2 Kings 21

Chin TBR17 (Tedim Bible Revision 2017)

← Chapter 20 Jump to: Chapter 22 →

1Manasseh in uk ding a kipatin kum sawm le kum nih pha a, amah in Jerusalem ah kum sawm nga le nga sung a uk hi. Ama nuʼ min Hefzibah ahi hi.

2Topa in Israel miteʼ mai ah a hawlkhiat minamteʼ gamtatna a kihhuaite mah bangin Topaʼ muhna ah amah a sia gamta hi.

3Bang hang hiam cih leh amah in a pa Hezekiahʼ suksiat sa mual tunga biaknate lamkik hi. Tua ciangin amah in Baal adingin biakna taute phut a, Israel kumpi Ahabʼ bawl bangin Asherah milim khat bawl a, vantung a om nate khempeuh bia-in tuateʼ na a sem hi.

4Tua ciangin Topa in, “Jerusalem ah ka min ka koih ding hi,” a cihna Topaʼ biakinn sungah amah in biakna taute lam hi.

5Tua ciangin amah in Topaʼ biakinn tual nihte tungah vantung a om nate khempeuh adingin biakna taute a lam hi.

6Tua ciangin amah in biakna-in a tapa hal a, aisanna le mailam thugen kholhnate semin, vankah theite le aisante tawh nasem khawm hi. Topaʼ muhna ah amah a sia tampi gamta a, amah hehsak hi.

7Tua ciangin Topa in David le a tapa Solomon tungah, “Israel minam khempeuh sung panin ka teelkhiat hih biakinn sung le Jerusalem ah ka min ka koih tawntung ding hi. Amaute ka thupiak sa khempeuh tawh kizui le ka nasem pa Moses in amaute a piak thukham khempeuh tawh kizui-in gamtat ding a kingaihsut nak uh leh, a pu a pate uh tungah ka piak gam sungah Israel mite mi vakvai ka hisak nawn kei ding hi,” a cihna biakinn sungah amah in ama bawl sa a kiseek Asherah milim a koih hi.

9Ahih hangin amaute in thu ngai lo uh a, Topa in Israel-teʼ mai ah a suksiat minamteʼ gamtatna sangin a siahuai zaw a gamtat nadingun Manasseh in amaute a zol hi.

10Tua ciangin Topa in kamsangte ahi a nasemteʼ tungtawnin gen a,

11“Judah kumpipa Manasseh in hih a kihhuai nate sem a, ama ma-a Amor miteʼ gamtatna sangin a sia zaw-in na semin a milimte tawh Judah mite zong khialsak khin hi.

12Tua ahih ciangin Israel Pasian Topa in hih bangin ci hi: En un, a za mite khempeuhʼ bilte a vut ding siatna Jerusalem le Judah tungah ka tungsak ding hi.

13Keimah in Samaria le Ahab le ama suante gim ka piak bangin Jerusalem tungah gimna ka tungsak ding hi. Tua ciangin mi khat in pakan a nul bangin keimah in Jerusalem nulin ka lumlet ding hi.

14Tua ciangin keimah in ka mi a omlaite paai khia-in amauʼ galte tungah ka pia dinga, amaute pen a galteʼ mat ding mi le van kiate suak ding uh hi;

15bang hang hiam cih leh a pu a pate uh Egypt panin hong paikhiat a kipan tu ni dongin keima muhna ah a sia gamta-in kei hong hehsak uh hi,” a ci hi.

16Tua tham loin Topaʼ muhna ah amaute a sia a gamtat nadingun amah in Judah mite a khialhsak banah, Jerusalem mong khat pan mong khat sisan tawh a kidimsak dongin Manasseh in mawhna baang lo mi tampi a that hi.

17Manassehʼ sepna a omlaite, a hih khempeuh le ama hih sa a khialhna, Judah Kumpiteʼ Khang Tangthu Laibu sungah kigelh hi.

18Tua ciangin Manasseh si a, Uzzaʼ huan sung, ama inn huan sungah kivui hi. Tua ciangin ama tangin a tapa Amon in a uk hi.

19Amon in uk ding a kipatin kum sawm nih le nih pha a, amah in Jerusalem ah kum nih sung uk hi. Ama nuʼ min Meshullemeth hi a, Jotbah khuami Haruzʼ tanu ahi hi.

20A pa Manassehʼ gamtat bangin Topaʼ muhna ah amah a sia gamta hi.

21Amah in a paʼ khekhap khempeuh tawn a, a pa in a na a sepsak milimteʼ na mah semin tuate a bia hi.

22Amah in a pu a pateʼ Pasian, Topa nusia a, Topaʼ lampi tawn lo hi.

23Tua ciangin Amonʼ nasemte in amah sawm sim uh a, ama inn sungah kumpipa a that uh hi.

24Ahih hangin tua gam mite in Kumpi Amon a sawmsimte khempeuh that leuleu uh a, tua ciangin tua gam mite in ama tangin a tapa Josiah kumpi-in a koih uh hi.

25Tu-in Amonʼ hih sa a gamtatna a omlaite pen Judah Kumpiteʼ Khang Tangthu Laibu sungah kigelh hi.

26Tua ciangin Uzzaʼ huan sung ama hanah amah kivui a, ama tangin a tapa Josiah in a uk hi.

← Chapter 20 Jump to: Chapter 22 →