1 Thessalonians 1

Chin TBR17 (Tedim Bible Revision 2017)

Jump to: Chapter 2 →

1Keimah Paul le Silas le Timoti in Pa Pasian le Topa Jesu Khris sungah a om Thesalonika khua-a om pawlpi mite tungah lai ka hong khak uh hi. Pasian in note tungah dikna le nopsakna thupha hong tungsak tahen.

2Note khempeuh hangin Pasian tungah lungdamna ko tawntungin, ka thungetna uh ah note ka hong phawk tawntung uh hi.

3Bang hang hiam cih leh i Pa Pasian kiangah thu ka nget simun noteʼ upna hangin na nuntak ziate uh, itna na neih manun nakpi takin na nasepnate uh le i Topa Jesu Khris hong paikik ding lametna na neih manun kip takin na omnate uh ka phawk tawntung uh hi.

4Sanggamte aw, Pasian in note hong itin ama mi dingin a hong teel khitna thu ka thei uh hi.

5Bang hang hiam cih leh note kiangah Lungdamna Thu kong hilh lai-un kam bek tawh a hong gen hi loin, Kha Siangthoʼ vangliatna le Lungdamna Thu a man taktak hi, ci-in theihna tawh a hong pai ka hi uh hi. Note kiangah ka om laitakun noteʼ phattuam nadingin ka sep ka bawlna khempeuh uh na thei uh hi.

6Kote le Topaʼ gamtat bangin note na gamta uh a, note in gimna nakpi takin thuak lawh napi-in Kha Siangthoʼ huhna tawh lungdam takin thu umin na om uh hi.

7Tua ahih manin Masedonia gam le Akhaia gam sung khempeuh ah thu um mi khempeuhte adingin etteh hoih na suak uh hi.

8Noteʼ gamtatna ziateʼ hangin Masedonia le Akhaia gam sungteng bekah Topaʼ thu a kithei hi loin, note in Pasian na upna thu uh mun khempeuh ah kiza ahih manin koteʼ gen ding bangmah kisam nawn lo hi.

9Note kiangah ka hong pai lai-un kote na hong limbawlna thu uh le a nungta a man Pasianʼ thu zui-in a bia ding le,

10a hong tung ding Pasianʼ hehna panin eite a hong hon khia, sihna panin Pasian in a thawhsakkik a Tapa Jesu, van panin a hong pai ding ngak dingin milim paisanin Pasianʼ lamah na kiheina uh thute mi khempeuh in gen belin a nei uh hi.

Jump to: Chapter 2 →