1 Thessalonians 4

Chin TBR17 (Tedim Bible Revision 2017)

← Chapter 3 Jump to: Chapter 5 →

1Tu-in sanggamte aw, Pasianʼ deihna le ama lungkim nadingin bangci nuntak ding cih thu kote kiang panin na theih sa uh thute tawh kizui-in na nuntak sa uh ahih mah bangin a kicing zaw semsemin na nuntak nadingun i Topa Jesu min tawh hong thumin ka hong hanthawn uh hi.

2Bang hang hiam cih leh Topa Jesu min tawh ka hong thuhilhnate uh na theih sa uh ahi hi.

3Note a siangtho-in nungta-in numei tunga mawhna tawh na kipelh siangtho nading uh Pasian in hong deih hi.

4Pasian a thei lo dawi biate in kilunggulhna hang bek tawh a pumpi uh a zat bang hi loin, note in a kilawm a siangtho-in na pumpi uh bangci zat ding cih thu na theih ding uh hong deih hi.

6Hih bang thute ah kuamah in Khris sungah na sanggamte uh tungah na khialh loh nading uh le na khasiatsak loh nading uh hong deih hi. Pasian in hih bangin a gamta mite gim pia ding hi, ci-in khauh takin note kiangah ka hong gen khol khinzo uh hi.

7Eite a thanghuai gamtat dingin Pasian in a hong sam hi lo a, a siangtho-in a nungta dingin a hong sam ahi hi.

8Tua ahih manin hih thute a thudon lo mi in mite a thudon lo hi loin, note tungah ama Kha Siangtho a hong pia Pasian a thusim lo ahi hi.

9Ahi zongin thu up pih mite it ding tawh kisai-in bangmah gelh ding na kisam nawn kei uh hi. Khatlekhat na ki-it nading uh Pasian in note tungah hong hilh khinzo hi.

10Masedonia gam sunga om thu um mi khempeuh na it khin takpi uh hi. Tua ahih manin sanggamte aw, itna na neih semsem nadingun ka hong thum uh hi.

11Tu ma-a ka hong gen sa uh mah bangin kam tam nuam se loin hoihtakin om hithiatna, no tawh a kisai thu bek ngaihsutna le noteʼ nuntak nading na na sep nading uh hanciamin nei un.

12Tua bangin gamta le-uhcin thu um lo mite in note hong zahtak ding uh a, miteʼ neihsa na duhgawh kei ding uh hi.

13Sanggamte aw, lametna a nei lo mite bangin na dah luat loh nadingun a si sa miteʼ om zia ding thu na theih ding uh ka deih hi.

14Jesu si-in thokik hi, ci-in i up mah bangin Pasian in Jesu hong paipihkik ciangin amah umin a si mite zong hong tonpih ding hi, ci-in i um hi.

15Topaʼ thugen note kiangah kong gen uh thu in: Topa hong paikik ni ciangin a nungta lai eite pen a si sa mite tawh i kimuh ma-in Topa tawh i kimu kei ding hi.

16Pasianʼ thupiakna awging lianpi, vantungmi mangpaʼ thugenna le Pasianʼ peengkul hong ging dinga, vantung panin Topa mahmah hong pai suk ding hi.

17Tua ciangin tua hun laitakin a nungta lai eite pen vankim lai ah Topa a dawn dingin amah a um a si sa mite tawh hong kilakhawm dinga, Topa tawh i om khawm tawntung ding hi, cihna ahi hi.

18Tua ahih ciangin note khatlekhat hih thu tawh na kihehnem un.

← Chapter 3 Jump to: Chapter 5 →