Leviticus 5

Chin SCB2 (Syin Chin Bible)

← Chapter 4 Jump to: Chapter 6 →

1A nuai a thute ah mawphel biakpiaknate kisamh hi. Mihing khat sia thukhenzum ah tetti pang tu in kisam a, ama muna bang le a zaakna bangin a son buale ama in a piang bang a thuak kul tu hi.

2Tup khol ngawlin, mihing khat in sathaang thi ci bang, biakna zeksa sang panin a thiang ngawl khat po a thamtha le, a vawt hunlam a phaw po ciang ama sia a thiang ngawl, a maw a khial ahi hi.

3Tup khol ngawlin mihing khat in mihing sung pan a piang a thiang ngawl na khat pawpo a thamtha ahile bang po ahizong ama in a vawt hunlam a heak po ciang a maw a khial hi tu hi.

4Kidawm ngawlin, mihing khat in thu khat po ah a kiciam tha le zong a vawt hunlam a phaw po ciang ama a maw a khial ahi hi.

5Mihing khat in a khial ciang a khialna pualaak nanak tu a,

6mawna daan tu in Topa tungah tuu anu khat ahibuale keal anu khat pia tu hi. Tua pa mawmai natu in thiampipa in sangaw biakpiakna neisak tu hi.

7Mi khat in tuu ahibuale keal a pia zo buale, a mawmai natu in ngam vakhu nii ahibuale inn vakhu niite Topa tungah paipui tu a, a khat sia mawphel biakpiakna hi tu a, a dangkhat sia meihal biakpiakna hi tu hi.

8Ama in tuate thiampipa kungah paipui tu a, thiampipa in tua vacim taw mawphel biakpiakna nei masa tu hi. Ama in a lu tatsak ngawlin a ngawng meak tu a,

9a chi pawlkhat biaknatau pangh the tu hi. A taanglai chi teng biaknatau bul ah sung tu hi. Hisia in mawphel biakpiakna khat ahi hi.

10Tua zawkciang a niina vacim taw ngeina om bangin meihal biakpiakna pia tu hi. Hi bangin thiampipa in tua pa mawmai natu sangaw biakpiakna vawtsak tu a, tua pa mawna kimaisak tu hi.

11Mi khat in ngam vakhu nii le inn vakhu nii a pia zo buale mawphel biakpiak natu in anvui kilogramme khat paipui tu hi. Antang taw biakpiakna hi ngawl a, mawphel biakpiakna ahikom, ama in olive thau ahibuale ngimnamtui a tungah buak ngawl tu hi.

12Ama in thiampipa kungah paipui tu a, Topa tungah a vekpi a piak a lakna in thiampipa in khutdim khat la tu a, an taw biakpiakna in biaknatau tungah hal tu hi. Tua in mawphel biakpiakna ahi hi.

13Hi bangin thiampipa in tua pa mawmai natu biakpiakna neisak tu a, ama mawna kimaisak tu hi. Antang taw biakpiakna bangma in a taanglai anvui teng thiampipa aa ahi hi.

14Topa in Moses tungah a nuai a zui tu ngeinate pia hi.

15Mihing khat pawpo in tup khol ngawlin Topa tungah biakna taw kisai a thiangtho nate pia ngawlin a khial le ama in khialphel biakpiakna in a mealhem ngawl tuutal ahibuale kealtal khat Topa tungah pia tu hi. A man sia a khensat ngeina om bang kikhensat tu hi.

16A piak ngawl vanh teng ama in pia kik tu a, zakhat ciang kul taw in belap nanak tu hi. Ama in thiampipa tungah pia tu a, tua pa mawmai natu in nganhing taw biakpiakna khat thiampipa in neisak tu a, ama mawna kimaisak tu hi.

17Mihing khat pawpo in tup khol ngawlin Topa thupiakte a paltan le, ama a khial hi a, a khialna daan thuak tu hi.

18A khialphel natu in a mealhem ngawl tuutal khat ahibuale kealtal khat thiampipa tungah paipui tu hi. A man sia a ngeina om bangin kikhensat tu hi. Thiampipa in tupkhol ngawlin a khialpa khialphel natu in sangaw biakpiakna neisak tu a, ama khialna kimaisak tu hi.

19Hisia ama ii Topa tungah a khialna hu a, khialphel biakpiakna ahi hi.

← Chapter 4 Jump to: Chapter 6 →