1 Thessalonians 3

Chin TBR17 (Tedim Bible Revision 2017)

← Chapter 2 Jump to: Chapter 4 →

1A tawpna ah ka thuak zawh nawn loh uh ciangin Athen khua ah kei le Silas omin,

2Khris Lungdamna Thu hilhna ah Pasian adingin kote tawh na a sem khawm i sanggampa Timoti hong paisak le-ung hoih pen ding hi, ci-in ka ngaihsun uh hi. Amah in note hong hanthawnin na upna uh ah hong kipsakin,

3hih bawlsiatna hangin note khat beek na puk loh nading uh deihna tawh a hong paisak ka hi uh hi. Hih bang bawlsiatna pen i thuak ding mah hi, ci-in note in zong na theih uh ahi hi.

4Bang hang hiam cih leh note tawh kong om khawm lai-un zong, na theih sa uh bangin tu-a na thuak bangte teekteek mah uh a thuak ding hi hang, ci-in ka hong gen kholh sa uh ahi hi.

5Tua ahih manin ka thuak zawh nawn loh ciangin noteʼ upna zia a thei dingin Timoti ka hong sawl hi. Dawimangpaʼ ze-etna in note hong puksak kha-in, koteʼ nasepna a mawkna suak kha ding hi, ci-in ka lunghimawh uh hi.

6Ahi zongin tu-in note kiang panin Timoti hong tung khin a, noteʼ upna le nong itna uh thute a hong gen hi. Kote na hong lim ngaihsutnate uh le kote in ka hong muhnop uh mah bangin note in zong kote na hong muhnopna uh thute khempeuh a hong gen hi.

7Tua ahih manin sanggamte aw, noteʼ upna thu ka zak uh ciangin lungkham sinkhamna ka thuak laitakun ka tha uh hong hatsak hi.

8Topaʼ thu ah kip takin om na hih manun tu-in ka husang thei ta uh hi.

9Tu-in note hangin Pasian tungah ka lungdamna uh ka ko thei ta uh a, note hangin ka lungdamna khempeuh uh, Pasian tungah ka ko uh hi.

10Pasian in eite maitang kimu-in hong omsak theih nading le noteʼ upna ka hong kicinsak theih nadingun a sun a zanin lungsim takpi tawh thu ka ngenngen uh hi.

11Tu-in eiteʼ Pa ahi Pasian le i Topa Jesu in note kiangah ka hong pai theih nading uh lampi hong honsak tahen.

12Kote in note ka hong it zahun, note khatlekhat na ki-itna uh le mi khempeuh na itna uh, hong liansak semsem tahen.

13Tua hileh i Topa Jesu a mi siangthote khempeuh tawh hong pai ciangin eiteʼ Pa ahi Pasianʼ mai ah kisuanna om het loin lungsim siangtho takin na om thei ding uh hi.

← Chapter 2 Jump to: Chapter 4 →