite in a puak na mu uh ciang, ngiaphual pan vaiding in zui vun.

4No hi sungah a om ngei kuama om ngawl nu hi, tua ahiciang amate in na pai natu lampi hong lak tu hi. Ahihang Thuciamna Thingkuang nai neak heak vun; kilometre khat bang kihal in a nungah om vun,” ci hi.

5Joshua in mipite tungah, “Noma le noma kithiansua vun, banghang ziam cile zing ciang Topa in note sungah nalamdang laknate vawt tu hi,” ci hi.

6Tua zawkciang Joshua in thiampite sia, Thuciamna Thingkuang la in mipite mai ah pai a sawl hi. A ci bangin amate ngamta uh hi.

7Topa in Joshua munah, “Tu ni a ka sep tu sia nangma sia mihing thupi mama khat in Israel theampo ii hong zatak vawt tu a kipatna hi tu a, Moses ka ompui bangin nang zongh kong ompui hunlam amate in hong tel tu uh hi.

8Thuciamna Thingkuang pua thiampite ngun a thet uh ciang, ngun sung tansakin a, ngunvaal taw a kinaina ah dingsak in,” ci hi.

9Tuasia ciang Joshua in mipite munah, “Hong pai tavun a, Topa na Pathian ii pauna ngai vun.

10Maisang ah na manaw uh ciang ama in Canaan te, Hit te, Hiv te, Periz te, Girgash te, Amor te le Jebus te notkeak takpi tu hi.

11Leitung theampo ii Topa Thuciamna Thingkuang sia no mai ah Jordan a kaantan tak ciang, a nungta Pathian sia no sungah hong om hi ci in na tel tu uh hi.

12Tu in, no Israel namte khat sim sung pan khat tek mihing sawm le nii teal vun.

13Leitung theampo ii Topa ii Thuciamna Thingkuang a pua thiampi te in tui sung hong si tak ciang, Jordan ngun sia a luan tawlnga tu hi, tuaciang hong luangsuk tuite sia mun khat ah cing tu hi” ci hi.

14Tua hun sia anlaak hun hi a, nguntui pawm hi. Jordan ngun kan tu in mipite ngiaphual a nusiat uh ciang, thiampite sia Thuciamna Thingkuang pua in pai masa uh hi. Thiampite ngun sungah a kalsuan suk po ciang

16tui luan tawlnga a, Zarethan khua mawk Adam khuapi dong tuilu sangah tui hong cingto hi. Tuipi Thi sungah a luangsuk tui sia kikhaktan ik-ek a mipite in Jericho khua hui panin kaantan thei uh hi.

17Mipite in leiko tung tawn tan in a pai uh laitakin, Topa ii Thuciamna Thingkuang a pua thiampite sia mi theampo ii kaantan zawk mateng Jordan ngun laizang lei kona ah ding uh hi.

← Chapter 2 Jump to: Chapter 4 →