Hosea 11

Dagbani Bible (Naawuni Kundi Kasi)

← Chapter 10 Jump to: Chapter 12 →

1Izraɛlnim’ ni daa pɔr’ la n daa yuri ba. N daa boli ba yihi Ijipti tiŋgbɔŋ ni na kaman m bidibisi la.

2Ka n ni kul booni ba waawaayili shɛm, lala ka bɛ kpɛri yɔɣu ka chɛri ma. Bɛ maanila buɣili Baalnima, ka tuɣindi tulaale zim niŋdi binnana.

3Amaa mani n-daa wuhi Ifriimnim’ chandi. Mani n-daa kpuɣi ba gbibi n nuhi ni. Amaa bɛ daa bi baŋ ni mani n-chɛ ka bɛ kpaŋ maa.

4N daa zaŋla nirilim mihi vo ba chaŋ. N daa zaŋla yurilim mihi niŋ ba, ka leei ŋun yihi bin’ tibisi shɛŋa din ga bɛ noya la, ka silim tiŋa n-dihi ba bindirigu.

5Bɛ ni zaɣisi ni bɛ ku labi n sanna maa zuɣu, bɛ ni labi Ijipti, ka Asiria naa ti leei bɛ naa.

6Bɛ ni ti zaŋ takɔbiri lu bɛ fɔntinsinim’ zuɣu ŋ-ŋme n-kabisi kur’ shɛŋa din kpari bɛ dunɔdaya la, ka ku ba bɛ birininim’ ni.

7N niriba maa kul kpɛrila yɔɣu ka chɛri ma, dinzuɣu ka n zali ba ni bɛ ʒi ʒi’ tibisa maa, ka so ku tooi yihi li.

8Ifriimnima, wula ka n ni tooi zaɣisi ya? Izraɛlnima, wula ka n ni tooi chɛn ya bahi? Wula ka n ni niŋ ya kaman n ni daa niŋ Adimanim’ shɛm la? Ka wula ka n ni tooi niŋ ya kaman n ni daa niŋ Zɛbɔiimnim’ shɛm la? N suhu taɣiya, ka n nambɔzɔbo galisi.

9N ku niŋ n suhu ni yiɣisi ka n yɛn niŋ shɛm maa. N ku lan ku Ifriimnim’ yaha, dama m pala daadam, n nyɛla Naawuni. Mani ŋun be kasi ŋɔ be yi sunsuuni, ka n ku kana ni n ti ku niriba.

10Bɛ ni ti doli Yawɛ, ka o ti ŋum kaman gbuɣinli la; yɛlimaŋli, o shiri ni ti ŋum, ka o niriba ti yi wulinluhili polo na ka bɛ ni sɔhira.

11Bɛ ni ti yi Ijipti kana ka bɛ ni’ sɔhiri kaman noombihi la. Ka shɛb’ ti yi Asiria kana kaman ŋmana la, ka n ti zaŋ ba labisi bɛ yinsi. Yawɛ n-yɛli lala maa.

12Ifriimnim’ zaŋla ʒiŋmabo gili ma niŋ sunsuuni, ka Izraɛlnim’ mi zaŋ yɔhiŋ gili ma. Amaa Naawuni na mi Judanim’ yɛla, ka bɛ nyɛ bɛn ʒe Ŋun be Kasi la yim.

← Chapter 10 Jump to: Chapter 12 →