Leviticus 3

Chin SCB2 (Syin Chin Bible)

← Chapter 2 Jump to: Chapter 4 →

1Mihing khat pawpo in kipawlkhop biakpiakna in a khuite khat a piak ciang a mealhem ngawl a tal ahibuale a nu hi tu hi.

2Ama in tua nganhing lu tungah a khut nga tu a, Topa ompuina Puanbuk kongbiang ah ngo tu hi. Aaron suan thiampite in biaknatau pangh li ah a chi the tu a,

3a nuai a sa teng Topa tungah an taw biakpiakna in pia tu hi: a sungthau theampo,

4a nautate le a nauta tuam a thau teng le a thinsa phabel teng pia tu hi.

5Thiampite in hi teng theampo meihal biakpiaknate taw biaknatau tungah hal khawm tu hi. Hi an taw biakpiakna ii ngimnam in Topa lungkimsak hi.

6Kipawlkhop biakpiakna khat ah tuu ahibuale keal a kizangh le; anu zongh apa zongh hi thei a, ahizong a mealhem ngawl het hi tu hi.

7Mihing khat in tuu taw a bia le,

8tuu lu tungah a khut nga tu a, Puanbuk mai ah ngo tu hi. Thiampite in biaknatau pangh li ah a chi the tu a,

9a nuai a, nganhing sanam teng Topa tungah an taw biakpiakna in pia tu hi: a thau, a cingpingu dongin a kitan a meici thau buppi, a sungkua a tuam a thau theampo,

10a nauta le a nauta tuam a thau teng le a thinsa phabel teng pia tu hi.

11Topa tungah an taw biakpiakna khat ahi bangma vaipuak nei thiampipa in biaknatau tungah hal siat tu hi.

12Mihing khat in keal a pia le,

13a keal lu tungah a khut nga tu a, Puanbuk mai ah ngo tu hi. Thiampite in biaknatau pangh li ah a chi the tu a,

14a nuai a sa teng Topa tungah an taw biakpiakna in pia tu hi: a sungthau theampo,

15a nauta le a nauta tuam a thau teng, a thinsa phabel teng ahi hi.

16Topa a lungkimsak an taw biakpiakna ahi bangma, thiampipa in biaknatau tungah hal siat tu hi. A thau teng Topa neisa ahi hi.

17Israel te in a thau ahizong, a chi ahizong, ne thei ngawl tu hi; hi thu in Israel te theampo ii a teenna mun pawpo ah a tawntung a zui tu ngeina khat ahi hi.

← Chapter 2 Jump to: Chapter 4 →