2 Kings 24

Chin TBR17 (Tedim Bible Revision 2017)

← Chapter 23 Jump to: Chapter 25 →

1Ama hun sungin Babylon kumpipa Nebukhadnezzar hong kuan to a, Jehoiakim kum thum sung ama nasem a suak hi. Tua ciangin Jehoiakim in amah lehdo hi.

2Tua ciangin ama nasem kamsangte tungtawnin a gen Topaʼ thugenna bangin Judah a susia dingin ama lang khat ah Topa in Khaldea mihonte, Syria mihonte, Moab mihonte le Ammon mihonte a sawl hi.

3Ama gamtatna sate khempeuh tawh kizui-in Manassehʼ khialhna hangin ama muhna panin amaute a khiinkhiat nading le a diakdiakin, amah in khialhna nei lo mite a thahna hangin Topaʼ thupiakna tawh Judah tungah hih thu a hong tung taktak ahi hi; bang hang hiam cih leh amah in a mawh lo miteʼ sisan tawh Jerusalem kidimsak a, Topa in ama mawhna maisak lo hi.

5Tu-in Jehoiakimʼ sepna a omlaite le a hih khempeuh, Judah Kumpiteʼ Khang Tangthu Laibu sungah kigelh hi.

6Tua ciangin Jehoiakim si a, ama tangin a tapa Jehoiakhin in a uk hi.

7Tua ciangin Babylon kumpipa in Egypt lui panin Eufratis gun dong Egypt kumpipaʼ neih khempeuh laksak khin ahih manin Egypt kumpipa a gam panin hong kuan khiakik zo nawn lo hi.

8Jehoiakhin kumpi a suahin kum sawm le kum giat pha a, amah in Jerusalem ah kha thum sung uk hi. Ama nuʼ min Nehushta hi a, Jerusalem khuami Elnathanʼ tanu ahi hi.

9A paʼ gamtatna sa khempeuh bangin Topaʼ muhna ah amah a sia gamta hi.

10Tua hun laitakin Jerusalem ah Babylon kumpipa Nebukhadnezzar hong kuan to a, tua khuapi a umcih hi.

11Ama nasemte in a umcih laitakin Babylon kumpipa Nebukhadnezzar tua khuapi ah hong tung hi.

12Tua ciangin Judah kumpipa Jehoiakhin in Babylon kumpipa tungah amah a kipan, ama nu, a nasemte, a uliante le a kumpi inn-a zaneite a kipia hi. Topa in a gen kholh sa bangin Babylon kumpipa in ama uk a kum giatna kumin thongkia-in amah la a, Topaʼ biakinn-a van manpha khempeuh pua khia-in, Kumpi Solomon in a bawl sa, Topaʼ biakinn sunga kham nazat khempeuh a satnen hi.

14Amah in Jerusalem mi khempeuh, a ulian khempeuh le a thahat a vanglian khempeuh, galmatin tul sawm le khutsiamte le sikseekte khempeuh a ciahpih hi. Tua gam a a zawng pente sim loh kuamah dang om nawn lo hi.

15Amah in Babylon ah Jehoiakhin a ciahpih hi. Kumpipaʼ nu, kumpipaʼ zite, ama nuai ah a zaneite le tua gam sung ukpite, Jerusalem panin Babylon ah galmatin a la hi.

16Babylon kumpipa in a thahat, galdo dingin a hoih mi thahat khempeuh a vekpi-in tul sagih le khutsiamte le sikseekte tul khat, galmatin Babylon ah a paipih hi.

17Tua ciangin Babylon kumpipa in Jehoiakhinʼ tangin ama paʼ sanggampa Mattaniah kumpi-in koih a, ama min Zedekiah ci-in a kheelsak hi.

18Zedekiah kumpi a suahin kum sawm nih le khat pha a, amah in Jerusalem ah kum sawm le kum khat sung a uk hi. Ama nuʼ min Hamutal hi a, Libnah khuami Jeremiahʼ tanu ahi hi.

19Jehoiakimʼ gamtatna sa khempeuh bangin Topaʼ muhna ah amah a sia gamta hi.

20Bang hang hiam cih leh Topaʼ hehna hangin ama kiang panin amaute a paih khiatna zah dong dingin Jerusalem le Judah tungah thu hong om hi.

← Chapter 23 Jump to: Chapter 25 →