Numbers 17

Chin TBR17 (Tedim Bible Revision 2017)

← Chapter 16 Jump to: Chapter 18 →

1Topa in Moses kiangah,

2“Israel mite tungah thu gen inla, amaute tung panin, beh khat ciangin ciangkhut khat, a beh tawh kizui-in a makaite khempeuh tung panin ciangkhut sawm le nih la in. A ciangkhut tungah amauʼ min ciat gelh inla,

3Levi ciangkhut tungah Aaronʼ min gelh in. Bang hang hiam cih leh beh lutang khat ah ciangkhut khat hi ding hi.

4Tua ciangin kikhopna buk sung, thuciamna mai, nang tawh i kituahna munah tuate na koih ding hi.

5Keimah in ka teel mipaʼ ciangkhut hong sel ding hi. Amaute in nang hong phunsanna, Israel miteʼ phunna tua bangin keiʼ kiang panin ka beisak ding hi,” a ci hi.

6Moses in zong Israel mite tungah tua thu a gen hi. A makaite khempeuh in a beh tawh kizui-in makai khat ciangin khat pai, ciangkhut sawm le nih ama tungah pia uh a, Aaronʼ ciangkhut zong amauʼ ciangkhut lakah a om hi.

7Moses in thuciamna puanbuk sung Topaʼ mai ah tua ciangkhutte a koih hi.

8A zing ciangin thuciamna puanbuk sungah Moses a pai leh, Levi-te beh ading Aaronʼ ciangkhut selin nguum khia a, paakin, almond min gah a gah hi.

9Tua ciangin Moses in Topaʼ mai panin Israel mite khempeuh kiangah ciangkhut khempeuh paikhiatpih hi. Amaute in en uh a, a ciangkhut ciat uh a la uh hi.

10Topa in Moses kiangah, “Amaute si kha ding ahih manin, amaute in kei hong phunsanna beisak theih nadingin a lehdo mite adingin lim ahi dingin thuciamna mai ah Aaronʼ ciangkhut koihkik in,” a ci hi.

11Tua ahih manin Topaʼ sawl bangin Moses in zong a hih hi.

12Israel mite in Moses kiangah, “En in, kote a si ka hi ta uh a, kote khempeuh a mawkna ka hi ta uh hi.

13A nai ah a pai, Topaʼ biakbuk nai ah a pai peuhmah si ding hi. Kote khempeuh ka bei nading uh hi ta hi lo ahi hiam?” a ci uh hi.

← Chapter 16 Jump to: Chapter 18 →