Lamentations 5

Chuvash (CHB) (БИБЛИ) 2009

← Chapter 4 Jump to:

1Эй Ҫӳлхуҫамӑр, эпир мӗн курнине аса илсемччӗ; хӗрхенсе пӑхсамччӗ, эпир мӑшкӑл тӳснине курсамччӗ.

2Пирӗн пурлӑхӑмӑр ют ҫынсен аллине куҫрӗ, пирӗн ҫуртӑмӑрсем ют ӑрусенӗн аллине куҫрӗҫ;

3эпир тӑлӑха, аттесӗр, тӑрса юлтӑмӑр; пирӗн аннемӗрсем — тӑлӑх арӑм пекех.

4Хамӑр шывӑмӑра кӗмӗлле ӗҫетпӗр, хамӑр вутӑ-шанкӑмӑр пире укҫалла тивет.

5Пире ӗнсе чикки парса хӑвалаҫҫӗ, эпир ӗҫлетпӗр, анчах канӑҫ курмастпӑр.

6Тӑраниччен ҫӑкӑр ҫиесчӗ тесе, аллӑмӑра Египетпа Ассири ҫыннисем енне тӑсатпӑр.

7Пирӗн аттемӗрсем ҫылӑха кӗнӗ; вӗсем ҫук ӗнтӗ, эпир вара вӗсем тунӑ йӗркесӗр ӗҫсемшӗн асап тӳсетпӗр.

8Пирӗнпе чурасем хуҫаланаҫҫӗ, пире вӗсен аллинчен хӑтаракан никам та ҫук.

9Пушхирте хӗҫ айне пулса вилес хӑрушлӑхра хамӑр валли ҫӑкӑр тупса пурӑнатпӑр.

10Выҫӑпа касӑхса пурӑннӑран пирӗн ӳт-тирӗмӗр кӑмака маччи пек хуралса ларчӗ.

11Арӑмсене Сионра, хӗрсене Иуда хулисенче мӑшкӑллаҫҫӗ.

12Ҫулпуҫсене вӗсем ҫака-ҫака вӗлернӗ, ватӑ ҫынсене хисепрен кӑларнӑ.

13Каччӑсене арман чулӗ ҫавӑрттараҫҫӗ, ачасем вутӑ ҫӗклемӗ йывӑррипе ун айне пулаҫҫӗ.

14Ӗнтӗ ватӑсем хапха умӗнче лармаҫҫӗ; каччӑсем юрламаҫҫӗ.

15Чӗремӗрсен савӑнӑҫӗ пӗтрӗ; вӑйӑ карти вырӑнне хурлану тӑрса юлчӗ.

16Пирӗн пуҫӑмӑр ҫинчен пуҫкӑшӑль ӳкрӗ; пире ҫылӑха кӗнӗшӗн хуйхӑ ҫитрӗ!

17Ҫакӑншӑн ыратать те сурать пирӗн чӗремӗр; ҫакӑншӑн куҫӑмӑр тӗссӗрленчӗ.

18Сион тӑвӗ пушанса юлнӑран унта тилӗсем анчах ҫӳреҫҫӗ.

19Эй Ҫӳлхуҫамӑр, Эсӗ ӗмӗр-ӗмӗрех пур; Санӑн аслӑ вырӑну сыпӑкран сыпӑка пырать.

20Мӗншӗн пире пӗтӗмпех манса каятӑн-ши, пире нумайлӑха пӑрахса хӑваратӑн-ши?

21Эй Ҫӳлхуҫамӑр, пире Ху енне ҫавӑр та, эпир Сан хыҫҫӑн кайӑпӑр; авалхи пек, пирӗн кунсене ҫӗнетсем.

22Эсӗ пире йӑлтах пӑрахрӑн-шим, пире виҫесӗр хытӑ ҫиллентӗн-шим?

← Chapter 4 Jump to: