Hosea 1

Dagbani Bible (Naawuni Kundi Kasi)

Jump to: Chapter 2 →

1Yawɛ ni daa zaŋ yɛtɔɣ’ shɛli yɛli Bɛri bia Hozia Naa Uzia mini Naa Jɔtam ni Naa Ahaz ni Naa Hɛzɛkia bɛn daa nyɛ Juda nanim’ la ni Jɔash bia Jɛrɔbɔam ŋun daa nyɛ Izraɛl naa la ʒiɛmana ni m-bɔŋɔ.

2Yawɛ ni daa yɛn tuui chɛ ka Hozia zaŋ yɛtɔɣa tɔɣisi Izraɛlnima, o daa yɛlila ŋun’ Hozia, “Cham’ ti kpuɣi pagɔrili n-dɔɣi pagɔrili bihi. Dama tiŋgbani ŋɔ nim’ tum yolimyolim pam ka zaɣisi man’ Yawɛ, ka bi ʒe ma yim.”

3Dinzuɣu ka o daa chaŋ ti kpuɣi Diblaim bipuɣiŋga Goma ka o daa niŋ pua n-dɔɣi bidibiga.

4Ka Yawɛ daa yɛl’ o, “Bolim’ o yuli ‘Jɛziriil’, dama di ku lan yuui, n ni darigi Jɛhu zuliya tibili o ni daa ku ninvuɣ’ shɛb’ Jɛziriil la ʒim yihibu zuɣu, ka chɛ ka Izraɛl nam zani tariga.

5Dindali maa n ni ti kabisi Izraɛlnim’ bidibbina zaa Jɛziriil Vinvamli ni.”

6Ka o daa lan niŋ pua n-dɔɣi bipuɣiŋga. Ka Yawɛ daa yɛl’ o, “Bolim’ o yuli ‘Kunyanambɔzɔbo’, dama n ku lan zo Izraɛlnim’ nambɔɣu, ka chɛ bɛ taali hal biɛla gba.

7Amaa n ni zo Juda zuliya nambɔɣu. Ka man’ Yawɛ ŋun nyɛ bɛ Naawuni ŋɔ ni fa ba bahi. M bi yɛn zaŋ tɔbiri bee takɔbi bee yuri bee wɔribariba fa ba bahi.”

8Kunyanambɔzɔbo ni daa ŋmaai bihili, ka o lan niŋ pua n-dɔɣi bidibiga yaha.

9Ka Yawɛ daa yɛl’ o, “Bolim’ o yuli ‘Panniriba’, dama yi pala n niriba, m mi pala yi Naawuni.”

10Amaa Izraɛlnim’ galisim ni ti ŋmanila teeku duli bihigu din ku tooi buɣisi ka mi ku tooi kali ŋɔ. Ka luɣ’ shɛli di ni yɛli ba, “Yi pala n niriba ŋɔ,” di ni ti lan boli ba, “Naawuni ŋun be ŋɔ bidibisi.”

11Ka Judanim’ mini Izraɛlnim’ ti laɣim taba, ka bɛ ni ti malila zuɣulaan’ yino, ka bɛ biɛhigu ti chaŋ tooni tiŋgbani maa ni, dama Jɛziriil dabisili maa ni ti nyɛla dabisi’ titali.

Jump to: Chapter 2 →