2 Kings 16

Chin TBR17 (Tedim Bible Revision 2017)

← Chapter 15 Jump to: Chapter 17 →

1Remaliahʼ tapa Pekahʼ kum sawm le kum sagihna kumin Judah kumpi Jothamʼ tapa Ahaz in uk ding kipan hi.

2Ahaz in uk ding a kipatin kum sawm nih pha a, Jerusalem ah kum sawm le kum guk sung uk hi. A pu Davidʼ gamtatna sa bangin a Pasian, Topaʼ mitah amah a manin gamta lo a,

3Israel kumpi dangteʼ khekhap mah zui hi. Topa in Israel miteʼ mai ah a hawlkhiat minamteʼ zat a kihhuai a gamtatte mah uh bangin biakna-in ama tapa nangawn a hal hi.

4Amah in mual tunga biaknate tung le mual dawnte tung le singniim nuai khempeuh ah biakna pia-in paknamtui a hal hi.

5Tua ciangin Syria kumpi Rezin le Israel kumpi, Remaliahʼ tapa Pekah, Jerusalem a sim dingin hong kuan to uh a, amaute in Ahaz umcih uh hi. Ahih hangin amah zo zo lo uh hi.

6Tua hun laitakin Edom kumpipa in Edom gam dingin Elath lakikin Elath panin Judah gam mite hawl khia hi. Tua ciangin tu ni dongin amaute a teenna ahi Elath ah Edom mite hong pai uh hi.

7Tua ciangin Ahaz in Assiria kumpi Tiglath-pileser kiangah kamtaite sawlin, “Kei pen na nasem pa le na tapa ka hi hi. Hong kuan to inla, keimah a hong sim Syria kumpipa le Israel kumpipa kiang panin kei hong hon khia in,” a ci hi.

8Ahaz in zong Topaʼ biakinn sung le kumpipaʼ vankoihna a ngun le khamte la a, Assiria kumpipa tungah letsongin a puak hi.

9Tua ciangin Assiria kumpipa in ama thu ngai hi. Assiria kumpipa zong Damaskas a sim dingin hong kuan to-in tua khua la a, a mite galmatin Kir ah pua a, amah in Rezin a that hi.

10Assiria kumpi Tiglath-pileser tawh a kimu dingin Kumpi Ahaz zong Damaskas ah a pai ciangin, amah in Damaskas ah a om biakna tau mu hi. Tua ciangin Kumpi Ahaz in biakna tau a om dan, a neng a tawngin a lah kimna lim khat siampi Urijah kiangah puak hi.

11Tua ciangin siampi Urijah in biakna tau bawl hi. Damaskas panin Kumpi Ahaz hong tun ma-in Kumpi Ahaz in Damaskas panin a khakna tawh kizui-in siampi Urijah in na bawl hi.

12Damaskas panin kumpipa hong tun ciangin kumpipa in tua biakna tau a en hi. Tua ciangin kumpipa in biakna tau hong naihin pai to a,

13a meihal biakna le an tawh a biakna halin, leenggahzu tawh a biakna sung a, thunuam a a biakna sisan biakna tau tungah a theh hi.

14Tua ciangin amah in ama biakna tau thak le Topaʼ biakinn kikalah a om sumngo biakna tau la khia-in ama biakna tau leilu lam pangah a koih hi.

15Tua ciangin Kumpi Ahaz in siampi Urijah thu pia-in, “Gam sung mi khempeuhʼ meihal biakna, an tawh a biakna le leenggahzu tawh a biakna uh tawh biakna tau lian tungah zingsang meihal biakna, nitakin an tawh biakna, kumpipaʼ meihal biakna le an tawh a biaknate hal khawm in. Tua tungah meihal biakna sisan khempeuh le biakpiakna sisan khempeuh theh in. Ahih hangin sumngo biakna tau pen kei adingin thudot nading hi ding hi,” a ci hi.

16Kumpi Ahazʼ thupiak bangin siampi Urijah in hih thu khempeuh a hih hi.

17Tua ciangin Kumpi Ahaz in a kingakna kungte tan khia-in tuate panin a kuang la khia a, a nuai-a om sumngo bawngtalte tung panin tuikuangpi la khia sukin suang vial tungah a nga hi.

18Tua ciangin Assiria kumpipa a mai-et nadingin amah in Sabbath ni-in zat dingin a sungah a kikoih tutna khuhna le kumpipaʼ lutna a pua nung, Topaʼ biakinn panin a la khia hi.

19Ahaz in a hih a gamtatna a omlaite, Judah Kumpiteʼ Khang Tangthu Laibu sungah kigelh hi.

20Tua ciangin Ahaz si a, David khuapi sungah a pate tawh kivui hi. Tua ciangin ama tangin a tapa Hezekiah in a uk hi.

← Chapter 15 Jump to: Chapter 17 →