Leviticus 27

Chin SCB2 (Syin Chin Bible)

← Chapter 26 Jump to:

1Topa in Moses tungah,

2Israel mite atu a nuai a zui tu ngeinate pia hi. A tuam vilvel kiciamna khat taangtutna in Topa tungah a kipiasa mihing khat sia, a nuai a bangin sumpiakna taw tua pa kisuaktasak thei tu hi.

3Tua sumte Biakinn zak ngei khaikhin taw kitee hi: — pasal khanthin kum kul pan kum sawmluk dong: ngunntang 50 — numei khanthin: ngunntang 30 — pa a khangmoi, kum nga pan kum kul dong: ngunntang 20 — numei a khangmoi: ngunntang 10 — patangno kum nga nuaisia: ngunntang 5 — numeino: ngunntang 3 — Pasal kum sawmluk tungsia: ngunntang 15 — Nupi kum sawmluk tungsia: ngunntang 10

8Kamciamna a vawtpa sia zawng leih in a ngeina bangin a pia zo buale ama sia thiampipa kungah kipaipui tu a, thiampipa in a piak zawkza dong khepsak tu hi.

9Kamciamna a vawt sia Topa biakpiakna in a saan thamman nganno khat ahile Topa tungah a kipia letsong theampo biakna taw kisai in a thiangtho hi a,

10kamciamna a vawtpa in nganno dang taw laih thei ngawl tu hi. Nganno dang taw a laih le ngannote nii sia Topa neisa hi tu hi.

11Ahizong kamciamna in a piak tu nganno sia biakna taw kisai in a thiang ngawl hi a, Topa biakpiakna in saan thei ngawl tu ahile, tua pa in tua nganno sia thiampipa kungah paipui tu hi.

12Thiampipa in nganno phatna le siatna taw kizui in a man tan tu a, a tan babangin kip tu hi.

13Tua pa in a lei kik nuam le, a man za le tua man tungah zakhat ciang kul veu belapin lei tu hi.

14Mi khat in a inn Topa tungah a aap ciang, thiampipa in a phatna le a siatna zui in a man tan tu a, a tan babang kip tu hi.

15Tua pa in a inn a lei kik nuam le a man za le tua man tungah zakhat ciang kul veu belapin pia tu hi.

16Mihing khat in a leitang khen khat Topa tungah a aap le, a thai ciin thei tu za tungtawnin a man kitan tu a, mangtaang kilogramme kul ciang ngunntang sawm in kituat tu hi.

17Piakkikna Jubilee kum zawk po ciang a leitang a aap le, a man a cingin tan tu hi.

18Piakkikna Jubilee kum zawk pek ciang a aap le, thiampipa in Jubilee kum kik dong a om lai kumte taw kizui in a man za see tu a, a man khiam tu hi.

19Mi khat in a aapsa lo a lei kik nuam ahile a lo man za le tua man tungah zakhat ciang kul veu belap thua in pia tu hi.

20Topa tung pan tuasia lei kik masa ngawlin mi dang khat tungah a zuak le lei kik theina thu sia a bo hi tu hi.

21Piakkikna Jubilee kum a cin kik ciang tua lo a tawntungin Topa neisa suak tu a; thiampite in tang tu hi.

22Mihing khat in ama leisa lo Topa tungah a aap le,

23thiampipa in mai Piakkikna Jubilee kum dong a kum tuatin a man see tu a, a see zaza tua pa in tua ni in pia nanak tu hi; tua sum teng Topa aa ahi hi.

24Piakkikna Jubilee kum a cin ciang tua lo a neiphitpa tungah ahibuale a suan a paalte tungah ki aap kik tu hi.

25Biakinn zak ngei khaikhin taw kizui in na man theampo a man kitan tu hi.

26Nganhing no suakciil peuma Topa neisa hi zo ahiciang, kuama in thinzaw biakpiakna in Topa tungah aap thei ngawl tu hi. Khuino, tuuno, ahibuale kealno khat Topa neisa hi a,

27ahizong a thiang ngawl nganhing no suakciil ahile, a man a kitan za le tua a man tung zakhat ciang kul veu belapin lei kik thei tu hi. A kilei kik buale tua nganhing sia a man a kitan za taw midang khat pawpo tungah kizuak thei hi.

28Topa tungah thudang om ngawl tu in a aap thiang sitsetsa, mihing, nganhing, ahibuale leitang khat sia kuama in zuak kik, lei kik thei ngawl tu hi. A tawntungin Topa neisa ahi hi.

29Mihing ngawngawn tuabang a ki aap thiang sitset sa te tat kik thei tu hi ngawl hi; ama sia kithatlum nanak tu hi.

30Na leitang pan a piang theampo, an le thingngate sawm a khat Topa ii neisa ahi hi.

31Mi khat in tuate a tan kik nuam le, a man za le a man tungah zakhat ciang kul veu belapin tan tu hi.

32Na khoai sa ngannote sawm a khat Topa ii neisa ahi hi. Na nganno na sim ciang a sawmna nganno sia veu Topa ii neisa ahi hi.

33A neipa in a sim ciang a sawmna nganno sia a tha zawmbel a teal thei natu in vawt kaltang ngawl tu a, a kitealsa khat theak kik thei ngawl tu hi. A theak kik ahile tua nganhingte nii sia Topa ii neisa hi tu a, kilei kik thei ngawl tu hi.

34Hite Israel mite atu in Sinai Mual tungah Topa ii Moses tungah a thupiakte ahi hi.

← Chapter 26 Jump to: